നടി അനന്യ രാജ് അന്തരിച്ചു, മരണം ഉറക്കത്തിനിടെ, ഒരുമാസത്തിനുശേഷം വിവരം പുറത്തുവിട്ട് കുടുംബം

യുവ ചലച്ചിത്ര നടി അനന്യ രാജ് (27) അന്തരിച്ചു. ജൂലൈ 15-ന് പുലർച്ചെ ഉറക്കത്തിൽ സമാധാനപരമായാണ് മരണം സംഭവിച്ചതെന്ന് ഔദ്യോഗിക ഇൻസ്റ്റാഗ്രാം അക്കൗണ്ടിൽ കുടുംബം പങ്കുവെച്ച പ്രസ്താവനയിൽ സ്ഥിരീകരിച്ചു. ഒരു വർഷത്തിലേറെയായി നീണ്ടുനിന്ന ശാരീരികവും മാനസികവുമായ അസ്വസ്ഥതകളോട് ധീരമായി പോരാടിയ ശേഷമാണ് യുവനടിയുടെ ഈ അപ്രതീക്ഷിത വിയോഗം.

അനന്യയുടെ മരണവാർത്ത ഒരു മാസത്തിനുശേഷമാണ് കുടുംബം ഔദ്യോഗിക ഇൻസ്റ്റാഗ്രാം അക്കൗണ്ടിലൂടെ സ്ഥിരീകരിച്ചത്. അത്യന്തം ദുഃഖകരമായ ഈ സമയത്ത് കുടുംബത്തിന്റെ സ്വകാര്യത മാനിക്കണമെന്ന് അവർ അഭ്യർത്ഥിച്ചു. അനന്യ കരുത്തുറ്റ മനസ്സുള്ള ഒരു പെൺകുട്ടിയായിരുന്നുവെന്നും ഒരു രാജ്ഞിയെപ്പോലെയാണ് അവൾ ജീവിച്ചതെന്നും അനുസ്മരിച്ച കുടുംബം, അവളില്ലാത്ത ലോകം ശൂന്യമായിരിക്കുമെന്നും വേദനയോടെ പങ്കുവെച്ചു.

മുംബൈയിൽ വളർന്ന അനന്യ രാജ് സംഗീത വീഡിയോകളിലൂടെയും സിനിമകളിലൂടെയുമാണ് വിനോദ വ്യവസായരംഗത്തേക്ക് കടന്നുവരുന്നത്. ഹിന്ദി സിനിമകളിലും പ്രാദേശിക ചലച്ചിത്രങ്ങളിലും ഒരുപോലെ സജീവ സാന്നിധ്യമാകാൻ ചുരുങ്ങിയ കാലം കൊണ്ട് അവർക്ക് സാധിച്ചു. 2016-ൽ പുറത്തിറങ്ങിയ '7 അവേഴ്സ് ടു ഗോ' (7 Hours to Go) എന്ന ചിത്രത്തിലൂടെയാണ് അവർ ബോളിവുഡിൽ അരങ്ങേറ്റം കുറിക്കുന്നത്. പിന്നീട് ബോളിവുഡിൽ നിരവധി ശ്രദ്ധേയമായ ചിത്രങ്ങളിൽ അനന്യ ഭാഗമായി.

2017-ൽ പുറത്തിറങ്ങിയ 'ദി ഫൈനൽ എക്സിറ്റ്' (The Final Exit), 2019-ൽ പുറത്തിറങ്ങിയ ഹൊറർ ചിത്രം 'ഗോസ്റ്റ്' (Ghost) എന്നിവയിലെ കഥാപാത്രങ്ങളിലൂടെ അവർ പ്രേക്ഷക ശ്രദ്ധ പിടിച്ചുപറ്റി.

ഹിന്ദി ചലച്ചിത്രങ്ങൾക്ക് പുറമെ തെന്നിന്ത്യൻ സിനിമകളിലും അനന്യ ശ്രദ്ധേയമായ വേഷങ്ങൾ കൈകാര്യം ചെയ്തിട്ടുണ്ട്. തെലുങ്ക് ചിത്രമായ 'തഗ്ഗെദെ ലെ' (Thaggede Le), 'മദ്രാസി ഗാംഗ്' (Madrasi Gang) എന്നിവ ഇതിൽ പ്രമുഖമാണ്. ശ്രീനിവാസ് രാജു സംവിധാനം ചെയ്ത 2022-ൽ പുറത്തിറങ്ങിയ തെലുങ്ക് സസ്പെൻസ് ത്രില്ലറായ തഗ്ഗെദെ ലെയിൽ നവീൻ ചന്ദ്ര, ദിവ്യ പിള്ള, പി. രവിശങ്കർ എന്നിവർക്കൊപ്പമാണ് അനന്യയും പ്രധാന വേഷത്തിലെത്തിയത്.

Content Highlights: Actor Ananya Raj, known for her roles in films like 7 Hours to Go, Ghost, and Thaggede Le, has passed away peacefully in her sleep at the age of 27 following a year-long battle with physical and mental health issues.