'എ' സർട്ടിഫിക്കറ്റ് ചിത്രം കാണാൻ കുട്ടികൾ; വിജയ് ചിത്രം 'ജനനായകൻ' പ്രദർശനം മുടങ്ങി

ചെന്നൈ: തമിഴ്നാട് മുഖ്യമന്ത്രി സി. ജോസഫ് വിജയ് നായകനായ 'ജനനായകൻ' എന്ന ചിത്രത്തിന്റെ പ്രദർശനം ചെന്നൈയിലെ തിയേറ്ററുകളിൽ മുടങ്ങി. സെൻസർ ബോർഡ് 'എ' സർട്ടിഫിക്കറ്റ് നൽകിയ ചിത്രത്തിന്റെ പ്രദർശനത്തിന് കുട്ടികളുമായി കുടുംബങ്ങൾ എത്തിയതിനെത്തുടർന്നാണ് പ്രദർശനം റദ്ദാക്കിയത്. ചിത്രം വൈകുകയും ചില തിയേറ്ററുകളിൽ പ്രദർശനം തടസ്സപ്പെടുകയും ചെയ്തു.

ഞായറാഴ്ച അംപ മാളിലെ പി.വി.ആർ. സിനിമാസിൽ രാവിലെ 9:25-ഓടെ ആരംഭിച്ച ഷോ 9:35-ഓടെ പോലീസ് എത്തി തടഞ്ഞു. 'എ' സർട്ടിഫിക്കറ്റ് ലഭിച്ച ചിത്രത്തിന് കുട്ടികളുമായി പ്രവേശിച്ചതിനെ തുടർന്നായിരുന്നു പോലീസ് ഇടപെടൽ. കുട്ടികളുമായി എത്തിയ മാതാപിതാക്കളോട് തിയേറ്ററിന് പുറത്തുപോകാൻ അധികൃതർ ആവശ്യപ്പെട്ടു. ഇതേത്തുടർന്ന് ഒരു മണിക്കൂറോളം ചിത്രം തടസ്സപ്പെട്ടു. പിന്നീട് പണം തിരികെ നൽകുകയും കുട്ടികളുള്ള കുടുംബങ്ങൾ പുറത്തുപോവുകയും ചെയ്ത ശേഷമാണ് പ്രദർശനം പുനരാരംഭിച്ചത്.

സമാനമായ സംഭവം ചെന്നൈയിലെ പി.വി.ആർ. ഗ്രാൻഡ് മാളിലുമുണ്ടായതായി സാമൂഹികമാധ്യമങ്ങളിൽ ആരാധകർ വെളിപ്പെടുത്തി. 18 വയസ്സിന് താഴെയുള്ള കുട്ടികൾ എത്തിയതിനെ തുടർന്ന് തിയേറ്റർ അധികൃതർ ഇടപെടുകയായിരുന്നു. തുടർന്ന് പ്രദർശന സമയത്തിൽനിന്ന് വൈകിയാണ് ചിത്രം ആരംഭിച്ചത്.

അതേസമയം, ചില തിയേറ്ററുകളിൽ നിയന്ത്രണങ്ങൾ കർശനമല്ലെന്ന പരാതിയും ഉയർന്നിട്ടുണ്ട്. സർട്ടിഫിക്കറ്റ് നിബന്ധന പാലിക്കാതെ കുട്ടികളെ സിനിമ കാണാൻ അനുവദിച്ചതായി സാമൂഹികമാധ്യമങ്ങളിൽ ചൂണ്ടിക്കാട്ടി.

മുഴുവൻ സമയ രാഷ്ട്രീയ പ്രവർത്തനത്തിലേക്ക് കടക്കുന്നതിന് മുൻപുള്ള വിജയ്‌യുടെ അവസാന ചിത്രമാണ് 'ജനനായകൻ'. എച്ച്. വിനോദ് സംവിധാനം ചെയ്ത ചിത്രം ജൂലൈ 23-നാണ് തിയേറ്ററുകളിലെത്തിയത്. ബോക്‌സ് ഓഫീസിൽ മികച്ച പ്രതികരണമാണ് ചിത്രത്തിന് ലഭിക്കുന്നത്.

Content Highlights: Screenings of Vijay's latest movie Jananayakan were disrupted across various Chennai theaters after families arrived with children for the 'A' certified film. At the Ampa Mall PVR Cinemas, police intervened ten minutes into the morning show and temporarily halted the screening due to the violation of censor rules. Theater management eventually resumed the show after offering ticket refunds and asking families with minors under 18 years of age to leave. Similar delays and strict age-check enforcement were reported from other multiplexes like PVR Grand Mall, drawing widespread attention on social media. Directed by H. Vinoth and released on July 23, Jananayakan is scheduled as Vijay's final film appearance before he transitions fully into active politics