പരിഹാരം ദ്വിരാഷ്ട്രം; സാധാരണക്കാരെ കൊല്ലുന്ന യുദ്ധം അവസാനിപ്പിക്കണം | പ്രതിഭാഷണം

നൂറു വര്‍ഷത്തിലേറെയായി ആധുനിക പലസ്തീന്‍ പ്രശ്‌നം ആരംഭിച്ചിട്ട്. ഇന്ന് എണ്ണ ഒഴുകുന്ന ഗള്‍ഫ് മേഖല പത്തൊമ്പതാം നൂറ്റാണ്ടില്‍ ഉറങ്ങിക്കിടന്ന പ്രദേശമായിരുന്നു. അക്കാലത്ത്‌ ലോകാധിപത്യം നിസ്സംശയം കൈവശം വെച്ചിരുന്ന ബ്രിട്ടണെ സംബന്ധിച്ചിടത്തോളം അവര്‍ക്ക് വേണ്ട ഇരുമ്പും കല്‍ക്കരിയും അവരുടെ കൊച്ചുദ്വീപില്‍ തന്നെ ധാരാളമായി ഉണ്ടായിരുന്നു. അതു കണ്ടെത്താനും അതു കൊണ്ടുണ്ടാക്കിയ ചരക്കുകള്‍ വിറ്റഴിക്കാനും ലോകമെമ്പാടും അവര്‍ കീഴടക്കുകയും ഇന്ത്യയില്‍ എന്ന പോലെ പലയിടത്തും ഭരണാധികാരികളാവുകയും ചെയ്തു. സൂര്യനസ്തമിക്കാത്ത ബ്രിട്ടീഷ് സാമ്രാജ്യം എന്ന പേര് അവര്‍ക്ക് ലഭിച്ചു. ഇന്നും കോമണ്‍വെല്‍ത്തില്‍ സൂര്യന്‍ അസ്തമിക്കുന്നില്ല. 

പക്ഷേ, 20-ാം നൂറ്റാണ്ടിന് വേണ്ട എണ്ണ അവര്‍ക്കുണ്ടായിരുന്നില്ല. അമേരിക്കയ്ക്കും റഷ്യയ്ക്കും അത് 19-ാം നൂറ്റാണ്ടില്‍ തന്നെ കണ്ടെത്താന്‍ കഴിഞ്ഞിരുന്നുതാനും. ഇതിന്റെ അടിസ്ഥാനത്തിലാണ് ഒന്നാം ലോക മഹായുദ്ധ കാലത്ത് എണ്ണയുണ്ടെന്ന് മനസ്സിലാക്കിയ പശ്ചിമേഷ്യയില്‍ വേരുറപ്പിക്കാന്‍ ബ്രിട്ടണ്‍ തീരുമാനിക്കുന്നത്. അതിന്റെ ഭാഗമായി യൂറോപ്പിലെ ഒന്നാം ലോക മഹായുദ്ധത്തിന്റെ പ്രധാന സഖ്യശക്തികളായ അവര്‍ കേന്ദ്രീയ ശക്തികളായ ഓട്ടമനെതിരായ യുദ്ധം  സമര്‍ഥമായി പ്ലാന്‍ ചെയ്തു. 

Content Highlights: Israel-Hamas War, Two nation Solution, Prathibhashanam by CP John