94-ാം വയസിലും സിനിമ സംവിധാനം ചെയ്ത സിംഗീതം ശ്രീനിവാസ റാവു, അവസാന ശ്വാസവും സിനിമയ്ക്കായി നൽകിയ ഇതിഹാസം

ജീവിതാവസാനംവരെ സിനിമയ്ക്കായി ജീവിതം ഉഴിഞ്ഞുവെച്ച ചലച്ചിത്രകാരൻ, അതായിരുന്നു അന്തരിച്ച സംവിധായകൻ സിംഗീതം ശ്രീനിവാസ റാവു. വാർധക്യ സഹജമായ അസുഖങ്ങളെത്തുടർന്ന് ചികിത്സയിലായിരുന്ന അദ്ദേഹം ശനിയാഴ്ച രാത്രി ചെന്നൈയിലായിരുന്നു അന്തരിച്ചത്. ഏതാണ്ട് നാലുമാസം മുൻപാണ് 94-കാരനായ റാവു സംവിധാനം ചെയ്ത അവസാന ചിത്രമായ സിംഗ് ഗീതം പുറത്തിറങ്ങിയത്. 60 ചിത്രങ്ങൾ റാവു സംവിധാനം ചെയ്തിട്ടുണ്ട്. തെലുങ്ക്, കന്നഡ, തമിഴ്, ഹിന്ദി, ഇംഗ്ലീഷ് എന്നീ ഭാഷകളിലായി അദ്ദേഹം ചിത്രങ്ങൾ ഒരുക്കി. ഇതിനുപുറമേ കഥയെഴുത്ത്, നിർമ്മാണം, സംഗീതസംവിധാനം, അഭിനയം എന്നിവയിലും തിളങ്ങി.

ആദ്യകാല ജീവിതം

1931 സെപ്റ്റംബർ 21നാണ് റാവു ജനിച്ചത്. അദ്ദേഹത്തിന്റെ ജന്മസ്ഥലത്തെക്കുറിച്ച് വ്യത്യസ്ത റിപ്പോർട്ടുകളുണ്ട്. ഒന്ന് ഗുഡൂർ ആണെന്നും മറ്റൊന്ന് ഉദയഗിരിയാണെന്നും പറയുന്നു. രണ്ട് സ്ഥലങ്ങളും ഇന്നത്തെ ആന്ധ്രാപ്രദേശിലാണ് സ്ഥിതി ചെയ്യുന്നത്. പിതാവ് രാമചന്ദ്ര റാവു ഒരു ഹെഡ്മാസ്റ്റർ ആയിരുന്നു. മാതാവ് ശകുന്തള ബായ് വയലിൻ വിദഗ്ധയായിരുന്നു. ചെന്നൈയിലെ പ്രസിഡൻസി കോളേജിൽ നിന്നാണ് റാവു ഭൗതികശാസ്ത്രം പഠിച്ചത്. സംഗീതം അദ്ദേഹത്തിന്റെ കുടുംബത്തിൽ വേരൂന്നിയ ഒന്നായിരുന്നു. പിന്നീട് അദ്ദേഹം തന്റെ ചില ചിത്രങ്ങൾക്ക് സംഗീതസംവിധാനം നിർവഹിച്ചു. 1950-കളിൽ അദ്ദേഹം ഒരു അന്താരാഷ്ട്ര ചലച്ചിത്രമേളയിൽ പങ്കെടുത്തു. അതാണ് സിനിമയെക്കുറിച്ചുള്ള തന്റെ കാഴ്ചപ്പാടിനെ മാറ്റിമറിച്ച സംഭവമായി അദ്ദേഹം പറഞ്ഞിട്ടുള്ളത്. ജീവിതകാലം മുഴുവൻ അദ്ദേഹം ലോക സിനിമകൾ വായിക്കുകയും കാണുകയും ചെയ്യുന്നത് തുടർന്നു.

