എം.ടിയും ബഷീറും കയറാൻ മടിച്ച 'കോലായ' താങ്ങാനുള്ള ശേഷിയുണ്ടോ ഇന്നത്തെ എഴുത്തുകാര്‍ക്ക്?
കോഴിക്കോട് സാഹിത്യനഗരമായി പ്രഖ്യാപിക്കപ്പെട്ടപ്പോള്‍ മേയര്‍ ഡോ. ബീന ഫിലിപ്പ് ഉള്‍പ്പെടെയുള്ളവര്‍ പറഞ്ഞത് കോഴിക്കോട്ടെ കോലായ കള്‍ച്ചര്‍ തിരികെ കൊണ്ടുവരണം എന്നാണ്. വ്യക്തിവൈകാരികതകള്‍ക്ക് സ്ഥാനമാനമില്ലാതെ സാഹിത്യം മുഖ്യജീവനായി കരുതി എഴുത്തിനെ പ്രശംസിക്കുകയും നിശിതമായി വിമര്‍ശിക്കുകയും ചെയ്തിരുന്നു കോലായക്കാര്‍. വിമര്‍ശനം ഏറ്റുവാങ്ങാന്‍ മടിയേതും കൂടാതെ എഴുത്തുകാര്‍ ഓരോ കോലായയിലും കൂടിയിരുന്നു. അന്നത്തെ കോലായയെക്കുറിച്ച എം.എന്‍ കാരശ്ശേരി, ജോര്‍ജ് ഇരുമ്പയം, ഹാഫിസ് മുഹമ്മദ് എന്നിവര്‍ സംസാരിക്കുന്നു.
എം.ടിയും ബഷീറും കയറിവരാന്‍ മടിച്ച കോലായ- എം.എന്‍ കാരശ്ശേരി
കോഴിക്കോട് തളിയില്‍ ആര്‍. രാമചന്ദ്രന്‍ മാസ്റ്ററുടെ 'സന്ധ്യ' എന്ന വീടിന്റെ കോലായയാണ് അറുപതുകളിലെ കോഴിക്കോട്ടെ അനൗപചാരിക സാഹിത്യചര്‍ച്ച കൂട്ടായ്മയായ കോലായക്ക് തുടക്കമിട്ടത്. രാമചന്ദ്രന്‍ മാസ്റ്റര്‍ മലബാര്‍ ക്രിസ്ത്യന്‍ കോളേജിലെ മലയാളം അധ്യാപകനായിരുന്നു. ഇംഗ്ലീഷ് എം.എ വിദ്യാര്‍ഥികള്‍ക്ക് അദ്ദേഹം ഹോംട്യൂഷന്‍ നല്‍കിയിരുന്നു. സാഹിത്യത്തെ അത്രകണ്ട് സ്‌നേഹിച്ചിരുന്ന രാമചന്ദ്രന്‍ മാസ്റ്ററുടെ വീട്ടിലെ കോലായയിലേക്ക് എഴുത്തുസംവാദങ്ങളുമായി കടന്നുവന്നവരില്‍ പ്രമുഖരായിരുന്നു ഡോ. എം.ജി.എസ് നാരായണന്‍, എന്‍.പി മുഹമ്മദ്, എന്‍.എന്‍ കക്കാട്, ഉറൂബ്, പി.എം നാരായണന്‍, അന്ന് ആകാശവാണിയിലുണ്ടായിരുന്ന അക്കിത്തം, എംഎം നമ്പൂതിരി, ജോര്‍ജ് ഇരുമ്പയം തുടങ്ങിയവര്‍. അന്ന് ഞാന്‍ വിദ്യാര്‍ഥിയായിരുന്നു. എഴുത്തും വായനയും ഉത്സാഹമായി കൊണ്ടുനടന്നിരുന്ന ആ സംഘത്തിന്റെ 'കോലായ'യിലേക്ക് ഇടയ്‌ക്കൊക്കെ വിദ്യാര്‍ഥിയായ എനിക്കും പ്രവേശനമുണ്ടായിരുന്നു. രാമചന്ദ്രന്‍ മാസ്റ്ററുടെ അനുജന്‍ ആര്‍. വിശ്വനാഥന്‍ കാലിക്കറ്റ് യൂണിവേഴ്‌സിറ്റി ഇംഗ്ലീഷ് പ്രൊഫസറായിരുന്നു. അദ്ദേഹവും കോലായയില്‍ സജീവമമായിരുന്നു.
Content Highlights: kolaya literary culture in kozhikode mn karassery george irumbayam and hafiz muhammed speaks