സ്പെയ്സ് എക്സിനെ പിന്നിലാക്കി ആന്ത്രോപിക്: സമാഹരിച്ചത് 10,730 കോടി ഡോളർ; റെക്കോഡ് മൂല്യത്തിൽ കമ്പനി

എ.ഐ. മേഖലയിലെ കരുത്തരായ ആന്ത്രോപിക് പ്രാരംഭ ഓഹരി വിൽപ്പന (ഐ.പി.ഒ.) വഴി വിപണിയിൽനിന്ന് സമാഹരിച്ചത് 10,730 കോടി ഡോളർ. ഓഹരിയൊന്നിന് 83 ഡോളർ നിശ്ചയിച്ചതിലൂടെയായിരുന്നു ഈ മൂല്യം. 70 മുതൽ 78 ഡോളർവരെ ഓഹരി വില നിശ്ചയിക്കാനായിരുന്നു നേരത്തേ തീരുമാനിച്ചിരുന്നത്. കമ്പനി 95.64 കോടി ഓഹരികളും ഏഴ് സ്ഥാപകർ ചേർന്ന് 2.36 കോടി ഓഹരികളുമാണ് വിറ്റഴിച്ചത്. നാസ്ദാക്ക് ഗ്ലോബൽ സെലക്ട് വിപണിയിലാണ് നവംബർ 19-ന് കമ്പനി ലിസ്റ്റ് ചെയ്യുക.
വാൾസ്ട്രീറ്റിലും ആഗോള വിപണികളിലും വലിയ മാറ്റത്തിന് തുടക്കമിട്ടാണ് ഐ.പി.ഒ. വിപണിയിലെത്തിയത്. ചിപ്പ് നിർമാതാക്കളിലും അനുബന്ധ ഹാർഡ്വേർ ഉത്പന്നങ്ങളിലും ഇതുവരെ ശ്രദ്ധകേന്ദ്രീകരിച്ചിരുന്ന നിക്ഷേപകർ, വാണിജ്യം, വിദ്യാഭ്യാസം, ആരോഗ്യം, ഭരണനിർവഹണം തുടങ്ങിയ മേഖലകളിലേക്കും വ്യാപിക്കുന്ന ക്ലോഡ് പോലുള്ള എ.ഐ. സോഫ്റ്റ്വേർ പ്ലാറ്റ്ഫോമുകൾ വികസിപ്പിക്കുന്ന കമ്പനികളിലേക്കും ശ്രദ്ധതിരിച്ചതിന്റെ ഉദാഹരണമായാണ് ഇതിനെ വിലയിരുത്തുന്നത്.
റെക്കോഡ് നേട്ടം
പ്രമുഖ ബഹിരാകാശ ഗവേഷണ സ്ഥാപനമായ സ്പെയ്സ് എക്സ് കുറിച്ച 7,500 കോടി ഡോളറിന്റെ റെക്കോഡ് മറികടന്ന് ഏറ്റവും വലിയ പ്രാരംഭ ഓഹരി വിൽപ്പനയായി ആന്ത്രോപിക്കിന്റേത്.
