ഷൂട്ടിങ് കഴിഞ്ഞെത്തിയപ്പോൾ ശാരീരിക അസ്വാസ്ഥ്യം, ആരോഗ്യനില വഷളായത് പെട്ടെന്ന്; ഷാജികുമാറിന്റെ സംസ്കാരം വൈകീട്ട്

അന്തരിച്ച പ്രശസ്ത ഛായാഗ്രാഹകൻ ഷാജികുമാറിന്റെ സംസ്‌കാരച്ചടങ്ങുകൾ ചൊവ്വാഴ്ച വൈകീട്ട് നടക്കും. തിരുവനന്തപുരം സ്വദേശിയായ ഷാജികുമാർ ദീർഘനാളായി എറണാകുളം പെരുമ്പാവൂരിലാണ് താമസം. പെരുമ്പാവൂരിലെ വീട്ടുവളപ്പിൽ ഏഴുമണിയോടെ സംസ്‌കാരച്ചടങ്ങുകൾ നടക്കും. ഉച്ചയ്ക്ക് ഒന്ന് വരെ കലൂരിലെ ഗോകുലം കൺവെൻഷൻ സെന്ററിൽ മൃതദേഹം പൊതുദർശനത്തിന് വെക്കും.

അർധരാത്രി 12 മണിയോടെയായിരുന്നു ഷാജികുമാറിന്റെ അന്ത്യം. ദിലീപ് നായകനായ 'ഹെനോക്കി'ന്റെ ചിത്രീകരണത്തിനായി ആലപ്പുഴയിലായിരുന്നു. ചിത്രത്തിന്റെ ഷൂട്ട് കഴിഞ്ഞ് ശനിയാഴ്ച രാത്രി ഹോട്ടൽ മുറിയിലെത്തിയ ഷാജികുമാർ ശാരീരിക അസ്വാസ്ഥ്യം തോന്നി ചിത്രത്തിന്റെ സംവിധായകൻ ഉല്ലാസ് കൃഷ്ണയെ വിവരം അറിയിച്ചു. ഉടൻ തൊട്ടടുത്തുള്ള ആശുപത്രിയിൽ എത്തിച്ചു.

അവിടെനിന്ന് എറണാകുളം മെഡിക്കൽ ട്രസ്റ്റ് ആശുപത്രിയിൽ കൊണ്ടുവന്ന ഷാജികുമാർ ആരോഗ്യം വീണ്ടെടുത്തുവരികയായിരുന്നു. കൂടെയുള്ളവരോട് സാധാരണ പോലെ സംസാരിച്ചിരുന്നു. പെട്ടന്നാണ് തിങ്കളാഴ്ച രാത്രി വീണ്ടും ആരോഗ്യനില വഷളായത്.

തിയേറ്ററിൽ ആളെ നിറച്ച നിരവധി മലയാളം സിനിമകൾക്ക് പിന്നിൽ പ്രവർത്തിച്ച ഛായാഗ്രാഹകനാണ് ഷാജികുമാർ. 2001- ൽ 'ഉത്തമൻ' എന്ന ചിത്രത്തിലൂടെയാണ് സ്വതന്ത്രഛായാഗ്രാഹകനായി അരങ്ങേറിയത്. കാലത്തിനൊപ്പം സ്വയം പുതുക്കിയ ഷാജികുമാർ, മലയാളത്തിലെ മുതിർന്ന സംവിധായകർ മുതൽ പുതുതലമുറയിൽപ്പെട്ടവർക്കൊപ്പം വരെ പ്രവർത്തിച്ചിട്ടുണ്ട്.

Content Highlights: Prominent cinematographer Shajikumar passed away around midnight in Ernakulam. The funeral ceremonies will take place at his residence in Perumbavoor on Tuesday evening around 7 PM. His mortal remains will be kept for public homage at Gokulam Convention Centre in Kaloor until 1 PM. He felt physical discomfort at his hotel room in Alappuzha after wrapping up the shoot for Dileep's movie 'Henok'. Shajikumar debuted as an independent cinematographer with the 2001 film 'Uthaman' and shot numerous hit Malayalam movies.