മെഗാ ഐ.പി.ഒ: വിപണിയിൽനിന്ന് 50,000 കോടി സമാഹരിക്കാൻ ജിയോയും എൻ.എസ്.ഇയും

50,000 കോടി രൂപ മൂല്യമുള്ള പ്രാരംഭ ഓഹരി വില്പനക്ക് വിപണിയിൽ കളമൊരുങ്ങുന്നു. റിലയൻസ് ജിയോ ഇൻഫോകോമും നാഷണൽ സ്‌റ്റോക്ക് എക്‌സ്‌ചേഞ്ചും (എൻ.എസ്.ഇ) ഈയാഴ്ച തന്നെ ഐപിഒയ്ക്കുള്ള കരട് പത്രിക സമർപ്പിച്ചേക്കും. ജിയോയുടെ 400 കോടി ഡോളറിന്റെ ഐ.പി.ഒ രാജ്യത്തെ ചരിത്രത്തിലെ തന്നെ ഏറ്റവും വലിയതായിരിക്കും. വർഷങ്ങളായി നീണ്ട നിയമതടസ്സം നീങ്ങിയ സാഹചര്യത്തിലാണ് എൻ.എസ്.ഇ പത്രിക സമർപ്പിക്കുന്നത്.

ജിയോ ഐ.പി.ഒ

സമാഹരിക്കുന്ന തുക: 33,000 കോടി. ഹ്യുണ്ടായ് മോട്ടോർ ഇന്ത്യയുടെ 330 കോടി ഡോളറിന്റെ ഐപിഒയെ മറികടന്ന് ഇന്ത്യയിലെ ഏറ്റവും വലിയ ലിസ്റ്റിങ്ങായി മാറുമെന്ന് പ്രതീക്ഷിക്കുന്നു.

റിലയൻസ് ഇൻഡസ്ട്രീസിന്റെ വെള്ളിയാഴ്ച നടക്കാനിരിക്കുന്ന വാർഷിക പൊതുയോഗത്തിന് (AGM) മുന്നോടിയായി സെബിക്ക് മുൻപാകെ പത്രിക സമർപ്പിച്ചേക്കും.

നേരത്തെ നിലവിലുള്ള ഓഹരി ഉടമകൾ ഓഹരികൾ വിറ്റഴിക്കുന്ന 'ഓഫർ ഫോർ സെയിൽ' (OFS) രീതിയാണ് നിശ്ചയിച്ചിരുന്നതെങ്കിലും ഇപ്പോൾ അത് പൂർണമായും പുതിയ ഓഹരികൾ പുറത്തിറക്കുന്ന രീതിയിലേക്ക് മാറ്റിയിട്ടുണ്ട്. വില നിശ്ചയിക്കുന്നതുമായി ബന്ധപ്പെട്ട് നിലവിലുള്ള നിക്ഷേപകരുമായുണ്ടായ അഭിപ്രായവ്യത്യാസമാണ് മാറ്റത്തിന് കാരണം.

2026-ന്റെ ആദ്യ പകുതിയിൽ ജിയോ ലിസ്റ്റ് ചെയ്യുമെന്ന് മുകേഷ് അംബാനി നേരത്തെ പറഞ്ഞിരുന്നു. എന്നാൽ റിലയൻസിന്റെ ഓഹരി വിലയിൽ ഉണ്ടായ 15 ശതമാനം ഇടിവും ലാഭത്തിലുണ്ടായ 13 ശതമാനം കുറവും ജിയോയ്ക്ക് പ്രതിസന്ധി സൃഷ്ടിക്കുന്നുണ്ട്.

