കുട്ടികളുടെ ഭാവിയിലെ സ്വഭാവത്തെയും ബുദ്ധിയേയും എങ്ങനെ സ്വാധീനിക്കാം? അറിയാം ന്യൂറോപ്ലാസ്റ്റിസിറ്റി

നമ്മുടെ തലച്ചോറിന് നമ്മുടെ അനുഭവങ്ങൾ, പഠനം, പരിശീലനം, പാരിസ്ഥിതിക മാറ്റങ്ങൾ എന്നിവയ്ക്ക് അനുസരിച്ച് സ്വയം മാറാനും വികസിക്കാനുമൊക്കെ കഴിയും. ഇതിനെയാണ് ന്യൂറോപ്ലാസ്റ്റിസിറ്റി (Neuroplasticity) എന്നു പറയുന്നത്.

പ്രധാന സവിശേഷതകൾ:
നമ്മൾ ഒരു പുതിയ ഭാഷയോ, സംഗീതോപകരണമോ, കളിയോ പഠിക്കുമ്പോൾ തലച്ചോറിലെ ന്യൂറോണുകൾ (നാഡീകോശങ്ങൾ) തമ്മിൽ പുതിയ സർക്യൂട്ടുകളും ബന്ധങ്ങളും രൂപപ്പെടുന്നു.

ഒരു കാര്യം വീണ്ടും വീണ്ടും പരിശീലിക്കുമ്പോൾ അതിനു കാരണമാകുന്ന നാഡീബന്ധങ്ങൾ കൂടുതൽ ശക്തമാകും. (ഉദാഹരണത്തിന്: വണ്ടി ഓടിക്കാൻ പഠിക്കുമ്പോൾ തുടക്കത്തിൽ ബുദ്ധിമുട്ടാണെങ്കിലും പിന്നീട് അത് സ്വാഭാവികമായി ചെയ്യുന്നത് ഇതിനാലാണ്).

സ്ട്രോക്ക് മൂലമോ മറ്റ് അപകടങ്ങൾ മൂലമോ തലച്ചോറിന്റെ ചില ഭാഗങ്ങൾക്ക് തകരാർ സംഭവിച്ചാൽ, തകരാറിലായ ഭാഗങ്ങൾ ചെയ്തിരുന്ന ജോലികൾ ഏറ്റെടുക്കാൻ തലച്ചോറിലെ മറ്റ് ആരോഗ്യകരമായ ഭാഗങ്ങൾക്ക് ന്യൂറോപ്ലാസ്റ്റിസിറ്റി വഴി സാധിക്കുന്നു.

അതുപോലെ ഉപയോഗിക്കാത്ത നാഡീബന്ധങ്ങൾ കാലക്രമേണ ദുർബലമാവുകയും ഇല്ലാതാവുകയും ചെയ്യും.

സ്പോഞ്ച് പോലെ...

കുട്ടികളുടെ കാര്യത്തിൽ ന്യൂറോപ്ലാസ്റ്റിസിറ്റി ഏറ്റവും ഉയർന്ന നിലയിലായിരിക്കും. കുട്ടിക്കാലത്ത് തലച്ചോറ് ഒരു 'സ്പോഞ്ച്' പോലെയാണ് - ചുറ്റുമുള്ള അനുഭവങ്ങളെയും അറിവുകളെയും അത് വേഗത്തിൽ വലിച്ചെടുക്കുന്നു. മുതിർന്നവരെ അപേക്ഷിച്ച് കുട്ടികളുടെ തലച്ചോറിന് പുതിയ കാര്യങ്ങൾ പഠിക്കാനും മാറ്റങ്ങൾ ഉൾക്കൊള്ളാനുമുള്ള ശേഷി വളരെ കൂടുതലാണ്.