ധനകാര്യ സൂചിക (Financial Metrics) | വിവരങ്ങളും താരതമ്യവും |
|---|---|
ഐ.പി.ഒ തുക | 81.3 ബില്യൺ ഡോളർ (സ്പേസ് എക്സിന്റെ 75 ബില്യൺ ഡോളർ റെക്കോർഡ് മറികടന്നു) |
സമാഹരിച്ച മൂലധനം | 107.3 ബില്യൺ ഡോളർ (സ്വകാര്യ പ്ലേസ്മെന്റ് ഉൾപ്പെടെ) |
വിപണി മൂല്യത്തിലെ സ്ഥാനം | ടെസ്ലയുമായി ഒപ്പത്തിനൊപ്പം; ഏലി ലില്ലിയെ മറികടന്ന് ലോകത്തെ ആദ്യ 15 പൊതു കമ്പനികളിൽ ഇടം നേടി |
നിക്ഷേപ ആവശ്യകത | ലഭ്യമായ ഓഹരികളുടെ 7 മടങ്ങ് ആവശ്യക്കാരെത്തി. |
നേരത്തേ കണക്കാക്കിയിരുന്ന രണ്ട് ലക്ഷം കോടി ഡോളർ മൂല്യത്തിന് താഴെ (1.5 ലക്ഷം കോടി ഡോളർ) ആണെങ്കിലും ടെക് ഓഹരികളിലെ സമീപകാല തകർച്ചയ്ക്കിടെ വിദഗ്ധർ വിലയിരുത്തിയിരുന്ന 1.1 ലക്ഷം കോടിയേക്കാൾ ഉയർന്ന നിരക്കിലെത്തിയതെന്നത് ശ്രദ്ധേയമാണ്.
ഐ.പി.ഒ.യുടെ ഭാഗമായി അവതരിപ്പിച്ച 2,600 കോടി ഡോളറിന്റെ സ്വകാര്യ ഓഹരി വിൽപ്പന ലോകത്തിലെ വൻകിട ടെക്നോളജി കമ്പനികളും ആന്ത്രോപിക്കും തമ്മിലുള്ള ബന്ധത്തിന് തെളിവാണ്. ആൽഫബെറ്റ് (ഗൂഗിൾ), അഡ്വാൻസ്ഡ് മൈക്രോ ഡിവൈസസ് (എ.എം.ഡി.), മൈക്രോസോഫ്റ്റ്, എൻവിഡിയ എന്നീ ആഗോള ടെക് ഭീമന്മാർ സ്വകാര്യ നിക്ഷേപത്തിൽ പങ്കാളികളായി. ഇതിൽ എൻവിഡിയ മാത്രം 1,000 കോടി ഡോളറിന്റെ ആന്ത്രോപിക് ഓഹരികളാണ് സ്വന്തമാക്കിയത്. കമ്പനിയുടെ ബോർഡ് അംഗത്വമുള്ള സ്പാർക്ക് ക്യാപിറ്റൽ, ഐക്കോണിക്, കോട്ടു മാനേജ്മെന്റ് തുടങ്ങിയ പ്രമുഖ വെഞ്ച്വർ ക്യാപിറ്റൽ സ്ഥാപനങ്ങൾക്കും കമ്പനിയുടെ ഏഴ് സഹസ്ഥാപകർക്കും ജീവനക്കാർക്കും ലിസ്റ്റിങിലൂടെ വൻ നേട്ടമാണ് ലഭിച്ചത്.
പ്രധാന എതിരാളിയായ ഓപ്പൺ എ.ഐ.യെക്കാൾ വ്യക്തമായ മുൻതൂക്കം നേടാൻ വിപണി പ്രവേശനത്തിലൂടെ ആന്ത്രോപിക്കിന് സാധ്യമായി. സോഫ്റ്റ്വേർ ഡിസൈൻ, നിയമ വിശകലനം, സങ്കീർണമായ ശാസ്ത്ര കണ്ടെത്തലുകൾ എന്നിവ നിർവഹിക്കാൻ ശേഷിയുള്ള 'ക്ലോഡ്' മോഡലിന് വിപണിയിലുള്ള ആധിപത്യം ഇത്തരം കോർപ്പറേറ്റ് പങ്കാളിത്തങ്ങളിലൂടെ കൂടുതൽ ശക്തമായി.
Content Highlights: Anthropic raised $107.3 billion through its initial public offering, surpassing SpaceX's previous record., The IPO price was set at $83 per share, exceeding initial expectations of $70 to $78., Major tech giants including Google, Microsoft, AMD, and Nvidia participated in private share sales., The company's Nasdaq Global Select Market listing is scheduled for November 19., The success highlights investor shift towards AI software platforms like Claude over hardware-only manufacturers.