എൻ.എസ്.ഇ: കാത്തിരിപ്പിന് അന്ത്യം

സമാഹരിക്കുന്ന തുക: 20,000 കോടി രൂപ സമാഹരിക്കാനാണ് എൻ.എസ്.ഇ ലക്ഷ്യമിടുന്നത്. പൂർണമായും 'ഓഫർ ഫോർ സെയിൽ' ആയിരിക്കും. അതായത്, സമാഹരിക്കുന്ന തുക എൻ.എസ്.ഇക്ക് ലഭിക്കില്ല, പകരം നിലവിലുള്ള ഓഹരി ഉടമകൾ 4.5 ശതമാനം വരെ ഓഹരികൾ വിറ്റഴിച്ച് പണം കൈപ്പറ്റും.

അൺലിസ്റ്റഡ് മാർക്കറ്റിലെ ഓഹരി വിലയനുസരിച്ച്, എൻഎസ്ഇയുടെ മൂല്യം അഞ്ചു ലക്ഷം കോടി രൂപയോളം വരും. ഇന്ത്യയിലെ ഏറ്റവും മൂല്യമുള്ള സാമ്പത്തിക സ്ഥാപനങ്ങളിൽ ഒന്നായി എൻഎസ്ഇ മാറിയേക്കും. നിലവിൽ അൺലിസ്റ്റഡ് മാർക്കറ്റിൽ 1,950-2,050 രൂപ നിരക്കിലാണ് കമ്പനിയുടെ ഓഹരികൾ വ്യാപാരം ചെയ്യുന്നത്.

ദീർഘകാലമായി നിലനിന്നിരുന്ന 'കോ-ലൊക്കേഷൻ' (Co-location) തർക്കം പരിഹരിക്കപ്പെട്ടത് എൻ.എസ്.ഇയുടെ ഐ.പി.ഒ പത്രിക സമർപ്പണത്തിന് വഴിയൊരുക്കി. എൻ.എസ്.ഇയുടെ ഓഹരി ഉടമകളുടെ എണ്ണം 2025 മാർച്ചിലെ 39,201-ൽ നിന്ന് ഡിസംബറിൽ 1,86,481 ആയി കുത്തനെ കൂടിയിട്ടുണ്ട്.

വിപണി സാഹചര്യം

• അമേരിക്ക-ഇസ്രായേൽ-ഇറാൻ സംഘർഷം വിപണിയിൽ അസ്ഥിരത സൃഷ്ടിച്ചിട്ടുണ്ട്.
• 2026-ൽ ഐ.പി.ഒ വഴിയുള്ള സമാഹരണം മുൻ വർഷത്തെ അപേക്ഷിച്ച് 39 ശതമാനം കുറഞ്ഞ് 198 ബില്യൺ രൂപയിലെത്തി.
• ബി.എസ്.ഇ (BSE), എം.സി.എക്‌സ് (MCX) എന്നിവയുമായി താരതമ്യം ചെയ്യുമ്പോൾ എൻ.എസ്.ഇയുടെ മൂല്യം നിലവിൽ കുറവാണെങ്കിലും ഡെറിവേറ്റീവ്‌സ് ട്രേഡിംഗിലെ നിയന്ത്രണങ്ങൾ എൻ.എസ്.ഇയുടെ വരുമാനത്തെ ബാധിച്ചേക്കാം.

റിലയൻസ് ജിയോയുടെയും എൻ.എസ്.ഇയുടെയും ഓഹരി വില്പന വിപണിയിൽ ഊർജം പകരുമെന്ന് കരുതുന്നു. രണ്ട് ഐ.പി.ഒകളും വിജയകരമായാൽ, നിക്ഷേപകരുടെ ആത്മവിശ്വാസം വർധിക്കാനിടയാക്കും. വരാനിരിക്കുന്ന മറ്റ് ഐ.പി.ഒകൾക്ക് അത് നേട്ടമാകുകയും ചെയ്യും.

Content Highlights: Reliance Jio and NSE set to file draft papers for 50,000 crore combined IPO., Jio IPO structure shifted from OFS to fresh issue of shares., NSE IPO aims for 20,000 crore via Offer for Sale (OFS)., Both listings expected to boost market sentiment in 2026., Co-location dispute resolution paves the way for NSE listing.