'പ്രിയപ്പെട്ട ഇമ്മാനുവൽ, സ്വന്തം വീടുപോലുള്ള അനുഭവം നൽകിയതിന് നന്ദി'; ഫ്രഞ്ച് പ്രസിഡന്റുമായുള്ള സൗഹൃദം പുതുക്കി അനിൽ കപൂർ

#മൂവി ഡെസ്ക്
അനിൽ കപൂറും ഫ്രഞ്ച് പ്രസിഡന്റ് ഇമ്മാനുവൽ മക്രോണും | ഫോട്ടോ: Instagram
അനിൽ കപൂറും ഫ്രഞ്ച് പ്രസിഡന്റ് ഇമ്മാനുവൽ മക്രോണും | ഫോട്ടോ: Instagram

ബോളിവുഡ് താരം അനിൽ കപൂറും ഫ്രഞ്ച് പ്രസിഡന്റ് ഇമ്മാനുവൽ മാക്രോണും തമ്മിൽ പാരീസിൽ വെച്ച് കൂടിക്കാഴ്ച നടത്തി. അനിൽ കപൂറിന്റെ യൂറോപ്പ് പര്യടനത്തിനിടെയായിരുന്നു ഇത്. സിനിമ, സംസ്കാരം, നിർമ്മിത ബുദ്ധി (AI), ഊർജ്ജം, വാസ്തുവിദ്യ എന്നീ വിവിധ മേഖലകളെക്കുറിച്ച് ഇരുവരും വിശദമായി സംസാരിച്ചു. മാക്രോണിന്റെ ഇന്ത്യ സന്ദർശനവേളയിലാണ് ഇരുവരും തമ്മിലുള്ള സൗഹൃദം ആരംഭിച്ചത്.

പ്രസിഡന്റ് മാക്രോണിനെ ആദ്യമായി ഇന്ത്യയിൽവെച്ച് കണ്ടുമുട്ടിയപ്പോൾ തന്നെ വർഷങ്ങളായി പരിചയമുള്ളതുപോലെയുള്ള ബന്ധമാണ് ഉണ്ടായതെന്ന് അനിൽ കപൂർ ഓർത്തെടുത്തു. പാരീസിൽ വീണ്ടും കണ്ടുമുട്ടിയപ്പോഴും അതേ ഊഷ്മളത തിരികെ ലഭിച്ചതായി അദ്ദേഹം കുറിച്ചു. വെറുമൊരു ഔപചാരിക കൂടിക്കാഴ്ച എന്നതിലുപരി കലയെയും സംസ്കാരത്തെയും കുറിച്ച് ആഴത്തിലുള്ള ആശയവിനിമയമാണ് ഇരുവരും നടത്തിയത്.

മാക്രോണിന്റെ ഓഫീസിൽ നെപ്പോളിയന്റെ കാലം മുതലുള്ള ചരിത്രപരമായ വസ്തുക്കൾ കണ്ടുകൊണ്ടാണ് ഇരുവരും സംസാരിച്ചത്. ചരിത്രത്തിൽ നിന്നുള്ള പാഠങ്ങൾ മുതൽ വരും തലമുറകൾക്ക് കൈമാറേണ്ട ഭാവിയെക്കുറിച്ചുള്ള ആശയങ്ങൾ വരെ ഈ കൂടിക്കാഴ്ചയിൽ ചർച്ചയായി. ഇത് തികച്ചും അർത്ഥവത്തായതും സമ്പന്നവുമായ ഒരു ആശയവിനിമയമായിരുന്നുവെന്ന് അനിൽ കപൂർ വ്യക്തമാക്കി.

"ഞാൻ ആദ്യമായി ഫ്രഞ്ച് പ്രസിഡന്റ് ഇമ്മാനുവൽ മാക്രോണിനെ ഇന്ത്യയിൽ വെച്ച് കണ്ടുമുട്ടിയപ്പോൾ, ഞങ്ങളുടെ സംഭാഷണം വളരെ ഹൃദ്യമായിരുന്നു. വർഷങ്ങളായി പരസ്പരം അറിയുന്നതുപോലെയാണ് എനിക്ക് തോന്നിയത്. പാരീസിൽ വെച്ച് അദ്ദേഹത്തെ വീണ്ടും കണ്ടുമുട്ടിയപ്പോഴും അതേ സ്നേഹം അനുഭവപ്പെട്ടു. ചരിത്രപാഠങ്ങൾ മുതൽ ഞങ്ങളുടെ മക്കളും പേരക്കുട്ടികളും അനുഭവിക്കാൻ പോകുന്ന ഭാവി വരെ നീണ്ട, അങ്ങേയറ്റം അറിവ് പകരുന്ന ഒരു കൂടിക്കാഴ്ചയായിരുന്നു അത്. " അനിൽ കപൂർ എഴുതി.

പാരീസിൽ തനിക്കും തന്റെ അനന്തരവനും നൽകിയ ആതിഥ്യമര്യാദയ്ക്ക് അനിൽ കപൂർ ഫ്രഞ്ച് പ്രസിഡന്റിന് നന്ദി രേഖപ്പെടുത്തി. മാക്രോണിന്റെ സ്നേഹത്തെയും സൗഹൃദത്തെയും എടുത്തുപറഞ്ഞ അദ്ദേഹം, ഇമ്മാനുവൽ മാക്രോണിനെ വീണ്ടും ഇന്ത്യയിലേക്ക് സ്വാഗതം ചെയ്യാൻ ആഗ്രഹിക്കുന്നുവെന്നും സോഷ്യൽ മീഡിയ പോസ്റ്റിൽ പങ്കുവെച്ചു. സന്ദർശനത്തിന്റെ ചിത്രങ്ങളും അനിൽ കപൂർ പോസ്റ്റ് ചെയ്തിട്ടുണ്ട്.

പാരീസ് സന്ദർശനത്തിന് ഏതാനും ദിവസങ്ങൾക്കു മുൻപ് ഇറ്റലിയിലെ ഫ്ലോറൻസിൽ ലളിത് മോദി, സഞ്ജയ് കപൂർ, ചങ്കി പാണ്ഡെ എന്നിവർക്കൊപ്പം അനിൽ കപൂർ സമയം ചെലവഴിച്ചിരുന്നു. ആലിയ ഭട്ട് പ്രധാന വേഷത്തിലെത്തിയ ആൽഫ (Alpha) എന്ന ചിത്രത്തിലാണ് അനിൽ കപൂർ അവസാനമായി അഭിനയിച്ചത്

Content Highlights: Bollywood actor Anil Kapoor met French President Emmanuel Macron in Paris—shortly after reuniting with Lalit Modi, Sanjay Kapoor, and Chunky Panday in Florence—engaging in wide-ranging discussions covering cinema, culture, artificial intelligence, energy, and architecture, while sharing warm moments and photos from the President's historic office on Instagram.