കുട്ടികളിലെ ന്യൂറോപ്ലാസ്റ്റിസിറ്റിയുടെ സവിശേഷതകൾ:
ജനിക്കുമ്പോൾ മുതൽ 2-3 വയസ്സുവരെ കുട്ടികളുടെ തലച്ചോറിൽ ഓരോ സെക്കൻഡിലും ലക്ഷക്കണക്കിന് പുതിയ നാഡീബന്ധങ്ങൾ (Synapses) ഉണ്ടാകുന്നു.

പിന്നീട്, ഉപയോഗിക്കാത്ത ബന്ധങ്ങളെ തലച്ചോറ് സ്വയം നീക്കം ചെയ്യുകയും കൂടുതലായി ഉപയോഗിക്കുന്നവയെ കൂടുതൽ ശക്തമാക്കുകയും ചെയ്യുന്നു (Synaptic Pruning).

ഭാഷകളും കഴിവുകളും എളുപ്പത്തിൽ പഠിക്കുന്നു.

കുട്ടിക്കാലത്ത് ന്യൂറോപ്ലാസ്റ്റിസിറ്റി ഉയർന്ന അളവിലായതിനാലാണ് കുട്ടികൾ ഒന്നിൽക്കൂടുതൽ ഭാഷകൾ വളരെ എളുപ്പത്തിൽ സംസാരിക്കാൻ പഠിക്കുന്നത്.

കുട്ടികളുടെ തലച്ചോറിന് പരിക്കുകളോ തടസ്സങ്ങളോ ഉണ്ടായാൽ അത് വീണ്ടെടുക്കാനുള്ള ശേഷി മുതിർന്നവരെക്കാൾ വളരെ കൂടുതലാണ്.

മാതാപിതാക്കൾക്ക് എന്തെല്ലാം ചെയ്യാം?
കുട്ടികളിലെ ന്യൂറോപ്ലാസ്റ്റിസിറ്റി വർദ്ധിക്കാൻ മാതാപിതാക്കൾക്ക് ചിലതൊക്കെ ചെയ്യാം.

• ഒളിച്ചുകളി, പസിലുകൾ, ബ്ലോക്കുകൾ തുടങ്ങിയവ അടുക്കൽ, കളിമണ്ണു കൊണ്ടുള്ള കളികൾ എന്നിവ കുട്ടികളുടെ തലച്ചോറിന്റെ പ്രവർത്തനം വർധിപ്പിക്കുന്നു.
• ചെറുപ്പത്തിലേ കഥകൾ പറഞ്ഞു കൊടുക്കുന്നതും പുസ്തകങ്ങൾ വായിക്കുന്നതും ഭാഷാശേഷിയും ചിന്താശേഷിയും കൂട്ടും.
• സ്നേഹവും സുരക്ഷിതത്വവും നിറഞ്ഞ അന്തരീക്ഷം നല്ല നാഡീബന്ധങ്ങൾ ഉണ്ടാക്കാൻ സഹായിക്കും. എന്നാൽ അമിതമായ മാനസികസമ്മർദ്ദവും ഭയവും കുട്ടികളുടെ തലച്ചോറിന്റെ വളർച്ചയെ പ്രതികൂലമായി ബാധിക്കാം.
• 'പരാജയപ്പെടുന്നത് കുഴപ്പമില്ല, വീണ്ടും ശ്രമിക്കാം' എന്ന ചിന്ത കുട്ടികളിൽ വളർത്തുമ്പോൾ അവരുടെ തലച്ചോറ് പ്രതിസന്ധികളെ മറികടക്കാൻ പഠിക്കുന്നു.
• ചുരുക്കിപ്പറഞ്ഞാൽ കുട്ടികൾക്ക് നമ്മൾ നൽകുന്ന നല്ല അനുഭവങ്ങളും പരിശീലനങ്ങളുമാണ് അവരുടെ ഭാവിയിലെ ബുദ്ധിയും സ്വഭാവവും രൂപപ്പെടുത്തുന്നത്.

Content Highlights: Neuroplasticity allows the brain to adapt, learn, and form new neural connections through experiences.