നന്നായി അഭിനയിച്ചു,സിനിമ കണ്ടപ്പോൾ നിരാശതോന്നി;പ്രതീക്ഷിച്ച പ്രധാന്യം ലഭിച്ചില്ല- വെളിപ്പെടുത്തി നടി

സുകുമാർ സംവിധാനംചെയ്ത അല്ലു അർജുൻ- ഫഹദ് ഫാസിൽ ചിത്രം 'പുഷ്പ 2: റൂളി'ന്റെ ഭാഗമായതിൽ നിരാശപങ്കുവെച്ച് നടി ദിവി വാഥ്യ. ചിത്രത്തിന്റെ ഭാഗമായതിൽ ഇപ്പോൾ ഖേദിക്കുന്നതായി നടി വെളിപ്പെടുത്തുന്നു. പ്രതീക്ഷിച്ച പ്രധാന്യം ചിത്രത്തിൽ ലഭിച്ചില്ലെന്ന് നടി പറഞ്ഞു.

'കഥ പറഞ്ഞപ്പോൾ, അതൊരു വലിയ വേഷമായിരിക്കുമെന്നാണ് എന്നോട് പറഞ്ഞത്. എന്റെ കഥാപാത്രത്തിന് വലിയ പ്രാധാന്യം നൽകിക്കൊണ്ടുള്ള ടീസറായിരുന്നു പുറത്തുവിട്ടത്. അതിനുശേഷം എനിക്കും സ്വന്തം വേഷത്തെക്കുറിച്ച് വലിയ പ്രതീക്ഷകളുണ്ടായിരുന്നു. എന്നാൽ ചിത്രം പുറത്തിറങ്ങിയപ്പോൾ മാത്രമാണ്, അത്രയൊന്നുമില്ലെന്ന് എനിക്ക് മനസിലായത്', നടി ഒരു അഭിമുഖത്തിൽ പറഞ്ഞു.

'എനിക്ക് നിരാശതോന്നി. പക്ഷേ എന്റെ വേദന ആര് ശ്രദ്ധിക്കാനാ... സ്വയം ആശ്വസിപ്പിച്ചു മുന്നോട്ടുപോവേണ്ടിവരും. സിനിമ കണ്ടപ്പോൾ എനിക്ക് വലിയ വേദനതോന്നി. വലിയ വേഷമാണെന്ന് കരുതി എന്റെ പത്ത് സുഹൃത്തുക്കളുമായാണ് ഞാൻ ചിത്രം കാണാൻ പോയത്. 20 ദിവസം ഷൂട്ടിങ്ങും പത്തുദിവസം ഡബ്ബിങ്ങുമുണ്ടായിരുന്നു. നന്നായി അഭിനയിച്ചുവെന്ന് എനിക്ക് അറിയാം. പക്ഷേ, ചിത്രം കണ്ടപ്പോൾ ഞെട്ടിപ്പോയി', അവർ കൂട്ടിച്ചേർത്തു.

ചിത്രത്തിൽ മിന്നു ഉമാ ദേവി എന്ന ടെലിവിഷൻ റിപ്പോർട്ടറുടെ വേഷമാണ് ദിവി വാഥ്യ അവതരിപ്പിച്ചത്. തെലുങ്ക് ബിഗ് ബോസിലൂടെയാണ് നടി പ്രശസ്തയായത്. 'ഗോഡ്ഫാദർ' ഉൾപ്പെടെ ചിത്രങ്ങളിൽ അഭിനയിച്ചിട്ടുണ്ട്. ഫെബ്രുവരിയിൽ പുറത്തിറങ്ങിയ 'ഹണി' എന്ന ചിത്രത്തിലാണ് ഒടുവിൽ വേഷമിട്ടത്.

Content Highlights: Actress Divi Vadthya expresses regret over her involvement in Pushpa 2. She claims the role promised was much larger than what appeared in the final cut. The actress felt embarrassed after watching the film with her friends. Divi Vadthya played the role of a television reporter named Minnu Uma Devi