ചലച്ചിത്ര രംഗത്തേക്കുള്ള പ്രവേശനം

സംവിധായകൻ കെ. വി. റെഡ്ഡിയുടെ കീഴിലാണ് റാവു തന്റെ കരിയർ ആരംഭിച്ചത്. ആദ്യം അദ്ദേഹം സംഭാഷണ രചയിതാവായി പ്രവർത്തിച്ചു. പിന്നീട് റെഡ്ഡിയുടെ സഹായിയായി മാറി. ഒരു സഹായി എന്ന നിലയിൽ അദ്ദേഹത്തിന്റെ ആദ്യ ചിത്രം ദൊംഗ രാമുഡു (Donga Ramudu) ആയിരുന്നു. അക്കിനേനി നാഗേശ്വര റാവു ആയിരുന്നു ചിത്രത്തിലെ നായകൻ. ഇന്ത്യൻ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഇന്ന് അതിന്റെ തിരക്കഥ വിദ്യാർത്ഥികളെ പഠിപ്പിക്കുന്നുണ്ട്. 1957-ൽ ‘മായാബസാർ’ എന്ന ചിത്രത്തിലും 1961-ൽ ‘ജഗദേക വീരുനി കഥ’ എന്ന ചിത്രത്തിലും അദ്ദേഹം സഹായിയായി പ്രവർത്തിച്ചു. 1970-ൽ ‘സംസ്കാര’ എന്ന കന്നഡ ചിത്രത്തിന്റെ എക്സിക്യൂട്ടീവ് ഡയറക്ടറായിരുന്നു അദ്ദേഹം. പട്ടാഭിരാമ റെഡ്ഡിയാണ് ചിത്രം സംവിധാനം ചെയ്തത്. മികച്ച ഫീച്ചർ ചിത്രത്തിനുള്ള രാഷ്ട്രപതിയുടെ സ്വർണ്ണപ്പതക്കം ഈ ചിത്രം നേടി.

ആദ്യകാല ചിത്രങ്ങൾ

1972-ൽ തെലുങ്ക് ചിത്രമായ ‘നീതി നിജായിതി’യിലൂടെ റാവു സംവതന്ത്ര സംവിധായകനായി അരങ്ങേറ്റംകുറിച്ചു തുടർന്ന് നിരവധി തെലുങ്ക് ചിത്രങ്ങൾ അദ്ദേഹത്തിന്റെ സംവിധാനത്തിൽ പുറത്തിറങ്ങി. ‘ദിക്കത്ര പാർവതി’, ‘അമേരിക്ക അമ്മായി’, ‘താരം മാറിന്ദി’, ‘പന്തുലമ്മ’, ‘സൊമ്മോകഡിധി സൊക്കോകഡിധി’ എന്നിവ അതിൽ ഉൾപ്പെടുന്നു. അവസാനത്തെ മൂന്ന് ചിത്രങ്ങൾ 1977-നും 1979-നും ഇടയിലാണ് പുറത്തിറങ്ങിയത്. 1980-ൽ അദ്ദേഹം ‘പിള്ള സമീന്ദാർ’ (Pilla Zamindar) എന്ന ചിത്രം സംവിധാനം ചെയ്തു. അക്കിനേനി നാഗേശ്വര റാവു ആയിരുന്നു ഇതിൽ പ്രധാന വേഷത്തിൽ എത്തിയത്. റാവുവിന്റെ ഭാര്യ ലക്ഷ്മി കല്യാണിയാണ് ഈ ചിത്രത്തിന്റെ കഥയെഴുതിയത്.

കന്നഡ ചിത്രങ്ങൾ

1982-ൽ റാവു ഹാലു ജേനു എന്ന ചിത്രത്തിലൂടെ കന്നഡ സിനിമയിലും ശ്രീനിവാസ റാവും സാന്നിധ്യമറിയിച്ചു. രാജ്കുമാർ ആയിരുന്നു പ്രധാന വേഷത്തിൽ എത്തിയത്. ചിത്രം വലിയൊരു വിജയമായി മാറി. റാവുവും രാജ്കുമാറും ചേർന്ന് പിന്നീട് ഏഴ് ചിത്രങ്ങൾ ചെയ്തു. അതിൽ നാലെണ്ണം തെലുങ്കിലേക്ക് റീമേക്ക് ചെയ്യപ്പെട്ടു. 1988-ൽ അഭിനയത്തിൽ നിന്ന് ഇടവേള എടുക്കുമെന്ന് രാജ്കുമാർ പ്രഖ്യാപിച്ചു. തുടർന്ന് റാവു തമിഴ് ചിത്രങ്ങളിലേക്ക് ശ്രദ്ധ തിരിച്ചു. അവയിൽ ഭൂരിഭാഗം ചിത്രങ്ങളിലും നായകനായത് കമൽഹാസൻ ആയിരുന്നു.

1987-ൽ കന്നഡയിലെ മികച്ച സംവിധായകനുള്ള ഫിലിംഫെയർ അവാർഡ് റാവുവിന് ലഭിച്ചു. മൂന്ന് തവണ കർണാടക സംസ്ഥാന ചലച്ചിത്ര പുരസ്കാരവും അദ്ദേഹം നേടിയിട്ടുണ്ട്. അതിൽ രണ്ടെണ്ണം തിരക്കഥയ്ക്കും ഒരെണ്ണം മികച്ച ചിത്രത്തിനുമായിരുന്നു.

