ചീഞ്ഞ പഴത്തിന്റെ മണം, ക്ലാസില് തലകറങ്ങി വീഴുന്ന കുട്ടികള്; ഇറാനിലെ വിഷവാതകപ്രയോഗത്തിന് പിന്നിലാര്?
ഇറാന്റെ തലസ്ഥാനമായ ടെഹ്റാന് തെക്ക് ഭാഗത്തുള്ള ഖൂം നഗരത്തിലെ നൗര് ടെക്നിക്കല് സ്കൂളില് കുട്ടികള് പഠനത്തിരക്കിലാണ്. അതിനിടയിലെപ്പഴോ ഒരു പൊട്ടിത്തെറി ശബ്ദം കേട്ടതായി അവര്ക്ക് തോന്നി. പിന്നാലെ അത്ര സുഖകരമല്ലാത്തൊരു ഗന്ധം അന്തരീക്ഷത്തില് വ്യാപിച്ചു. അതോടെ കുട്ടികളില് ചിലര്ക്ക് അസ്വസ്ഥതകള് അനുഭവപ്പെട്ടു തുടങ്ങി. ചിലര്ക്ക് തലകറങ്ങുന്നത് പോലെ തോന്നി. ശ്വാസതടസ്സവും ഛര്ദ്ദിയും ഉണ്ടായി, ഒപ്പം ശരീരം തളരുന്നത് പോലെയുള്ള അനുഭവം. നൗര് സ്കൂളിലെ 18 പെണ്കുട്ടികള്ക്കാണ് ആരോഗ്യപ്രശ്നങ്ങളുണ്ടായത്. അസ്വസ്ഥതകള് അനുഭവപ്പെട്ട കുട്ടികളെ അടുത്തുള്ള ആശുപത്രിയിലേക്ക് മാറ്റി. ചിലരുടേത് ചെറിയ അരോഗ്യ പ്രശ്നങ്ങളായിരുന്നതിനാല് പ്രഥമശുശ്രൂഷ നല്കി. മറ്റു ചില പെണ്കുട്ടികളുടേത് കുറച്ചുകൂടി ഗുരുതരമായ പ്രശ്നങ്ങളായിരുന്നു. അവരെ നിരീക്ഷണ വിഭാഗത്തിലേക്ക് മാറ്റി. പിന്നാലെ രാജ്യത്തെ മറ്റ് നഗരങ്ങളിലെ പല സ്കൂളുകളിലും സമാനമായ സംഭവങ്ങള് ആവര്ത്തിച്ചു. അതിലധികവും ബാധിക്കപ്പെട്ടത് പെണ്കുട്ടികളെയാണ് എന്നതാണ് വിഷയത്തെ ഗുരുതരമാക്കിയത്.
രാജ്യത്തെ പെണ്കുട്ടികളെ ലക്ഷ്യംവെച്ചുകൊണ്ടുള്ള വിഷവാതക ആക്രമണമാണ് ഇതെന്ന റിപ്പോര്ട്ടുകള് പ്രചരിച്ചു തുടങ്ങി. നവംബര് മാസത്തിന്റെ അവസാനത്തില് തുടങ്ങിയ വിഷവാതക ആക്രമണത്തില് 21 പ്രവിശ്യകളിലായി 830 കുട്ടികള്ക്ക് ഇതുവരെ വിഷബാധയേറ്റെന്നാണ് സ്ഥിരീകരിക്കാത്ത വിവരം. എന്നാല്, സംഖ്യ ഇതിലും കൂടുതലാണെന്നാണ് പുറത്തുവരുന്ന വിവരങ്ങള്. 1200 പെണ്കുട്ടികള് വിഷവാതക പ്രയോഗത്തിനിരയായെന്നാണ് ഒരു പാര്ലമെന്റംഗം വെളിപ്പെടുത്തിയത്. പക്ഷേ, എന്തുകൊണ്ട് പെണ്കുട്ടികളെ ലക്ഷ്യമിട്ട് ഇത്തരത്തിലൊരു ആക്രമണം? ആ ചോദ്യമാണ് ഇറാനിലെ മനുഷ്യാവകാശ പ്രവര്ത്തകര് ഉയര്ത്തിയത്. നിയമാനുസൃതം തല മറയ്ക്കാത്തതിന് മതകാര്യ പോലീസ് അറസ്റ്റുചെയ്ത മഹ്സ അമീനി കസ്റ്റഡിയില് മരിച്ചതിനെത്തുടര്ന്ന് ഇറാനില് സെപ്റ്റംബര് മുതല് സ്ത്രീകളുടെ നേതൃത്വത്തില് പ്രക്ഷോഭങ്ങള് നടക്കുകയാണ്. ഇതിന് പിന്നാലെയാണ് പെണ്കുട്ടികളെ ലക്ഷ്യംവെച്ചുള്ള വിഷവാതകപ്രയോഗം. ഇതിനെ രണ്ടിനേയും കൂട്ടിവായിക്കുകയാണ് മനുഷ്യാവകാശപ്രവര്ത്തകര്.
Content Highlights: Hundreds of Iranian schoolgirls fall victim of mysterious poisonings