'കുട്ടിയായിരിക്കെ ഒരാൾ നെഞ്ചിൽ അടിച്ചു, ലിഫ്റ്റിൽ വെച്ചും ലൈംഗികാതിക്രമം'; തുറന്നുപറഞ്ഞ് പാർവതി

താൻ നേരിട്ട ലൈംഗികാതിക്രമങ്ങൾ തുറന്ന് പറഞ്ഞ് നടി പാർവതി തിരുവോത്ത്. കുട്ടിക്കാലത്ത് ഉൾപ്പെടെ നേരിടേണ്ടി വന്ന ദുരനുഭവങ്ങളാണ് പാർവതി പറഞ്ഞത്. എല്ലാ സ്ത്രീകൾക്കും ഇത്തരം ദുരനുഭവങ്ങളുണ്ടെന്നതാണ് വസ്തുതയെന്നും അവർ പറഞ്ഞു. ഹൗട്ടർഫ്‌ളൈയിലെ ദി മെയിൽ ഫെമിനിസ്റ്റ് എന്ന പരിപാടിയിൽ സിദ്ധാർഥ് ആലംബയാനോടാണ് പാർവതി ഇക്കാര്യങ്ങൾ പറഞ്ഞത്.

കുട്ടിയായിരിക്കുമ്പോൾ റെയിൽവേ സ്‌റ്റേഷനിൽ വെച്ചുണ്ടായ അനുഭവം പാർവതി വെളിപ്പെടുത്തി. അച്ഛൻ തന്നേയും അമ്മയേയും റെയിൽവേ സ്റ്റേഷനിൽ ഇറക്കിയതായിരുന്നു. പൊടുന്നനെ ഒരാൾ വന്ന് തന്റെ നെഞ്ചിൽ ശക്തമായി അടിച്ചു. കുട്ടിയായിരുന്ന തനിക്ക് ആ സമയം വലിയ വേദനയാണ് ഉണ്ടായതെന്നും പാർവതി ഓർമിച്ചു. റോഡിലൂടെ നടക്കുമ്പോൾ പുരുഷന്മാരുടെ കൈകളെ ശ്രദ്ധിക്കണമെന്ന് അമ്മ തന്നെ പഠിപ്പിച്ചിരുന്ന കാര്യവും പാർവതി ഓർത്തെടുത്തു.

കൗമാരം പിന്നിട്ടപ്പോഴുണ്ടായ മറ്റൊരു ദുരനുഭവവും പാർവതി അഭിമുഖത്തിൽ പറഞ്ഞു. 'അന്നെനിക്ക് 19-20 വയസാണ്. ഞാനും ഒരു സുഹൃത്തും കൂടി സിനിമ കാണാൻ പോയതായിരുന്നു. സിനിമ കണ്ടിറങ്ങി മാളിലെ ലിഫ്റ്റിൽ കയറിയപ്പോൾ ഒരാൾ വന്ന് എന്റെ പിന്നിൽ നിന്നു. അയാൾ എന്റെ ശരീരത്തോട് സ്വന്തം ശരീരത്തോട് അമർത്തുകയായിരുന്നു. ലിഫ്റ്റിൽ നിന്ന് ഇറങ്ങിയ ഉടൻ 'നീ എന്താ ചെയ്തത്' എന്ന് ചോദിച്ചുകൊണ്ട് ഞാൻ അയാളെ അടിച്ചു.' -പാർവതി പറഞ്ഞു.

'ഞാൻ അയാളെ അടിക്കുന്നത് കണ്ട് സെക്യൂരിറ്റി ഓടിവന്നു. എന്തുകൊണ്ടോ ആ മാളിൽ സിസിടിവി ക്യാമറകൾ ഇല്ലായിരുന്നു. ഞാൻ പോലീസിനെ വിളിച്ചു. അവർ വന്ന് എന്നോട് അയാളെ അടിക്കുന്നത് നിർത്താൻ പറഞ്ഞു. അപ്പോഴാണ് ഈ രാജ്യത്ത് 'നീതി' എന്നാലെന്താണ് എന്ന് മനസിലായത്. ഒടുവിൽ അയാൾ എന്റെ കാലിൽ വീണ് പറഞ്ഞു ഗൾഫിൽ ജോലി കിട്ടിയതേ ഉള്ളൂ, കല്യാണം കഴിക്കാൻ പോകുകയാണ് എന്നൊക്കെ.'

'എന്നിട്ടാണോ ഇങ്ങനെ ചെയ്തത് എന്ന് ഞാൻ അയാളോട് ചോദിച്ചു. ലിഫ്റ്റിൽ വെച്ച് നിന്റെ കാമം അടക്കിവെക്കാൻ കഴിഞ്ഞില്ലേ എന്ന് ചോദിച്ചു. അയാളെ അടിക്കാൻ എല്ലാവരും എന്നോട് പറഞ്ഞത് ഞാൻ ഓർക്കുന്നു. ഞാൻ അയാളെ അടിച്ചപ്പോൾ എല്ലാവരും എന്നെ അഭിനന്ദിച്ചു. പക്ഷേ എനിക്കത് വലിയ കാര്യമായി തോന്നിയില്ല. കാരണം ഞാൻ തന്നെയാണ് എന്നെ സംരക്ഷിക്കേണ്ടതെന്നാണ് അവർ പറഞ്ഞുവെക്കുന്നത്. എന്നെ അഭിനന്ദിക്കുകയോ ഞാൻ കരുത്തയാണെന്ന് എനിക്ക് തോന്നുകയോ ചെയ്യേണ്ട കാര്യമല്ല അത്.' -പാർവതി പറഞ്ഞു.

Content Highlights: Actress Parvathy Thiruvothu revealed harrowing experiences of sexual harassment, including being physically assaulted as a child and harassed in a mall elevator. She criticized the societal perception of justice and the burden placed on women to protect themselves.