അഭിനയത്തിൽനിന്ന് ബ്രേക്ക് എടുക്കുന്നില്ല, ലോറൻസ്-നിവിൻ ടീമിന്റെ ‘ബെൻസി’ൽ ജോയിൻചെയ്ത് രവി മോഹൻ

തന്റെ ഭാര്യ ആരതിയുമായുള്ള വിവാഹമോചന നടപടികൾ പൂർത്തിയാകുന്നതുവരെ സിനിമയിൽ നിന്ന് വിട്ടുനിൽക്കുമെന്നുള്ള തീരുമാനത്തിൽനിന്ന് പിന്മാറി നടൻ രവി മോഹൻ. സംവിധായകൻ ലോകേഷ് കനകരാജിന്റെ നേതൃത്വത്തിലുള്ള ലോകേഷ് സിനിമാറ്റിക് യൂണിവേഴ്സിന്റെ ഭാഗമായുള്ള ബെൻസ് എന്ന ചിത്രത്തിൽ അദ്ദേഹം ജോയിൻ ചെയ്തു. ഭാഗ്യരാജ് കണ്ണൻ സംവിധാനംചെയ്യുന്ന ചിത്രത്തിൽ രാഘവ ലോറൻസ് നായകനായും നിവിൻ പോളി വില്ലനായും എത്തുന്നു.

ഞായറാഴ്ചയാണ് ആരാധകരെ ഞെട്ടിച്ചുകൊണ്ട് സംവിധായകൻ ലോകേഷ് കനകരാജ് രവി മോഹനെ എൽ.സി.യുവിലേക്ക് സ്വാഗതം ചെയ്തത്. 'ബെൻസ്' എന്ന ചിത്രത്തിന്റെ ഷൂട്ടിംഗ് സെറ്റിൽ നിന്നുള്ള ചിത്രങ്ങൾ പങ്കുവെച്ചുകൊണ്ടായിരുന്നു ഈ പ്രഖ്യാപനം. ചിത്രത്തിലെ നായകനായ രാഘവ ലോറൻസും അദ്ദേഹത്തിന് ഊഷ്മളമായ വരവേൽപ്പ് നൽകി.

ജയം രവിയുടെ ഈ തിരിച്ചുവരവ് ആരാധകർക്കിടയിൽ സമ്മിശ്ര പ്രതികരണമാണ് ഉണ്ടാക്കിയിരിക്കുന്നത്. അദ്ദേഹം പൂർണ്ണ ആരോഗ്യവാനാണോ എന്ന് ചിലർ ആശങ്കപ്പെടുമ്പോൾ, എൽ.സി.യു പോലുള്ള ഒരു വലിയ ഫ്രാഞ്ചൈസിയിലൂടെയുള്ള അദ്ദേഹത്തിന്റെ മടങ്ങിവരവിനെ മറുവിഭാഗം ആവേശത്തോടെയാണ് കാണുന്നത്.

ഈ മാസം ആദ്യമാണ് താൻ വിവാഹമോചനം കഴിയാതെ സിനിമയിൽ അഭിനയിക്കില്ലെന്ന് ഒരു വാർത്താസമ്മേളനത്തിൽ രവി മോഹൻ പ്രഖ്യാപിച്ചത്. സൈബർ ആക്രമണങ്ങളും തന്റെ സുഹൃത്തും ഹീലറുമായ കെനീഷ ഫ്രാൻസിസുമായുള്ള ബന്ധത്തെക്കുറിച്ചുള്ള അഭ്യൂഹങ്ങളും അദ്ദേഹത്തെ മാനസികമായി തളർത്തിയിരുന്നു. വിവാഹമോചനം ലഭിക്കുന്നതുവരെ തന്റെ ജീവിതം സാധാരണ നിലയിലാകില്ലെന്നും അതുവരെ സിനിമകൾ റിലീസ് ചെയ്യില്ലെന്നും വൈകാരികമായാണ് അദ്ദേഹം വാർത്താസമ്മേളനത്തിൽ പറഞ്ഞിരുന്നത്. എന്നാൽ ബെൻസ് എന്ന ചിത്രത്തിലൂടെ അദ്ദേഹം സിനിമയിലേക്ക് തിരിച്ചെത്തുകയാണെന്ന പ്രഖ്യാപനം അപ്രതീക്ഷിതമായാണ് വന്നത്.
ഭാഗ്യരാജ് കണ്ണൻ സംവിധാനം ചെയ്യുന്ന 'ബെൻസ്' ലോകേഷ് സിനിമാറ്റിക് യൂണിവേഴ്സിലെ ഒരു പ്രധാന കണ്ണിയായിരിക്കും. മയക്കുമരുന്ന് മാഫിയയുമായി ബന്ധപ്പെട്ട പ്രമേയമാണ് ഈ യൂണിവേഴ്സിലെ സിനിമകൾ കൈകാര്യം ചെയ്യുന്നത്. കൈതി, വിക്രം, ലിയോ എന്നീ ചിത്രങ്ങൾക്ക് ശേഷം എൽ.സി.യുവിലെ അടുത്ത വമ്പൻ പ്രോജക്റ്റായാണ് 'ബെൻസ്' കരുതപ്പെടുന്നത്.

Content Highlights: In an absolute blockbuster announcement that has sent shockwaves across South Indian cinema, acclaimed actor Ravi Mohan (popularly known as Jayam Ravi) has officially joined filmmaker Lokesh Kanagaraj’s Lokesh Cinematic Universe. The development comes as a massive surprise to the industry. Earlier this month, a deeply emotional Ravi Mohan had held a press conference declaring a complete, self-imposed sabbatical from active cinema schedules.