നടക്കാതെ ഒരുമുറിയിൽനിന്ന് മറ്റൊരുമുറിയിലേക്ക് പോകാനാകുമോ? കൃത്രിമമായി ഗുരുത്വാകർഷണം ഉണ്ടാക്കാമോ?

നടക്കാതെ ഒരുമുറിയിൽനിന്ന് മറ്റൊരുമുറിയിലേക്ക് നമുക്ക് പോകാൻ സാധിക്കുമോ? അന്താരാഷ്ട്ര ബഹിരാകാശനിലയത്തിൽ (ISS) താമസിക്കുകയും ജോലിചെയ്യുകയും ചെയ്യുന്ന ബഹിരാകാശയാത്രികർ ഒരുമുറിയിൽനിന്ന് മറ്റൊരുമുറിയിലേക്ക് നീന്തിയാണ് പോകാറുള്ളത്! എന്തുകൊണ്ടായിരിക്കും ഇങ്ങനെ? ബഹിരാകാശത്ത് ഭൂമിയിലുള്ളതുപോലെ ഗുരുത്വാകർഷണമില്ല. ബഹിരാകാശയാത്രികർ അവിടെ പൊങ്ങിക്കിടക്കുന്നതു കാണാൻ നല്ല രസമാണ്, അല്ലേ! എന്നാൽ, അവർക്കത് അനേകം ആരോഗ്യപ്രശ്നങ്ങൾ സൃഷ്ടിക്കുന്നുണ്ട്. അവിടെയാണ് കൃത്രിമഗുരുത്വാകർഷണത്തിന്റെ ആവശ്യം.

സീറോ ഗ്രാവിറ്റി
ഗുരുത്വാകർഷണമില്ലാതെ ബഹിരാകാശത്ത് താമസിക്കുന്നതിനെ നമുക്ക് സീറോ ഗ്രാവിറ്റി അവസ്ഥയിലുള്ള ജീവിതം എന്നുവിളിക്കാം. സീറോ ഗ്രാവിറ്റി ബഹിരാകാശയാത്രികർക്ക് ഗുരുതരമായ ആരോഗ്യപ്രശ്നങ്ങളുണ്ടാക്കുന്നു. ദീർഘനേരം ഈ അവസ്ഥയിൽ ബഹിരാകാശത്ത് തങ്ങിയാൽ പേശികളുടെ ശക്തി ക്രമേണ കുറയും. എല്ലുകളുടെ ബലം കുറയുകയും ഹൃദയവുമായി ബന്ധപ്പെട്ട പ്രശ്നങ്ങൾ ഉണ്ടാവുകയും ചെയ്യുന്നു. നമ്മുടെ കാഴ്ചശക്തിയെപ്പോലും ഇത് ബാധിക്കും.

ഇതെല്ലാം സാധാരണഗതിയിൽ നടക്കുന്നത്, ഭൂമിയിൽ ഗുരുത്വാകർഷണമുള്ളതുകൊണ്ടാണ്. കൃത്രിമഗുരുത്വാകർഷണം ഈ പ്രശ്നങ്ങൾ പലതും പരിഹരിക്കും. ഭൂമിയുടെ ഗുരുത്വാകർഷണത്തിന് സമാനമായ ഒരു ശക്തി സൃഷ്ടിക്കുന്നതിലൂടെ, ബഹിരാകാശയാത്രികർ നീണ്ട ദൗത്യങ്ങളിൽ കൂടുതൽ ആരോഗ്യത്തോടെയിരിക്കും. ഭാവിയിൽ ചൊവ്വപോലുള്ള ഗ്രഹങ്ങളിലേക്കുള്ള യാത്രകൾക്ക് അനേകം മാസങ്ങളെടുക്കും. ഈ നീണ്ട യാത്രകളിൽ ബഹിരാകാശയാത്രികരെ മാനസികമായി ശക്തരും ആരോഗ്യമുള്ളവരുമായി നിലനിർത്താൻ കൃത്രിമഗുരുത്വാകർഷണം സഹായിക്കും.

