വിവാഹനാളിൽ ധൂം 2-ലെ പാട്ടിന് കിടിലൻ ചുവടുവെച്ച് പോർച്ചുഗീസ് യുവാവ്; കമന്റിട്ട് സാക്ഷാൽ ഹൃത്വിക് റോഷൻ
പോര്ച്ചുഗീസിലെ ഒരു വിവാഹത്തിനിടെ വരനും കൂട്ടുകാരും ചേര്ന്ന് അവതരിപ്പിച്ച കിടിലന് നൃത്തമാണ് ഇപ്പോള് സോഷ്യല് മീഡിയയില് വൈറലായിരിക്കുന്നത്. ധൂം 2 എന്ന ചിത്രത്തിലെ ധൂം എഗെയ്ന് എന്ന ഗാനത്തിനാണ് യുവാവ് ചുവടുവെച്ചത്. ചിത്രത്തിലെ ഹൃത്വിക് റോഷന്റെ പ്രകടനത്തോട് കിടപിടിക്കുന്നത്ര ഊര്ജ്ജസ്വലമായിരുന്നു യുവാവിന്റെ ചുവടുകള്.
ഇന്സ്റ്റഗ്രാമിലാണ് ഇതിന്റെ വീഡിയോ പ്രത്യക്ഷപ്പെട്ടത്. വൈകാതെ ഇന്ത്യക്കാര് വീഡിയോ ഏറ്റെടുത്തു. എക്കാലത്തേയും സൂപ്പര്ഹിറ്റുകളിലൊന്നായ ധൂം 2-ലെ ഗാനത്തിന് ഒരു വിദേശി ചുവടുവെച്ചാല് ചലച്ചിത്ര പ്രേമികള് ഏറ്റെടുക്കാതിരിക്കില്ലല്ലോ.
'വെള്ളക്കാരനായ ചെറുക്കന് തവിട്ടുനിറമുള്ള പെണ്ണിനെ വിവാഹം ചെയ്യുമ്പോള്...' എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
യഥാര്ഥത്തില് ഈ ഗാനരംഗത്തില് നൃത്തം ചെയ്ത സാക്ഷാല് ഹൃത്വിക് റോഷനും വീഡിയോയ്ക്ക് താഴെ കമന്റ് ചെയ്തു. 'ഇഷ്ടപ്പെട്ടു' എന്ന ഒറ്റവാക്കും തീനാളത്തിന്റെ ഇമോജിയുമാണ് ഹൃത്വിക് കമന്റ് ചെയ്തത്. താരത്തിന്റെ കമന്റിന് 91,000-ത്തിലേറെ ലൈക്കുകളാണ് ലഭിച്ചത്. വീഡിയോയ്ക്ക് പത്ത് ലക്ഷത്തിലേറെ ലൈക്കുകളും ആയിരക്കണക്കിന് കമന്റുകളും ലഭിച്ചു.
സൂപ്പര്ഹിറ്റ് ചിത്രമായ ധൂമിന്റെ രണ്ടാം ഭാഗമായ ധൂം 2 എന്ന ചിത്രം 2006-ലാണ് പുറത്തിറങ്ങിയത്. യാഷ് രാജ് ഫിലിംസിന്റെ ബാനറില് ആദിത്യ ചോപ്ര നിര്മ്മിച്ച ചിത്രം സംവിധാനം ചെയ്തത് സഞ്ജയ് ഗാധ്വിയാണ്. ഹൃത്വിക് റോഷനൊപ്പം അഭിഷേക് ബച്ചന്, ഐശ്വര്യ റായ്, ബിപാഷ ബസു, ഉദയ് ചോപ്ര, എന്നിവരും പ്രധാനവേഷങ്ങളിലെത്തി. പ്രീതം ചക്രവര്ത്തിയാണ് ചിത്രത്തിലെ ഗാനങ്ങളൊരുക്കിയത്.