ഈ ദിവസം കാണാൻ എന്റെ അച്ഛനുണ്ടായിരുന്നെങ്കിൽ..; വൈകാരികമായ കുറിപ്പുമായി അജിത്

പത്മ പുരസ്‌കാരം ലഭിച്ചതില്‍ നന്ദി അറിയിച്ച് വൈകാരികമായ കുറിപ്പ് പങ്കുവെച്ച് നടന്‍ അജിത്. സോഷ്യല്‍ മീഡിയയിലൂടെ പുറത്തുവിട്ട പ്രസ്താവനയിലൂടെയാണ് അദ്ദേഹം നന്ദി അറിയിച്ചത്. ഇത്തരമൊരു ബഹുമതിക്ക് രാഷ്ട്രപതി ദ്രൗപതി മുര്‍മുവിനോടും പ്രധാനമന്ത്രി നരേന്ദ്ര മോദിയോടും ഹൃദയംഗമമായ നന്ദി അറിയിക്കുന്നുവെന്ന് അജിത് പറഞ്ഞു.

ഇങ്ങനെയൊരു തലത്തില്‍ അംഗീകരിക്കപ്പെടുന്നത് ശരിക്കും ഒരു പദവി തന്നെയാണ്. രാജ്യത്തിന് നല്‍കിയ സംഭാവനകള്‍ക്ക് ലഭിച്ച ഈ അംഗീകാരത്തിന് താന്‍ ശരിക്കും നന്ദിയുള്ളവനാണ്. അതേസമയം ഈ അം ഗീകാരം വ്യക്തിപരമായ ഒന്നല്ല, മറിച്ച് പലരുടെയും കൂട്ടായ പരിശ്രമത്തിനും പിന്തുണയ്ക്കുമുള്ള ഒരു രേഖയാണെന്ന് താന്‍ മനസ്സിലാക്കുന്നുവെന്നും അജിത് പറഞ്ഞു.

"സിനിമാരം​ഗത്തെ തലമുതിർന്നവരുൾപ്പെടെ എല്ലാവരോടും ആത്മാർത്ഥമായ നന്ദി അറിയിക്കുന്നു. മറ്റുമേഖലകളോടുള്ള എന്റെ അഭിനിവേശം പിന്തുടരുന്നതിലുൾപ്പെടെ നിങ്ങളുടെ പ്രചോദനവും സഹകരണവും പിന്തുണയും എന്റെ യാത്രയിൽ നിർണായക പങ്കുവഹിച്ചിട്ടുണ്ട്.

മദ്രാസ് മോട്ടോർ സ്പോർട്സ് ക്ലബ്, ഫെഡറേഷൻ ഓഫ് മോട്ടോർ സ്പോർട്സ് ക്ലബ്ബ്സ് ഓഫ് ഇന്ത്യ, സ്പോർട്സ് ഡെവലപ്മെന്റ് അതോറിറ്റി ഓഫ് തമിഴ്നാട്, നാഷണൽ റൈഫിൾ അസോസിയേഷൻ ഓഫ് ഇന്ത്യ, ചെന്നൈ റൈഫിൾ ക്ലബ് എന്നിവയ്ക്ക് കായികരംഗത്തെയും കായികതാരങ്ങളുടെ സമൂഹത്തെയും പ്രോത്സാഹിപ്പിച്ചതിന് ഞാൻ നന്ദി പറയുന്നു. സ്നേഹവും പിന്തുണയും നൽകി ശക്തിയുടെ ഉറവിടമായ കുടുംബാംഗങ്ങൾക്കും സുഹൃത്തുക്കൾക്കും നന്ദി പറയുന്നു.

എന്റെ അച്ഛൻ ഈ ദിവസം ഇതു കാണാൻ ഉണ്ടായിരുന്നെങ്കിലെന്ന് ആ​ഗ്രഹിച്ചുപോവുകയാണ്. എങ്കിലും, എന്റെ എല്ലാ കാര്യങ്ങളിലും അച്ഛന്റെ ആത്മാവും പൈതൃകവും നിലനിൽക്കുന്നു എന്നതിൽ അദ്ദേഹം അഭിമാനിക്കുമെന്ന് ഞാൻ കരുതുന്നു. അമ്മയുടെ നിരുപാധികമായ സ്നേഹത്തിനും എനിക്ക് ആകാൻ കഴിയുന്നതെല്ലാമാകാൻ എന്നെ പ്രാപ്തമാക്കിയ ത്യാഗങ്ങൾക്കും ഞാൻ നന്ദി പറയുന്നു. ഏകദേശം 25 അത്ഭുതകരമായ വർഷങ്ങളിലെ എന്റെ ഭാര്യയും കൂട്ടാളിയുമായ ശാലിനിയോട്: നിങ്ങളുടെ പങ്കാളിത്തം എന്റെ വിജയത്തിന്റെ സന്തോഷവും മൂലക്കല്ലുമാണ്. എന്റെ മക്കളായ അനൗഷ്കയ്ക്കും ആദ്വിക്കിനും: നിങ്ങൾ എന്റെ അഭിമാനവും എന്റെ ജീവിതത്തിന്റെ വെളിച്ചവുമാണ്, നന്നായി ചെയ്യാനും ശരിയായി ജീവിക്കാനും ഒരു മാതൃക വെക്കാൻ നിങ്ങളെന്നെ പ്രേരിപ്പിക്കുന്നു.

ആരാധകരോടും അഭ്യുദയകാംക്ഷികളോടും അവസാനമായി ഒരു കാര്യം പറയുന്നു. നിങ്ങളുടെ അചഞ്ചലമായ സ്നേഹവും പിന്തുണയുമാണ് എന്റെ അഭിനിവേശത്തെയും സമർപ്പണത്തെയും ഊട്ടിയുറപ്പിച്ചത്. ഈ അവാർഡ് എന്റേത് പോലെ തന്നെ നിങ്ങളുടേതുമാണ്. ഈ അവിശ്വസനീയമായ ബഹുമതിക്കും ഈ യാത്രയുടെ ഭാഗമായതിനും നിങ്ങൾക്കെല്ലാവർക്കും നന്ദി. സത്യസന്ധതയോടും അഭിനിവേശത്തോടും കൂടി സേവനം തുടരാൻ ഞാൻ പ്രതിജ്ഞാബദ്ധനാണ്. നിങ്ങളുടെ സ്വന്തം യാത്രകളിൽ നിങ്ങൾക്കെല്ലാവർക്കും അതുപോലെ ആശംസകൾ നേരുന്നു." അജിത് അവസാനിപ്പിക്കുന്നു.

Content Highlights: Actor Ajith Kumar expresses humility on receiving the Padma Award