പന്ത്രണ്ടിൽ തോറ്റ മനോജ് ശർമ ജീവിതത്തെയും വെള്ളിത്തിരയെയും കീഴടക്കിയ റിയൽലൈഫ് കഥ

ഒന്നിനുപിറകേ ഒന്നായെത്തി പരാജയം രുചിക്കുന്ന ബയോപിക്കുകളും കെട്ടിലും മട്ടിലും ബ്രഹ്‌മാണ്ഡമെന്ന് വിളിച്ചോതിയെത്തി വിജയിച്ച വിരലിലെണ്ണാവുന്ന ചിത്രങ്ങളും. ഇതായിരുന്നു കുറച്ചുനാള്‍ മുമ്പുവരെ ബോളിവുഡ് ബോക്‌സോഫീസിലെ കാഴ്ച. പഠാനും ജവാനും അനിമലും പോലുള്ള ഏതാനും ചിത്രങ്ങള്‍ മാത്രമാണ് 2023-ല്‍ ബോളിവുഡിന് ആശ്വസിക്കാനുള്ള വക നല്‍കിയത്. അക്കൂട്ടത്തില്‍ ഒരു കുഞ്ഞുചിത്രം, ആര്‍ക്കും ഭീഷണിയാവില്ലെന്ന് ഏവരും വിശ്വസിച്ചിരുന്നൊരു ചിത്രം ഹിന്ദി സിനിമാലോകത്ത് പുതിയചരിത്രം സൃഷ്ടിച്ചു. വിധു വിനോദ് ചോപ്ര രചനയും നിര്‍മാണവും സംവിധാനവും നിര്‍വഹിച്ച 12ത് ഫെയില്‍ ആയിരുന്നു ആ സൈലന്റ് ഹിറ്റ് ചിത്രം. വിക്രാന്ത് മാസിയും മേധാ ശങ്കറുമായിരുന്നു പ്രധാനവേഷങ്ങളില്‍.

ഏറ്റവും ചുരുങ്ങിയ വാക്കുകളില്‍ ഒരു ബയോഗ്രഫിക്കല്‍ ഡ്രാമ എന്നു വിശേഷിപ്പിക്കാം 12ത് ഫെയിലിനെ. 2019-ല്‍ അനുരാഗ് പഥക് എഴുതിയ നോവലാണ് സിനിമയ്ക്ക് ആസ്പദം. പന്ത്രണ്ടാംതരം തോറ്റിട്ടും പഠിക്കാനുള്ള ഉത്സാഹവും അധ്വാനിക്കാനുള്ള മനസുംകൊണ്ട് ഐ.പി.എസ് ഉദ്യോഗസ്ഥനായ മനോജ് കുമാര്‍ ശര്‍മയുടെ കഥയായിരുന്നു പഥക്കിന്റെ നോവലിന്റെ പ്രമേയം. 12ത് ഫെയില്‍ സിനിമയും ഇതേ വിഷയം തന്നെയാണ് സംസാരിക്കുന്നത്. സിനിമയിലും നോവലിലും മനോജ് കുമാര്‍ ശര്‍മയുടെ ഭാര്യയും സിവില്‍ സര്‍വീസ് ജേതാവുമായ ശ്രദ്ധാ ജോഷിയും കഥാഗതിയില്‍ ഉടനീളമുണ്ട്. ഇവരുടെ ജീവിതമാണ് സിനിമയില്‍ ദൃശ്യവത്ക്കരിച്ചിരിക്കുന്നതെങ്കിലും യഥാര്‍ഥ ജീവിതത്തിലെ മനോജ് ശര്‍മയും സിനിമയിലെ മനോജ് ശര്‍മയും കടന്നുവന്ന വഴികളും അവരുടെ പശ്ചാത്തലവും വ്യത്യസ്തം തന്നെയാണ്.

Content Highlights: Manoj Kumar Sharma IPS Life Story, real life story of manoj kumar sharma ips in the film 12th fail