വിദ്യാഭ്യാസരംഗത്ത് നല്ല മാറ്റങ്ങൾ-എ.പി. അനിൽകുമാർ
അഞ്ച്‌ ദിവസം നീളുന്ന പ്രദർശനത്തിൽ ഇന്ത്യയിലെ 90-ഓളം ഉന്നതവിദ്യാഭ്യാസ സ്ഥാപനങ്ങൾ പങ്കെടുക്കും
മലപ്പുറം : ഉപരിപഠനരംഗത്ത് വിദ്യാർഥികൾക്ക് പുതിയ ദിശാബോധം നൽകാൻ പൊതുവിദ്യാഭ്യാസ വകുപ്പ് സംഘടിപ്പിക്കുന്ന ‘ദിശ’ പ്രദർശനോത്സവത്തിന് മലപ്പുറം എം.എസ്.പി. പരേഡ് മൈതാനത്ത് തുടക്കമായി. റവന്യൂ മന്ത്രി എ.പി. അനിൽകുമാർ ഉദ്ഘാടനം ചെയ്തു.
വിദ്യാഭ്യാസരംഗത്ത് ഗുണകരമായ മാറ്റങ്ങൾ നടപ്പാക്കാൻ സർക്കാരിനായിട്ടുണ്ടെന്ന് റവന്യൂ വകുപ്പ് മന്ത്രി എ.പി. അനിൽകുമാർ പറഞ്ഞു.
വിദ്യാഭ്യാസമന്ത്രി മലപ്പുറത്തിനു തന്ന സമ്മാനം കൂടിയാണ് ഈ പ്രദർശനമെന്നും മന്ത്രി പറഞ്ഞു. ഹയർസെക്കൻഡറി വിദ്യാഭ്യാസത്തിനുശേഷമുള്ള ഉപരിപഠനം, തൊഴിൽസാധ്യതയുള്ള കോഴ്സുകൾ, സ്‌കോളർഷിപ്പുകൾ തുടങ്ങിയ ഒട്ടേറെ സംശയങ്ങൾക്ക് പരിഹാരമായാണ് ‘ദിശ’ സംഘടിപ്പിക്കുന്നത്. അഞ്ച്‌ ദിവസം നീണ്ടുനിൽക്കുന്ന പ്രദർശനത്തിൽ ഇന്ത്യയിലെ 90-ഓളം ഉന്നതവിദ്യാഭ്യാസ സ്ഥാപനങ്ങൾ പങ്കെടുക്കുന്നുണ്ട്. പൊതുവിദ്യാഭ്യാസ വകുപ്പ് മന്ത്രി എം. ഷംസുദ്ദീൻ അധ്യക്ഷത വഹിച്ചു. തദ്ദേശസ്വയംഭരണ വകുപ്പ് മന്ത്രി കെ.എം. ഷാജി ദിശ സ്റ്റാൾ ഉദ്ഘാടനം ചെയ്തു. കരിയർ ഗൈഡൻസ് ആൻഡ് അഡോളസന്റ് കൗൺസലിങ് സെൽ സ്റ്റേറ്റ് കോഡിനേറ്റർ ഡോ. സി.എം. അസീം പദ്ധതി വിശദീകരിച്ചു. ടി.വി. ഇബ്രാഹിം എം.എൽ.എ., ജില്ലാ പഞ്ചായത്ത് പ്രസിഡന്റ് പി.എ. ജബ്ബാർ ഹാജി, കളക്ടർ ഡോ. വിനയ് ഗോയൽ, എം.എസ്.പി. കമാൻഡന്റ് കെ. സലീം, മലപ്പുറം നഗരസഭാധ്യക്ഷ അഡ്വ. വി. റിനിഷ, സീമാറ്റ് ഡയറക്ടർ അരുൺകുമാർ, എച്ച്.എസ്.ഇ. പരീക്ഷാവിഭാഗം ജോയിന്റ് ഡയറക്ടർ ഡോ. കെ. മാണിക്യരാജ്, മലപ്പുറം റീജണൽ ഡെപ്യൂട്ടി ഡയറക്ടർ എസ്. ജൂഡ് ലൂയിസ്, വി.എച്ച്.എസ്.സി. ഡെപ്യൂട്ടി ഡയറക്ടർ ഡോ. കെ.വി. മനോജ്, പൊതുവിദ്യാഭ്യാസ ഡയറക്ടർ ഡോ. അരുൺ കെ.വിജയൻ, ഹയർസെക്കൻഡറി അക്കാദമിക് ജോയിന്റ് ഡയറക്ടർഡോ. കെ.കെ. അഷ്റഫ് എന്നിവർ പ്രസംഗിച്ചു.
ദിശ എക്സ്പോ കാലോചിതമായി പരിഷ്‌കരിക്കും-എൻ. ഷംസുദ്ദീൻ
2018 മുതൽ സംസ്ഥാനത്ത് നടത്തുന്ന ദിശ എക്സ്പോ കാലോചിതമായി പരിഷ്‌കരിക്കുമെന്ന് വിദ്യാഭ്യാസമന്ത്രി എൻ. ഷംസുദ്ദീൻ പറഞ്ഞു. കുട്ടികളുടെ താൽപ്പര്യങ്ങൾക്ക് അനുസൃതമായി തൊഴിൽ തിരഞ്ഞെടുക്കാനുള്ള മികച്ച അവസരമാണ് ‘ദിശ’ കരിയർ എക്സ്പോയിലൂടെ ഉണ്ടാകുന്നത്.
വിദ്യാഭ്യാസവകുപ്പിന്റെ കീഴിലുള്ള ‘കൈറ്റ്’ ഈ വർഷം മുതൽ ‘ദിശ’യുടെ ചുമതല കൂടി ഏറ്റെടുത്തിട്ടുണ്ട്.
സ്‌കൂളുകൾക്ക് സ്ലോട്ടുകൾ ക്രമീകരിക്കുന്നതുവഴി വളരെ നല്ലനിലയിൽ പരിപാടികൾ സംഘടിപ്പിക്കാൻ ഇതിലൂടെ സാധിക്കുന്നുണ്ട്.