കത്രീനയുടേയും വിക്കി കൗശലിന്റേയും മകന്റെ പേര് ! വൈകാരിക കുറിപ്പ് പങ്കുവെച്ച് ഉറി സംവിധായകൻ ആദിത്യ ധർ

കത്രീന കൈഫും വിക്കി കൗശലും തങ്ങളുടെ മകന് നൽകിയിരിക്കുന്ന പേര് വിഹാൻ കൗശൽ എന്നാണ്. നവംബർ ഏഴിനാണ് ഇരുവർക്കും കുഞ്ഞ് ജനിച്ചത്. കഴിഞ്ഞ ദിവസാണ് ഇരുവരും മകനെ ലോകത്തിന് മുന്നിൽ പരിചയപ്പെടുത്തിയത്. 2019 ൽ പുറത്തിറങ്ങിയ വിക്കി കൗശലിന്റെ ബ്ലോക്ക്ബസ്റ്റർ ചലച്ചിത്രമായ ഉറി: ദി സർജിക്കൽ സ്ട്രൈക്ക് എന്ന ചിത്രത്തിൽ വിക്കി കൗശൽ അവതരിപ്പിച്ച കഥാപാത്രത്തിന്റെ പേര് വിഹാൻ സിങ് ഷെർഗിൽ എന്നായിരുന്നു. കുഞ്ഞിന്റെ പേര് വെളിപ്പെടുത്തിയതിന് പിന്നാലെ വൈകാരിക കുറിപ്പുമായി ഉറി: ദി സർജിക്കൽ സ്ട്രൈക്ക് സംവിധായകൻ ആദിത്യ ധർ രംഗത്തെത്തി.

‌ "ഹൃദയം നിറഞ്ഞ അഭിനന്ദനങ്ങൾ. എന്റെ വിക്കൂ, മേജർ വിഹാൻ ഷെർഗില്ലിന് വെള്ളിത്തിരയിൽ ജീവൻ നൽകിയത് മുതൽ ഇപ്പോൾ കുഞ്ഞു വിഹാനെ കൈകളിലെടുത്തു നിൽക്കുന്നത് വരെ, ജീവിതം ഇപ്പോൾ ഒരു പൂർണ്ണവൃത്തം പോലെയായിരിക്കുന്നു. നിങ്ങൾ മൂവർക്കും എന്റെ എല്ലാവിധ സ്നേഹവും അനുഗ്രഹങ്ങളും നേരുന്നു. നിശ്ചയമായും നിങ്ങൾ രണ്ടുപേരും മികച്ച മാതാപിതാക്കളായിരിക്കും." ഇൻസ്റ്റഗ്രാമിൽ പങ്കുവെച്ച കമന്റിൽ ആദിത്യ ധർ പറഞ്ഞു. ഹാർട്ട് ഇമോജികളും ദൃഷ്ടിദോഷം അകറ്റാനുള്ള 'അമ്യുലറ്റ്' ഇമോജിയും ചേർത്താണ് അദ്ദേഹം തന്റെ കുറിപ്പ് അവസാനിപ്പിച്ചത്.

2021 ലാണ് കത്രീനയും വിക്കി കൗശലും വിവാഹിതരായത്. കഴിഞ്ഞ വർഷം സെപ്റ്റംബറിലാണ് താരദമ്പതികളായ വിക്കി കൗശലും കത്രീന കൈഫും തങ്ങളുടെ ആദ്യ കുഞ്ഞിനായുള്ള കാത്തിരിപ്പിലാണെന്ന വിവരം പുറത്തുവിട്ടത്. ഈ സന്തോഷവാർത്തയ്‌ക്കൊപ്പം കത്രീനയുടെ നിറവയറിൽ വിക്കി സ്നേഹത്തോടെ തൊട്ടുകൊണ്ടുള്ള മനോഹരമായ ഒരു പോളറോയ്ഡ് ചിത്രവും അവർ പങ്കുവെച്ചിരുന്നു.

നവംബർ 7-നായിരുന്നു വിക്കിയും കത്രീനയും ആൺ കുഞ്ഞിനെ വരവേറ്റത്. മകന് രണ്ടു മാസം തികയുമ്പോഴാണ് സോഷ്യൽ മീഡിയയിലൂടെ വിക്കിയും കത്രീനയും അവനെ ലോകത്തിന് പരിചയപ്പെടുത്തുകയും ഒപ്പം പേര് വെളിപ്പെടുത്തുകയും ചെയ്തത്.

Content Highlights: Vicky Kaushal and Katrina Kaif Name Their Son 'Vihaan'; Uri Director Aditya Dhar Reacts to the Special Connection