ഉണ്ടയ്ക്കുശേഷം മമ്മൂട്ടി - ഖാലിദ് റഹ്മാൻ ചിത്രം 'മട്ടാഞ്ചേരി മാഫിയ'; ഒപ്പം ആസിഫ് അലിയും നസ്ലിനും

'ഉണ്ട' എന്ന സൂപ്പർഹിറ്റ് ചിത്രത്തിനുശേഷം മമ്മൂട്ടിയെ നായകനാക്കി ഖാലിദ് റഹ്മാൻ സംവിധാനം ചെയ്യുന്ന 'മട്ടാഞ്ചേരി മാഫിയ'യുടെ ടൈറ്റിൽ പോസ്റ്റർ സോഷ്യൽ മീഡിയയിൽ കത്തിക്കയറുകയാണ്. മമ്മൂട്ടിയോടൊപ്പം ആസിഫ് അലി, നസ്ലിൻ എന്നിവർ പ്രധാന വേഷങ്ങളിൽ എത്തുന്നു എന്ന പ്രത്യേകതയും ചിത്രത്തിനുണ്ട്. മലയാള സിനിമയിൽ തീപ്പൊരി പ്രതീക്ഷകൾ ഉയർത്തുന്ന ഗാങ്സ്റ്റർ ആക്ഷൻ-കോമഡി എന്റർടെയ്നറായി ഒരുങ്ങുന്ന ഈ ചിത്രം, മെഗാസ്റ്റാർ മമ്മൂട്ടിയുടെ കരിയറിലെ മറ്റൊരു ശ്രദ്ധേയമായ കഥാപാത്രമായിരിക്കും.

യുവതാരങ്ങളുമായുള്ള കൂട്ടുകെട്ട് പ്രേക്ഷക ആവേശം ഇരട്ടിയാക്കുന്നുണ്ട്. ചിത്രം സംവിധാനം ചെയ്യുന്നത് യുവ സംവിധായകനായ ഖാലിദ് റഹ്മാനാണ്. വ്യത്യസ്തമായ ശൈലിയിലും അവതരണത്തിലും ശ്രദ്ധേയനായ ഖാലിദ് റഹ്മാൻ ഉണ്ടയ്ക്കുശേഷം മമ്മൂട്ടിയെ നായകനാക്കി ഒരുക്കുന്ന രണ്ടാമത്തെ ചിത്രമാണിത്. ഖാലിദ് റഹ്മാന്റെ 'ആലപ്പുഴ ജിംഖാന'യും 'തല്ലുമാല'യും 'അനുരാഗ കരിക്കിൻവെള്ള'വും ഏറെ ശ്രദ്ധേയമായ ചിത്രങ്ങളായിരുന്നു. 'മട്ടാഞ്ചേരി മാഫിയ'യിലൂടെ പുതുമയാർന്നതും മാസ് എലമെന്റുകൾ നിറഞ്ഞതുമായ ഒരു സിനിമാനുഭവം സമ്മാനിക്കുമെന്നാണ് പ്രതീക്ഷ.

പ്ലാൻ ബി മോഷൻ പിക്ചേഴ്സിന്റെയും യൂണിവേഴ്സൽ സിനിമസിന്റെയും ബാനറിൽ ബി. രാകേഷും ഖാലിദ് റഹ്മാനും ചേർന്നാണ് ചിത്രം നിർമ്മിക്കുന്നത്. ചിത്രത്തിന്റെ തിരക്കഥ ഒരുക്കുന്നത് നിയോഗ് കൃഷ്ണ, ഷറഫു-സുഹാസ്, തശ്രീഖ് അബ്ദുൽ സലാം; ക്യാമറ ജിംഷി ഖാലിദ്, എഡിറ്റർ നൗഫൽ അബ്ദുല്ല, മ്യൂസിക് റെക്സ് വിജയൻ, ബി.ജി.എം. സുഷിൻ ശ്യാം, മേക്കപ്പ് റോണക്സ് സേവിയർ, സൗണ്ട് ഡിസൈൻ വിഷ്ണു ഗോവിന്ദ്, പ്രൊഡക്ഷൻ ഡിസൈൻ മാനവ് സുരേഷ്, കോസ്റ്റ്യൂം മാഷർ ഹംസ, വി.എഫ്.എക്സ്. ഡിജി ബ്രിക്സ്, ലൈൻ പ്രൊഡ്യൂസർ വിഷാദ് കെ.എൽ., സ്റ്റിൽസ് രോഹിത് കെ. സുരേഷ്, ടൈറ്റിൽ ഡിസൈൻ ചാർളി ആൻഡ് ദി ബോയ്സ്, ഡിജിറ്റൽ മാർക്കറ്റിങ് ഒബ്സ്ക്യൂറ.

മികച്ച താരനിരയും ശക്തമായ അണിയറപ്രവർത്തകരും ഒന്നിക്കുന്ന 'മട്ടാഞ്ചേരി മാഫിയ' മലയാള സിനിമയിൽ വ്യത്യസ്തമായൊരു ഗാങ്സ്റ്റർ കോമഡി-ഡ്രാമ അനുഭവമായി മാറുമെന്നാണ് സിനിമാപ്രേമികളുടെ പ്രതീക്ഷ.

Content Highlights: Director Khalid Rahman reunites with Megastar Mammootty for 'Mattancherry Mafia,' a high-octane gangster action-comedy also starring Asif Ali and Naslen.