മയൂരി

1985-ലാണ് ‘മയൂരി’ പുറത്തിറങ്ങിയത്. നർത്തകി സുധാ ചന്ദ്രന്റെ ജീവിത കഥയാണ് ചിത്രം പറയുന്നത്. കാൽ നഷ്ടപ്പെട്ടതിന് ശേഷം അവർ വീണ്ടും നൃത്തരംഗത്തേക്ക് തിരിച്ചുവന്നതാണ് ചിത്രത്തിന്റെ കഥ. ചിത്രം 14 നന്ദി പുരസ്കാരങ്ങൾ നേടി. അതൊരു റെക്കോർഡായിരുന്നു. അതിലൊന്ന് മികച്ച ഫീച്ചർ ചിത്രത്തിനുള്ളതായിരുന്നു. അതേ വർഷം തന്നെ തെലുങ്കിലെ മികച്ച സംവിധായകനുള്ള ഫിലിംഫെയർ അവാർഡും റാവുവിന് ലഭിച്ചു. ബൃന്ദാവനം (Brundavanam) എന്ന ചിത്രത്തിന്റെ തിരക്കഥയ്ക്ക് അദ്ദേഹത്തിന് നന്ദി പുരസ്കാരവും ലഭിച്ചിട്ടുണ്ട്.
കമൽഹാസനൊപ്പമുള്ള ചിത്രങ്ങൾ

റാവുവും കമൽഹാസനും നിരവധി തവണ ഒരുമിച്ച് പ്രവർത്തിച്ചിട്ടുണ്ട്. 1987-ൽ പുറത്തിറങ്ങിയ ‘പുഷ്പക വിമാന’ ആണ് ഇവരുടെ കൂട്ടത്തിൽ ഏറ്റവും പ്രശസ്തമായ ചിത്രം. ചിത്രത്തിൽ സംഭാഷണങ്ങളില്ല. ജോലിയില്ലാത്ത ഒരു ബിരുദധാരിയായാണ് കമൽഹാസൻ വേഷമിട്ടത്. ഇയാൾ ഒരു ഹോട്ടലിൽ ധനികനായ അതിഥിയാണെന്ന് നടിക്കുന്നു. അമല അക്കിനേനിയാണ് മറ്റൊരു പ്രധാന വേഷം ചെയ്തത്. റാവു തന്നെയാണ് ചിത്രം എഴുതി, നിർമ്മിച്ച്, സംവിധാനം ചെയ്തത്. ഇന്ത്യൻ സിനിമയിലെ എക്കാലത്തെയും മികച്ച ഹാസ്യ ചിത്രങ്ങളിൽ ഒന്നായാണ് പല പ്രേക്ഷകരും ഇന്നും ഇതിനെ കണക്കാക്കുന്നത്. ഐ.എം.ഡി.ബി (IMDb)-യിൽ ഇതിന് 8.6 റേറ്റിംഗ് ഉണ്ട്.

രാജ പാർവൈ, അപൂർവ സഗോദരർകൾ (Apoorva Sagodharargal), മൈക്കിൾ മദന കാമ രാജൻ തുടങ്ങിയവ കമൽഹാസനൊപ്പമുള്ള അദ്ദേഹത്തിന്റെ മറ്റ് ചിത്രങ്ങളാണ്. മഗളിർ മട്ടും, കാതലാ കാതലാ എന്നീ ചിത്രങ്ങളും അവർ ഒരുമിച്ചു ചെയ്തു. മഗളിർ മട്ടും എന്ന ചിത്രത്തിൽ റാവു അഭിനയിച്ചിട്ടുമുണ്ട്. 2005-ൽ കമൽഹാസൻ നായകനായ മുംബൈ എക്സ്പ്രസ് അദ്ദേഹം സംവിധാനം ചെയ്തു.

ആദിത്യ 369

1991-ൽ റാവു ‘ആദിത്യ 369’ എന്ന ചിത്രം സംവിധാനം ചെയ്തു. നന്ദമുരി ബാലകൃഷ്ണയായിരുന്നു ഇതിൽ നായകൻ. ടൈം ട്രാവൽപ്രമേയമാക്കിയുള്ള ഒരു ചിത്രമാണിത്. റാവു തന്നെയാണ് ചിത്രത്തിന്റെ കഥ എഴുതിയത്. 1994-ൽ ബാലകൃഷ്ണയോടൊപ്പം ചേർന്ന് അദ്ദേഹം ഭൈരവ ദീപം എന്ന ചിത്രവും ചെയ്തു. ഈ ചിത്രത്തിലൂടെ മികച്ച സംവിധായകനുള്ള നന്ദി പുരസ്കാരം അദ്ദേഹത്തിന് ലഭിച്ചു. 2001-ൽ അദ്ദേഹം ലിറ്റിൽ ജോൺ (Little John) എന്ന ചിത്രവും സംവിധാനം ചെയ്തു. ഇതൊരു ഇംഗ്ലീഷ് ഭാഷാ ചിത്രമായിരുന്നു. അദ്ദേഹം തന്നെയാണ് ഇത് എഴുതി സംവിധാനം ചെയ്തത്.