കൃത്രിമഗുരുത്വാകർഷണമുണ്ടാക്കുന്നതുമായി ബന്ധപ്പെട്ട്

ഇനിയും പരിഹരിക്കേണ്ടതായുള്ള ചില കാര്യങ്ങളുണ്ട്. അതിലൊന്നാണ് റൊട്ടേഷൻ ടോളറൻസ്. ആളുകൾക്ക് തലകറക്കമോ മറ്റ് പ്രശ്‌നങ്ങളോ അനുഭവപ്പെടാതെ ഒരു നിശ്ചിത അളവ് വരെ മാത്രമേ കറക്കം കൈകാര്യം ചെയ്യാൻ പറ്റൂ. അതുകൊണ്ട് പേടകം വേഗത്തിൽ കറക്കാൻ കഴിയില്ല.

മറ്റൊന്ന് ജി ഫോഴ്‌സ് ആണ്. പേടകം എത്ര വേഗത്തിൽ കറക്കുന്നുവോ അത്രയും കൂടുതൽ ഗുരുത്വാകർഷണബലം സൃഷ്ടിക്കപ്പെടും. എന്നാൽ, മേൽപ്പറഞ്ഞതുപോലെ വേഗത്തിൽ കറക്കുന്നതിന് ഒരുപാട് പരിമിതികളുണ്ട്. മൂന്നാമത്തെത് എൻജിനീയറിങ് വെല്ലുവിളികളാണ്. ഒരേ സമയം കറങ്ങാനും ഗുരുത്വാകർഷണം ഉണ്ടാക്കാനും കഴിയുന്ന പേടകം നിർമിക്കുന്നത് വളരെ സങ്കീർണമായതും ചെലവേറിയതുമായ പ്രക്രിയയാണ്.

എന്താണ് കൃത്രിമഗുരുത്വാകർഷണം?
ബഹിരാകാശത്ത് ഭൂമിയിലുള്ളതുപോലെ ഗുരുത്വാകർഷണം കൃത്രിമമായി സൃഷ്ടിക്കുന്നതിനെയാണ് കൃത്രിമഗുരുത്വാകർഷണം എന്നുപറയുന്നത്. നമുക്ക് ഭൂമിയിലുള്ളതുപോലുള്ള ഗുരുത്വാകർഷണം അതേപോലെ പകർത്താൻ കഴിയില്ലെങ്കിലും അപകേന്ദ്രബലമുപയോഗിച്ച് സമാനമായിട്ടുള്ള ഒരു പ്രഭാവം സൃഷ്ടിക്കാൻ കഴിയും.

എങ്ങനെ സാധ്യമാവുന്നു?
ഒരു കപ്പിൽ വെള്ളം നിറച്ച്, അത് വൃത്താകൃതിയിൽ കറക്കുമ്പോൾ വെള്ളം പുറത്തുപോകാത്തത് നിങ്ങൾ ശ്രദ്ധിച്ചിട്ടുണ്ടാവും. വെള്ളത്തെ അവിടെ പിടിച്ചുനിർത്തുന്നതിൽ അപകേന്ദ്രബലത്തിന്റെ സ്വാധീനമുണ്ട്. അപ്പോൾ നമുക്ക് ഒരു കറങ്ങുന്ന ബഹിരാകാശപേടകം നിർമിച്ചാൽ അതിനുള്ളിലെ ബഹിരാകാശസഞ്ചാരികൾക്ക് ഗുരുത്വാകർഷണത്തിന്റെ ഒരനുഭൂതി സൃഷ്ടിക്കാൻ സാധിക്കും.

ചക്രത്തിന്റെ ആകൃതിയിലുള്ള ഒരു പേടകം സൃഷ്ടിച്ചാൽ, ചക്രം കറങ്ങുമ്പോൾ ഉള്ളിലെ ബഹിരാകാശയാത്രികർക്ക് ബഹിരാകാശപേടകത്തിന് പുറംഭാഗത്തേക്ക് വലിച്ചെറിയപ്പെടുന്നതായി അനുഭവപ്പെടും. അതായത് ഭൂമിയിൽ വർത്തുളചലനത്തിലുള്ള ഒരു വസ്തു ഗുരുത്വാകർഷണത്താൽ വലിച്ചെറിയപ്പെടുന്നതുപോലെ ഒരനുഭവം അവർക്ക് അവിടെയുണ്ടാകുന്നു.

Content Highlights: Zero gravity leads to muscle atrophy, bone density loss, and cardiovascular issues for astronauts.