ഋത്വിക്ക് ഘട്ടക്കിന്റെ ലോകം, മാസ്റ്റര്‍പീസുകളുടെ സംവിധായകന് ജന്മശതാബ്ദി

കലയിലുപരി ജീവിതം പറയുന്ന, പകര്‍ത്തിയവയാണ് ഋത്വിക്ക് ഘട്ടക്കിന്റെ ചിത്രങ്ങള്‍. സിനിമ ആന്‍ഡ് ഐ എന്ന അദ്ദേഹത്തിന്റെ പുസ്തകവും ജീവിതമെന്ന സമസ്യയ്ക്ക് ഉത്തരം തേടുകയാണ്. ഇന്ത്യന്‍ സിനിമയിലെ എക്കാലത്തേയും മഹാരഥന്മാരായ സംവിധായക ത്രയത്തിലെ (റേ, സെന്‍, ഘട്ടക്) മൂന്നാമനായിരുന്ന ഋത്വിക്ക് ഘട്ടക്കിന്റെ ജന്മശതാബ്ദിയാണ് നവംബര്‍ നാല്. പ്രായം കൊണ്ട് സത്യജിത് റേയുടേയും മൃണാള്‍ സെന്നിന്റേയും പുറകിലായ ഋത്വിക്ക് ഘട്ടക്കിന്റെ ജന്മശതാബ്ദി എത്തുന്നത് അവരിരുവരുടേയും ശതാബ്ദികള്‍ക്ക് ശേഷംതന്നെ. പക്ഷേ, ജീവിതത്തില്‍ നിന്ന് ആദ്യം തിരോധാനം ചെയ്തത് ഘട്ടക്കായിരുന്നു. മൂവരും സമകാലികരായിരുന്നുവെങ്കിലും ജീവിതകാലത്ത് സത്യജിത് റേയെ പോലെയോ മൃണാള്‍ സെന്നിനെ പോലെയോ പ്രശസ്തനായിരുന്നില്ല ഋത്വിക്ക് ഘട്ടക്ക്. എന്നാല്‍ 1976ല്‍ 51-ാം വയസ്സില്‍ കാലയവനികയ്ക്കുള്ളില്‍ മറഞ്ഞതിനുശേഷം അദ്ദേഹം ഇന്ത്യന്‍ സിനിമയിലെ ഒരു കള്‍ട്ട് ഫിഗറായി മാറുകയായിരുന്നു. പുണെ ഫിലിം ഇന്‍സ്റ്റിറ്റ്യൂട്ടിലെ വൈസ് പ്രിന്‍സിപ്പലായിരുന്ന അദ്ദേഹത്തിന് വിദ്യാര്‍ഥികള്‍ക്കും പൂര്‍വവിദ്യാര്‍ഥികള്‍ക്കും ഇടയില്‍ എന്നും വലിയ ആരാധകരുണ്ടായിരുന്നു.

അടൂര്‍ ഗോപാലകൃഷ്ണന്‍, മണി കൗള്‍, കുമാര്‍ സാഹ്നി തുടങ്ങിയവരെല്ലാം ഋത്വിക്ക് ഘട്ടക്കിന്റെ വിദ്യാര്‍ഥികളായിരുന്നു. സത്യജിത് റേയെ ഘട്ടക്കിന്റെ ശത്രുവായി കാണുന്ന പലര്‍ക്കും അറിയാത്ത പ്രധാനപ്പെട്ട ഒരു വസ്തുത അക്കാലത്ത് റേ തന്നെ നിര്‍ബന്ധപൂര്‍വ്വം പറഞ്ഞതുകൊണ്ടാണ് അന്നത്തെ ഐ& ബി മന്ത്രിയായിരുന്ന ഇന്ദിരാഗാന്ധി ഘട്ടക്കിനെ പൂന ഫിലിം ഇന്‍സ്റ്റിറ്റ്യൂട്ടിലെ വൈസ് പ്രിന്‍സിപ്പലായി നിയമിച്ചത്. അന്നാ ജോലി ഘട്ടക്കിന് അത്യന്താപേക്ഷിതമായിരുന്നു.

Content Highlights: Explore the profound life and cinematic genius of Ritwik Ghatak. Discover his impactful films, his book `Cinema and I`, and his enduring legacy on Indian cinema.