അറുപതാം വയസ്സിലും ഗർഭിണിയാണോ എന്ന് ചോദിച്ചാൽ അതെ എന്ന് മറുപടി കൊടുക്കാനാണ് പറഞ്ഞത്-നീന ഗുപ്ത

സ്വന്തം നിലപാടുകൾ കൊണ്ടും തുറന്നുപറച്ചിലുകൾ കൊണ്ടും എപ്പോഴും വാർത്തകളിൽ ഇടംനേടുന്ന ബോളിവുഡ് നടിയാണ് നീന ഗുപ്ത. വ്യക്തിജീവിതത്തിലെ ചോദ്യാവലികൾക്കും വസ്ത്രധാരണത്തെക്കുറിച്ചുള്ള അനാവശ്യ വിമർശനങ്ങൾക്കും കൃത്യവും വ്യക്തവുമായ മറുപടി നൽകാൻ അവർ ഒരിക്കലും മടിക്കാറില്ല. ഇപ്പോൾ, തന്നോട് കല്യാണത്തെക്കുറിച്ച് അനാവശ്യ ചോദ്യങ്ങൾ ചോദിക്കുന്നവർക്കും ശരീരപ്രകൃതിയുടെ പേരിൽ പരിഹസിക്കുന്നവർക്കും മറുപടിയുമായി രംഗത്തെത്തിയിരിക്കുകയാണ് താരം. ഒരു അഭിമുഖത്തിലാണ് സാമൂഹികമായ സമ്മർദങ്ങളെയും വ്യക്തിഗതമായ ചോദ്യങ്ങളെയും താൻ എങ്ങനെയാണ് നേരിടുന്നതെന്ന് നീന ഗുപ്ത തുറന്നുപറഞ്ഞത്.

കല്യാണം എപ്പോഴാണ്?

സമൂഹത്തിൽ സ്ത്രീകൾ നേരിടുന്ന ഏറ്റവും വലിയ ചോദ്യങ്ങളിൽ ഒന്നാണ് വിവാഹം. 'എപ്പോഴാണ് കല്യാണം കഴിക്കുന്നത്?' എന്ന് ചോദിക്കുന്ന ബന്ധുക്കൾക്കും നാട്ടുകാർക്കും കൃത്യമായ മറുപടി നൽകണമെന്ന് നീന ഗുപ്ത പറയുന്നു. ഇത്തരക്കാരുടെ ചോദ്യങ്ങൾക്ക് മുന്നിൽ തലകുനിക്കാതെ, അവർക്ക് അതേ നാണയത്തിൽ തന്നെ തിരിച്ചടി നൽകുകയാണ് വേണ്ടത്.' കല്യാണം എപ്പോഴാണെന്ന് ചോദിക്കുന്നവരോട് 'നിങ്ങളുടെ വീട്ടിൽ നിന്നാണോ എനിക്ക്

ചെലവ് തരുന്നതെന്ന് ചോദിക്കണമെന്നും അതിനിപ്പോൾ നിങ്ങൾക്ക് എന്താണ് പ്രശ്‌നം? നിങ്ങൾ കല്യാണം കഴിച്ചോ ഇല്ലയോ?' എന്ന് തിരിച്ചുചോദിക്കണമെന്നും നീന പറയുന്നു. സ്വന്തം കാലിൽ നിൽക്കുന്ന, സാമ്പത്തിക ഭദ്രതയുള്ള സ്ത്രീകൾ ആരോടും തങ്ങളുടെ വ്യക്തിപരമായ തീരുമാനങ്ങൾക്ക് വിശദീകരണം നൽകേണ്ടതില്ലെന്നാണ് താരത്തിന്റെ പക്ഷം. മറ്റുള്ളവരുടെ കാര്യങ്ങളിൽ അനാവശ്യമായി ഇടപെടാതെ ആളുകൾ സ്വന്തം കാര്യങ്ങളിൽ ശ്രദ്ധ കേന്ദ്രീകരിക്കണമെന്നും അവർ കൂട്ടിച്ചേർത്തു.

