‘പ്രാക്ക്’; സംഗീത് പ്രതാപ്-ഷറഫുദ്ദീൻ ചിത്രം ‘ഇറ്റ്സ് എ മെഡിക്കൽ മിറക്കിൾ’ രണ്ടാം ഗാനം പുറത്ത്

സംഗീത് പ്രതാപ്, ഷറഫുദ്ദീൻ എന്നിവരെ കേന്ദ്ര കഥാപാത്രങ്ങളാക്കി നവാഗതനായ ശ്യാമിൻ ഗിരീഷ് ഒരുക്കുന്ന 'ഇറ്റ്‌സ് എ മെഡിക്കൽ മിറക്കിൾ' എന്ന ചിത്രത്തിലെ രണ്ടാം ഗാനം പുറത്ത്. 'പ്രാക്ക്' എന്ന ടൈറ്റിലോടെ എത്തിയ ഗാനത്തിന് സംഗീതം പകർന്നത് മുജീബ് മജീദ് ആണ്. ഗാനം ആലപിച്ചത് ബിന്ദു പങ്കജ്, നീരജ് രമേശ് എന്നിവരും കോറസ് ഗായകരും ചേർന്നാണ്. വരികൾ രചിച്ചത് ശ്യാം മുരളീധരൻ, നിലീൻ സാന്ദ്ര.

ചിത്രത്തിന്റെ ആഗോള റിലീസ് സെപ്റ്റംബർ 18-ന്. ഡോ. പോൾസ് എന്റർടെയ്ൻമെന്റ്, ഡ്രീം ബിഗ് ഫിലിംസ് എന്നിവയുടെ ബാനറിൽ ഡോ. പോൾ വർഗീസ്, സുജിത് ജെ. നായർ എന്നിവർ ചേർന്നാണ് ചിത്രം നിർമിക്കുന്നത്.

അഖില ഭാർഗവൻ നായികാവേഷം ചെയ്യുന്ന ചിത്രത്തിന്റെ കഥ, തിരക്കഥ, സംഭാഷണം എന്നിവ രചിച്ചത് നടി നിലീൻ സാന്ദ്രയാണ്. നേരത്തെ പുറത്തുവന്ന, ചിത്രത്തിന്റെ ആദ്യ ടീസർ, ആദ്യഗാനം എന്നിവ മികച്ച പ്രേക്ഷക പ്രതികരണം നേടിയിരുന്നു.

'കാതങ്ങൾ ദൂരെ' എന്ന വരികളോടെ ആരംഭിക്കുന്ന ആദ്യഗാനത്തിന് സാമൂഹിക മാധ്യമങ്ങളിൽ മികച്ച സ്വീകരണമാണ് ലഭിച്ചത്. മെലഡിയായി ഒരുക്കിയ ഗാനത്തിൽനിന്ന് ഏറെ വ്യത്യസ്തമായ രീതിയിലാണ് രണ്ടാം ഗാനമായ 'പ്രാക്ക്' ഒരുക്കിയിരിക്കുന്നത് എന്നത് ശ്രദ്ധേയമാണ്. ചിത്രത്തിന്റെ മൂഡ് പ്രേക്ഷകരിലെത്തിക്കുന്ന തരത്തിലാണ് രണ്ടാം ഗാനം അവതരിപ്പിച്ചിരിക്കുന്നത്.

കോമയിൽനിന്ന് ഉണർന്നെഴുന്നേൽക്കുന്ന സംഗീത് പ്രതാപ് കഥാപാത്രത്തിന് സൂപ്പർഹിയറിങ് എന്ന ശക്തി കിട്ടുന്നത് ആണ് ചിത്രത്തിന്റെ കഥാതന്തു എന്നാണ് ടീസർ നൽകുന്ന സൂചന. അസാധാരണമായ കേൾവിശക്തി സാധാരണക്കാരന് ലഭിക്കുന്നതോടെ സംഭവിക്കുന്ന കാര്യങ്ങളാണ് അതീവരസകരമായും ആവേശകരമായും ചിത്രത്തിലൂടെ പ്രേക്ഷകരുടെ മുന്നിലെത്തുന്നത് എന്നാണ് റിപ്പോർട്ട്. ഏറെ കൗതുകത്തോടെയാണ് പ്രേക്ഷകർ ചിത്രം കാത്തിരിക്കുന്നത്.

