രഹസ്യചർച്ച, 6 ലക്ഷം കോടിക്ക് ടാറ്റയുടെ ബിഗ് ഡീൽ; പേരുദോഷംമാറ്റാൻ എയർഇന്ത്യ, നേട്ടം ആർക്ക്?

മാസ്സ് എന്ന് പറഞ്ഞാൽ പോര മരണമാസ്. ടാറ്റയുടെ ചിറകിലേറിയുള്ള എയർ ഇന്ത്യയുടെ തിരിച്ചുവരവിനെ ഇങ്ങനെ വിശേഷിപ്പിച്ചാലും തെറ്റില്ല. നഷ്ടത്തിലേക്ക് കൂപ്പുകുത്തി കേന്ദ്രസർക്കാർ വിറ്റഴിച്ച എയർ ഇന്ത്യയ്ക്ക് ഇങ്ങനെയൊരു തിരിച്ചുവരവുണ്ടാകുമെന്ന് എതിരാളികൾ പോലും കരുതിക്കാണില്ല. ലോകത്തെ മുൻനിര വിമാനക്കമ്പനികളെ പോലും ഞെട്ടിച്ചാണ് 470 പുതിയ വിമാനങ്ങൾ വാങ്ങാനുള്ള വമ്പൻ കരാറിൽ എയർ ഇന്ത്യ ഒപ്പിട്ടത്. ഫ്രഞ്ച് വിമാന നിർമാണക്കമ്പനിയായ എയർബസ്, അമേരിക്കൻ കമ്പനിയായ ബോയിങ് എന്നിവയുമായാണ് കരാർ. ലോക വ്യോമയാന ചരിത്രത്തിലെ തന്നെ ഏറ്റവും വലിയ ഒറ്റത്തവണ വിമാനം വാങ്ങൽ കരാറാണിത്. ഇതോടെ ആഗോള വ്യോമയാന മേഖലയിലെ മുൻനിര ശക്തികളിലൊന്നായി എയർ ഇന്ത്യ മാറും.

സുപ്രധാന കരാർ ഇന്ത്യൻ വ്യോമയാന മേഖലയ്ക്ക് മാത്രമല്ല യുഎസിനും ഫ്രാൻസിനും ബ്രിട്ടണും വലിയ നേട്ടമാണ് സമ്മാനിച്ചത്. ഈ മൂന്ന് രാജ്യങ്ങളിലും ലക്ഷക്കണക്കിന് പുതിയ തൊഴിൽ സൃഷ്ടിക്കാൻ കരാർ വഴിയൊരുക്കും. ഒരു ഇന്ത്യൻ കമ്പനിയുടെ ഇടപാട് വഴി സമ്പന്ന രാജ്യങ്ങളിൽ ഇത്രയധികം പേർക്ക് ജോലി ലഭിക്കുമെന്നത് ഒട്ടും ചെറിയ കാര്യമല്ല. ഇടപാടിന് പിന്നാലെ യുഎസും ഫ്രാൻസും ബ്രിട്ടണും ഇന്ത്യയെ പ്രകീർത്തിച്ച് രംഗത്തെത്തിയതും കരാർ വഴി അവർക്ക് എത്രമാത്രം നേട്ടമുണ്ടെന്നതിന്റെ തെളിവാണ്. ലോക വ്യോമയാന മേഖലയിലും കരാർ വലിയ സാധ്യതകൾ തുറക്കും. ഇന്ത്യയുടെ സാമ്പത്തിക-തൊഴിൽ-വിനോദ സഞ്ചാര മേഖലകളിലും ഇത് പ്രതിഫലിക്കും. 

Content Highlights: how air indias largest flight deal with airbus and boeing wii affect the world