ലണ്ടനിലെ മനോഹരമായ വലിയവീടിന് ഇന്ത്യൻ നഗരങ്ങളിലെ ഫ്ലാറ്റിന്റെ വില; വൈറലായി എൻജിനീയറുടെ പോസ്റ്റ്

ഇന്ത്യൻ നഗരങ്ങളിൽ ഒരു ചെറിയ ഫ്ലാറ്റ് വാങ്ങാൻ നൽകേണ്ട അതേ തുകയ്ക്ക് ലണ്ടനിൽ എല്ലാ സൗകര്യങ്ങളുമുള്ള ഒരു വലിയ വീട് കിട്ടുമോ? അതെ എന്നാണ് ഒരാൾ സോഷ്യൽ മീഡിയയിൽ പങ്കുവെച്ച പോസ്റ്റ് വ്യക്തമാക്കുന്നത്. ലണ്ടനിലെയും ഇന്ത്യയിലെയും വസ്തുവിലകൾ തമ്മിലുള്ള ഈ വലിയ അന്തരത്തെക്കുറിച്ചുള്ള ചർച്ചകൾക്ക് തുടക്കമിട്ടിരിക്കുകയാണ് ലണ്ടനിൽ താമസിക്കുന്ന അർണവ് ഗുപ്ത എന്ന ഇന്ത്യൻ സോഫ്റ്റ്‌വെയർ എൻജിനീയർ.

ലണ്ടനിലെ വെംബ്ലി (Wembley) ജില്ലയിലുള്ള മനോഹരമായ ഒരു വലിയ വീടിന്റെ ചിത്രമാണ് അദ്ദേഹം എക്സിൽ പങ്കുവെച്ചത്. ചുവന്ന മേൽക്കൂരയുള്ള ഈ വീടിന്റെ ഭിത്തികളിൽ വിസ്റ്റീരിയ ചെടികൾ പടർന്നുനിൽക്കുന്നത് കാണാം. 5 കോടി രൂപയിൽ താഴെ (ഏകദേശം 0.5 ദശലക്ഷം പൗണ്ട്) മാത്രം വിലമതിക്കുന്ന ഈ വീടിന്, കുട്ടികൾക്ക് ഫുട്ബോൾ കളിക്കാൻ പാകത്തിൽ വളരെ വിശാലമായ ഒരു മുറ്റവുമുണ്ട്. മാത്രമല്ല, സെൻട്രൽ ലണ്ടനിലേക്ക് ഇവിടെ നിന്നും വെറും 30 മിനിറ്റിൽ താഴെ മാത്രമേ യാത്രാ സമയമുള്ളൂ എന്നും അദ്ദേഹം പറയുന്നു.

ഇന്ത്യയിലെ നഗരങ്ങളിൽ ഇതേ വിലയ്ക്ക് ലഭിക്കുന്ന ചെറിയ ഫ്ലാറ്റുകളുമായി ഈ വീടിനെ താരതമ്യം ചെയ്ത അർണവ്, ലണ്ടനിലെ വിപണി കണ്ടതിനു ശേഷം ഇന്ത്യയിലെ പ്രോപ്പർട്ടി വിപണി തനിക്ക് ഒട്ടും മനസ്സിലാകുന്നില്ല എന്ന് പോസ്റ്റിൽ കുറിച്ചു.

ഈ പോസ്റ്റ് വൈറലായതോടെ റിയൽ എസ്റ്റേറ്റ് വിലകളെക്കുറിച്ചുള്ള ചൂടേറിയ ചർച്ചകളാണ് നടക്കുന്നത്. വീടിന്റെ രൂപകൽപനയും ലാൻഡ്സ്കേപ്പിംഗും വളരെ മനോഹരമാണെന്ന് ചിലർ കമൻ്റ് ചെയ്തു. ഈ മികച്ച ജീവിതനിലവാരം കാണുമ്പോൾ വിദേശത്തേക്ക് മാറുന്നതിനെക്കുറിച്ച് താനും ചിന്തിക്കുകയാണെന്ന് മറ്റൊരാൾ പ്രതികരിച്ചു.
"ഇന്ത്യൻ റിയൽ എസ്റ്റേറ്റ് വിപണി ഒരു തമാശയാണ്, അത് ഇടത്തരക്കാർക്ക് വേണ്ടിയുള്ളതല്ല" എന്നാണ് വേറൊരാൾ അഭിപ്രായപ്പെട്ടത്.

Content Highlights: Indian software engineer Arnav Gupta’s viral post comparing a spacious £0.5 million (₹5 crore) house in London's Wembley to overpriced small flats in Indian cities has triggered a massive debate on the affordability of the Indian real estate market.