മിനിമം ഇപിഎഫ് പെൻഷൻ 7,500 രൂപയാക്കുമോ; പുതുക്കിയ വ്യവസ്ഥകൾ അറിയാം

ഇപിഎഫ് പെൻഷൻ സ്‌കീമിലെ മിനിമം പെൻഷൻ ആയിരം രൂപയിൽനിന്ന് 7,500 രൂപയായി ഉയർത്തുന്ന കാര്യം കേന്ദ്ര സർക്കാർ പിന്നീട് പരിഗണിച്ചേക്കും. അതിനിടെ പഴയ ഇപിഎസ് 1995 പദ്ധതിക്കുപകരം നവീകരിച്ച ഇപിഎസ് 2026 പദ്ധതി സർക്കാർ വിജ്ഞാപനം ചെയ്തു. പെൻഷൻ ക്ലെയിമുകൾ വേഗത്തിൽ തീർപ്പാക്കുന്നതിനും ഡിജിറ്റൽ ഇടപാടുകൾ കർശനമാക്കുന്നതിനും പുതിയ പദ്ധതിയിൽ മുൻഗണന നൽകുന്നുണ്ടെങ്കിലും പെൻഷൻ കണക്കാക്കുന്ന രീതിയിൽ മാറ്റം വരുത്തിയിട്ടില്ല.

പെൻഷൻ വർധന: സർക്കാർ നിലപാട്

മിനിമം പെൻഷൻ വർധനവുമായി ബന്ധപ്പെട്ട് പാർലമെന്റിൽ ഉന്നയിച്ച ചോദ്യങ്ങളും കേന്ദ്ര തൊഴിൽ മന്ത്രാലയം നൽകിയ മറുപടിയും:

തൊഴിലാളികളുടെ ആവശ്യം: ഇ.പി.എസ്-95 നാഷണൽ അജിറ്റേഷൻ കമ്മിറ്റിയുടെ നേതൃത്വത്തിൽ മിനിമം പെൻഷൻ പ്രതിമാസം 1,000 രൂപയിൽ നിന്ന് 7,500 രൂപയായി ഉയർത്തണമെന്നും ക്ഷാമബത്ത (DA) അനുവദിക്കണമെന്നുമാണ് തൊഴിലാളി സംഘടനകളുടെ ആവശ്യം.

സർക്കാർ പ്രതികരണം: മിനിമം പെൻഷൻ കൂട്ടുന്നതു സംബന്ധിച്ച് സർക്കാർ ഇതുവരെ ഔദ്യോഗിക പ്രഖ്യാപനങ്ങളൊന്നും നടത്തിയിട്ടില്ല. ഫണ്ടിന്റെ സ്ഥിരതയും ഭാവിയിലെ ബാധ്യതകളും കണക്കിലെടുത്ത് മാത്രമേ തീരുമാനമെടുക്കാൻ കഴിയൂ എന്ന് തൊഴിൽ സഹമന്ത്രി ശോഭ കരന്ദ്‌ലാജെ ലോക്‌സഭയിൽ വ്യക്തമാക്കി.

നിലവിലെ സ്ഥിതി: ഇ.പി.എസ് 1995-ന് കീഴിലുള്ള പെൻഷൻകാർക്ക് പ്രതിമാസം 1,000 രൂപ മിനിമം പെൻഷൻ ഉറപ്പാക്കാൻ സർക്കാർ ബജറ്റ് വിഹിതം നൽകുന്നുണ്ട്. ഇ.പി.എഫ്.ഒ (EPFO) പദ്ധതിയിലേക്ക് നൽകുന്ന 1.16 ശതമാനം വേതന വിഹിതത്തിന് പുറമെയാണിത്.

ഇ.പി.എസ് 2026: പരിഷ്‌കരണം ഇങ്ങനെ

ജൂലായ് മുതൽ പ്രാബല്യത്തിൽ വന്ന ഇപിഎസ് 2026 പദ്ധതി 1995-ലെ എംപ്ലോയീസ് പെൻഷൻ സ്‌കീമിനും 1971-ലെ എംപ്ലോയീസ് ഫാമിലി പെൻഷൻ സ്‌കീമിനും പകരമുള്ളതാണ്. 'കോഡ് ഓൺ സോഷ്യൽ സെക്യൂരിറ്റി 2020'-ന്റെ കീഴിലാണ് ഇത് വിജ്ഞാപനം ചെയ്തിരിക്കുന്നത്.

• പെൻഷൻ ക്ലെയിമുകൾ അപേക്ഷ സമർപ്പിച്ച് 20 ദിവസത്തിനുള്ളിൽ തീർപ്പാക്കണം.
• പെൻഷൻ ക്ലെയിമുകൾ തീർപ്പാക്കാൻ വൈകുന്ന സാഹചര്യത്തിൽ 12 ശതമാനം പലിശ നൽകാൻ പുതിയ പദ്ധതി വ്യവസ്ഥ ചെയ്യുന്നു.
• തൊഴിലുടമകൾക്ക് ഡിജിറ്റൽ സംവിധാനങ്ങൾ വഴിയുള്ള റിപ്പോർട്ടിംഗും നടപടിക്രമങ്ങളും നിർബന്ധമാക്കി.
• ഉയർന്ന പെൻഷൻ നൽകുന്നതുമായി ബന്ധപ്പെട്ട വ്യവസ്ഥകൾ പുതിയ പദ്ധതിയിൽ ഉൾപ്പെടുത്തിയിട്ടുണ്ട്.

പെൻഷൻ കണക്കാക്കുന്ന രീതി

പെൻഷൻ ഫോർമുല:

പ്രതിമാസ പെൻഷൻ = (പെൻഷനബിൾ ശമ്പളം × പെൻഷനബിൾ സേവനം) ÷ 70

പെൻഷനബിൾ ശമ്പളം: വിരമിക്കുന്നതിന്‌ തൊട്ടുമുമ്പുള്ള 60 മാസത്തെ ശമ്പളത്തിന്റെ ശരാശരിയാണ് ഇതിനായി കണക്കിലെടുക്കുന്നത്.

Content Highlights: Introduction of the new EPS 2026 scheme replacing EPS 1995., Government stance on the demand to increase minimum pension to ₹7,500., Mandatory 20-day timeline for pension claim settlement with interest penalties., Transition to digital-first reporting for employers., Standardized pension formula based on 60-month salary average.