ബോഡി ഷെയ്മിംഗിന് മറുപടി

വിവാഹത്തെക്കുറിച്ചുള്ള ചോദ്യങ്ങൾക്ക് പുറമെ, ബോഡി ഷെയ്മിംഗിനും വസ്ത്രധാരണത്തിന്റെ പേരിലുള്ള പരിഹാസങ്ങൾക്കും എതിരെയും നീന പ്രതികരിച്ചു. സാരി ഉടുക്കുമ്പോൾ വസ്ത്രത്തിന് വന്ന ചെറിയൊരു ചുളിവ് കാരണം താൻ വലിയ രീതിയിലുള്ള പരിഹാസങ്ങൾക്ക് ഇരയായ സംഭവം അവർ പങ്കുവെച്ചു. 'ഒരിക്കൽ ഞാൻ സാരി ധരിച്ചപ്പോൾ സാരിയുടെ ഒരു ഭാഗം അരക്കെട്ടിന് സമീപം അല്പം തടിച്ചതുപോലെ തോന്നിപ്പിച്ചു. ഇതോടെ 'അറുപതാം വയസ്സിൽ നീന ഗർഭിണിയാണോ?' എന്ന് പറഞ്ഞ് ചിലർ അപവാദങ്ങൾ പ്രചരിപ്പിക്കാൻ തുടങ്ങി,' നീന ഓർത്തെടുത്തു. ഇത്തരം അനാവശ്യ കമന്റുകൾ കേട്ട് മാനസികമായി തളരുന്നതിന് പകരം, അതിനെ തമാശയാക്കി മാറ്റി മറുപടി നൽകാനാണ് അവർ തീരുമാനിച്ചത്. താൻ ഗർഭിണിയാണെന്ന് തന്നെ അപവാദം പ്രചരിപ്പിച്ചവരോട് പറയാൻ നീന തന്റെ ടീമിനോട് ആവശ്യപ്പെടുകയായിരുന്നു. ആരെങ്കിലും നിങ്ങളെ ബോഡി ഷെയ്മിംഗ് നടത്തുകയാണെങ്കിൽ 'ഞാൻ ഗർഭിണിയാണ്' എന്ന് മറുപടി നൽകി അവരുടെ വായടപ്പിക്കാൻ നീന ആരാധകരെ ഉപദേശിക്കുകയും ചെയ്തു.

ഡൽഹി പോലുള്ള നഗരങ്ങളിൽ പോലും ഇന്നും സ്ത്രീകൾ മുഖം മൂടി നടക്കേണ്ടി വരുന്ന അവസ്ഥയുണ്ടെന്ന് നീന ചൂണ്ടിക്കാണിക്കുന്നു. കാലങ്ങൾ മാറിയെങ്കിലും സമൂഹത്തിന്റെ മനോഭാവത്തിൽ വലിയ മാറ്റങ്ങളൊന്നും വന്നിട്ടില്ല. സ്ത്രീകൾ സ്വയം സമ്പാദിക്കാൻ തുടങ്ങി എന്നതു മാത്രമാണ് അടുത്ത കാലത്തുണ്ടായ ഏക മാറ്റമെന്നും അവർ അഭിപ്രായപ്പെട്ടു.അഭിനയരംഗത്തും നീന സജീവമാണ്. 'സരാഭായ് വേഴ്‌സസ് സരാഭായ്', 'ഖിച്ച്ഡി' തുടങ്ങിയ ജനപ്രിയ പരമ്പരകൾക്ക് ശേഷം ഹാറ്റ്സ് ഓഫ് പ്രൊഡക്ഷൻസ് ഒരുക്കുന്ന പുതിയ കോമഡി-ഡ്രാമ പരമ്പരയായ 'ചുംബക്' ആണ് താരത്തിന്റെ പുതിയ പ്രോജക്റ്റ്. ആതിഷ് കപാഡിയ രചനയും സംവിധാനവും നിർവഹിക്കുന്ന ഈ പരമ്പരയിൽ ദേവൻ ഭോജാനി, അർജുൻ ബിജ്‌ലാനി, ഹെല്ലി ഷാ, സുമീത് വ്യാസ്, മനസ്സി പരേഖ് തുടങ്ങി വലിയൊരു താരനിര തന്നെ അണിനിരക്കുന്നുണ്ട്.

Content Highlights: Neena Gupta gave strong responses to intrusive questions about marriage., She addressed body shaming incidents regarding her age and appearance with humor., She highlighted that financial independence is the only major shift for women in society., She is starring in the upcoming comedy-drama series Chumbak.