പുരസ്കാരങ്ങൾ

രണ്ട് ദേശീയ ചലച്ചിത്ര പുരസ്കാരങ്ങൾ റാവു നേടിയിട്ടുണ്ട്. അഞ്ച് നന്ദി പുരസ്കാരങ്ങളും അദ്ദേഹത്തിന് ലഭിച്ചു. മൂന്ന് കർണാടക സംസ്ഥാന ചലച്ചിത്ര പുരസ്കാരങ്ങളും അദ്ദേഹം സ്വന്തമാക്കി. കൂടാതെ, മൂന്ന് സൗത്ത് ഫിലിംഫെയർ അവാർഡുകളും അദ്ദേഹം നേടിയിട്ടുണ്ട്. 2011-ൽ ഫിലിം ഫെഡറേഷൻ ഓഫ് ഇന്ത്യ അദ്ദേഹത്തിന് ആജീവനാന്ത സംഭാവനയ്ക്കുള്ള പുരസ്കാരം നൽകി ആദരിച്ചു.

അവസാന ചിത്രം

ഏകദേശം പത്ത് വർഷത്തോളമായി റാവു ഫീച്ചർ ചിത്രങ്ങളൊന്നും സംവിധാനം ചെയ്തിരുന്നില്ല. 2026 ഫെബ്രുവരിയിൽ അദ്ദേഹം ഒരു പുതിയ ചിത്രം പ്രഖ്യാപിച്ചു. ‘SSR61’ എന്നായിരുന്നു ചിത്രത്തിന്റെ പേര്. വൈജയന്തി മൂവീസിന്റെ ബാനറിൽ നാഗ് അശ്വിനാണ് ഇത് നിർമ്മിച്ചത്. പിന്നീട് ഈ ചിത്രം ‘സിംഗ് ഗീതം’ എന്ന പേരിൽ അറിയപ്പെട്ടു. ഇതൊരു മ്യൂസിക്കൽ ചിത്രമായിരുന്നു. ചിത്രത്തിലെ കഥാപാത്രങ്ങൾ തങ്ങളുടെ സംഭാഷണങ്ങളെല്ലാം പാട്ടുകളിലൂടെയാണ് അവതരിപ്പിക്കുന്നത്. ദേവി ശ്രീ പ്രസാദാണ് ചിത്രത്തിന് സംഗീതം നൽകിയത്.

40 വർഷങ്ങൾക്ക് മുമ്പാണ് റാവു ആദ്യമായി ഈ ആശയം ചിന്തിച്ചത്. പാടാൻ കഴിയുന്ന അഭിനേതാക്കളെയാണ് അദ്ദേഹം ചിത്രത്തിനായി തിരഞ്ഞെടുത്തത്. അയാൻ ഖാൻ, അഹില്യ ബംറു, ശാലിനി കൊണ്ഡേപുടി എന്നിവരാണ് പ്രധാന വേഷങ്ങളിൽ അഭിനയിച്ചത്. 2026 ജൂണിൽ ചിത്രം റിലീസ് ചെയ്തു. റാവുവിന് അപ്പോൾ 94 വയസ്സായിരുന്നു. ഒരു ചിത്രം പൂർത്തിയാക്കിയ ഏറ്റവും പ്രായം കൂടിയ സംവിധായകരിൽ ഒരാളായാണ് റിപ്പോർട്ടുകൾ അദ്ദേഹത്തെ വിശേഷിപ്പിച്ചത്.

2022-ൽ അദ്ദേഹം പ്രതിബിംബാലു എന്ന ചിത്രം പുറത്തിറക്കിയിരുന്നു. 1982-ൽ ചിത്രീകരിച്ചതായിരുന്നു അത്. അക്കിനേനി നാഗേശ്വര റാവുവും കെ. എസ്. പ്രകാശ റാവുവുമായിരുന്നു പ്രധാനവേഷങ്ങളിൽ. 40 വർഷത്തോളം റിലീസ് ചെയ്യാതെയിരുന്ന ചിത്രമായിരുന്നു ഇത്.
സിനിമാ സംബന്ധമായ വാർത്തകളും ആർട്ടിക്കിളുകളും വായിക്കാനും വീഡിയോകൾ കാണാനും വാട്‌സാപ്പ് ഗ്രൂപ്പിൽ ജോയിൻ ചെയ്യൂ: https://mbiurl.in/movies

Content Highlights: Renowned Indian filmmaker Singeetham Srinivasa Rao, who directed around 60 legendary films across Telugu, Tamil, Kannada, Hindi, and English including masterpieces like Pushpaka Vimana, Apoorva Sagodharargal, and Aditya 369, passed away in Chennai at the age of 94.