ഏറെ വ്യത്യസ്തമായ ലുക്കിലാണ് കേന്ദ്ര കഥാപാത്രങ്ങളായ ഷറഫുദ്ദീൻ, സംഗീത് പ്രതാപ് എന്നിവർ ചിത്രത്തിലെത്തുന്നത്. ചിത്രത്തിന്റെ കഥാപശ്ചാത്തലം, കഥാപാത്രങ്ങൾ എന്നിവയെ കുറിച്ച് പ്രേക്ഷകരിൽ വലിയ ആകാംഷയും കൗതുകവും ആണ് ടീസറും പോസ്റ്ററുകളും ഗാനങ്ങളും നൽകുന്നത്. സംഗീത് പ്രതാപ്, ഷറഫുദ്ദീൻ എന്നിവർ കൂടാതെ, കോട്ടയം നസീർ, ആനന്ദ് മന്മഥൻ, കിരൺ പീതാംബരൻ, പാർവതി ആർ. കൃഷ്ണ തുടങ്ങി വലിയ താരനിര ചിത്രത്തിൽ അണിനിരക്കുന്നുണ്ട്.

ഉയർന്ന നിലവാരത്തിലുള്ള സാങ്കേതിക പൂർണതയോടെ ഒരുക്കിയ ചിത്രം, ശബ്ദമിശ്രണത്തിലും സൗണ്ട് ഡിസൈനിലുമെല്ലാം പുതിയൊരു ബെഞ്ച്മാർക്ക് സൃഷ്ടിക്കും എന്നാണ് പ്രതീക്ഷിക്കപ്പെടുന്നത്. ശബ്ദത്തിന്റെ ഗംഭീരമായ ഉപയോഗത്തിന് ഏറെ പ്രാധാന്യം നൽകിയാണ് ചിത്രം ഒരുക്കിയിരിക്കുന്നത് എന്നും അണിയറ പ്രവർത്തകർ അറിയിച്ചിട്ടുണ്ട്.

ചിത്രത്തിന്റെ മ്യൂസിക് അവകാശം പ്രമുഖ സംഗീത- ഓഡിയോ ലേബൽ ആയ തിങ്ക് മ്യൂസിക് ആണ് സ്വന്തമാക്കിയത്. ചിത്രത്തിന്റെ ഓവർസീസ് വിതരണാവകാശം ദി പ്ലോട്ട് പിക്‌ചേഴ്‌സ് സ്വന്തമാക്കിയിരുന്നു. കേരളത്തിൽ വിതരണം ചെയ്യുന്നത് ഡ്രീം ബിഗ് ഫിലിംസ്.

ഛായാഗ്രഹണം: അഖിൽ സേവ്യർ, എഡിറ്റർ: രാകേഷ് ചെറുമഠം, സംഗീതം: മുജീബ് മജീദ്, സൗണ്ട് ഡിസൈൻ: നിക്‌സൺ ജോർജ്, മേക്കപ്പ്: റോണക്‌സ് സേവ്യർ, വസ്ത്രങ്ങൾ: ആരതി ഗോപാൽ, പ്രൊഡക്ഷൻ കൺട്രോളർ: മനോജ് പൂങ്കുന്നം, കലാസംവിധാനം: അപ്പുണ്ണി സാജൻ, ചീഫ് അസോസിയേറ്റ് ഡയറക്ടർ: വിഷ്ണു ദേവ്, അജിത് ജോസ്, വി.എഫ്.എക്‌സ്: പ്രൊമൈസ് വി.എഫ്.എക്‌സ്, മാർജ്ജാര വി.എഫ്.എക്‌സ്, അസോസിയേറ്റ് ഡയറക്ടർ: മുബീൻ റാഫി, പ്രൊജക്ട് ഡിസൈനർ: അമൃത മോഹൻ, അസോസിയേറ്റ് ക്യാമറാമാൻ: വിശോക് കളത്തിൽ, ഫിനാൻസ് കൺട്രോളർ: ബിബിൻ സേവ്യർ, സ്റ്റിൽസ്: സിനറ്റ് സേവ്യർ, അസിസ്റ്റന്റ് ഡയറക്ടേഴ്‌സ്: ആൽബിൻ ഷാജി, ഷഫീഖ്, ഡിസൈൻസ്: യെല്ലോ ടൂത്ത്‌സ്, ഡിസ്ട്രിബൂഷൻ: ഡ്രീം ബിഗ് ഫിലിംസ്, ഡിജിറ്റൽ മാർക്കറ്റിങ്: ഒബ്സ്‌ക്യൂറ, പി.ആർ.ഒ: ശബരി.

Content Highlights: The second song titled 'Praak' from 'Its A Medical Miracle' has been released. Composed by Mujeeb Majeed, the song features vocals by Bindu Pankaj, Neeraj Ramesh, and chorus singers. The film is directed by debutant Shyamin Gireesh and written by Nileen Sandra. Sangeeth Prathap and Sharafudheen play the lead roles in the movie. The film is scheduled for a worldwide release on September 18.