ഉയർത്തണം വാഗമണ്ണിനെ അന്താരാഷ്ട്ര നിലവാരത്തിലേക്ക്

വാഗമൺ : പ്രകൃതിസൗന്ദര്യംകൊണ്ടും കാലാവസ്ഥകൊണ്ടും വാഗമൺ അന്താരാഷ്ട്ര നിലവാരത്തിലുള്ള ഒരു വിനോദസഞ്ചാരകേന്ദ്രമാണ്. എന്നാൽ, ഒരുപാട് ആവശ്യങ്ങൾ വാഗമണ്ണിനുണ്ട്.

ഒരു അന്താരാഷ്ട്ര നിലവാരത്തിലുള്ള പ്രധാന വിനോദസഞ്ചാരകേന്ദ്രമായി വാഗമണ്ണിനെ ഉയർത്തിക്കൊണ്ടുവരുമ്പോഴും വാഗമണ്ണിന്റെ ആവശ്യങ്ങൾ നിറവേറ്റപ്പെടുന്നില്ല.

റോഡുകളിലെ പ്രശ്നങ്ങൾ

ചുരം റോഡുകളിലെ വീതിക്കുറവും തിരക്കും ഗതാഗത തടസ്സമുണ്ടാക്കുന്നു. ഏറ്റവും അടുത്തുള്ള നെടുമ്പാശ്ശേരി വിമാനത്താവളം, കോട്ടയം റെയിൽവേ സ്റ്റേഷൻ എന്നിവിടങ്ങളിൽനിന്ന് നേരിട്ട് എളുപ്പത്തിൽ എത്തിച്ചേരാൻ ഗതാഗത സംവിധാനങ്ങളുടെ കുറവ് അനുഭവപ്പെടുന്നു.

മണ്ണൊലിപ്പും അനിയന്ത്രിത നിർമാണങ്ങളും

പുൽമേടുകളും കുന്നുകളും അനിയന്ത്രിതമായി വെട്ടിപ്പൊളിച്ചുള്ള കെട്ടിടനിർമാണങ്ങൾ വാഗമണ്ണിന്റെ സ്വാഭാവിക ഭംഗിയെ ബാധിക്കുന്നു. അനിയന്ത്രിതമായ മണ്ണെടുപ്പും പ്രകൃതി ചൂഷണവും പ്രകൃതി ദുരന്തങ്ങൾക്ക് വഴിയൊരുക്കുന്നു. ഇത് വലിയ അപകടസാധ്യതയുണ്ടാക്കുന്നു.

മാലിന്യ സംസ്‌കരണം

വിനോദസഞ്ചാരികൾ തള്ളുന്ന പ്ലാസ്റ്റിക്, അഴുക്കുവെള്ളം എന്നിവ കുരിശുമല, പുൽമേടുകൾ, പൈൻ ഫോറസ്റ്റ് തുടങ്ങിയ സംരക്ഷിത മേഖലകളുടെ ആവാസവ്യവസ്ഥയ്ക്ക് ഭീഷണിയാകുന്നു. ദിനംപ്രതി നൂറകണക്കിന് വിനോദസഞ്ചാരികൾ എത്തുന്ന വാഗണ്ണിൽ മാലിന്യ സംസ്‌കരണത്തിന് കൃത്യമായ സംവിധാനങ്ങൾ ഒരുക്കണം.

അന്താരാഷ്ട്ര ബ്രാൻഡിങ്ങിന്റെ അപര്യാപ്തത

മൂന്നാർ, ആലപ്പുഴ, തെക്കടി എന്നിവപോലെ അന്താരാഷ്ട്ര വിപണിയിൽ വാഗമണ്ണിന് ഒരു തനിമയുള്ള ബ്രാൻഡ് ഇമേജ് സൃഷ്ടിക്കാൻ സാധിച്ചിട്ടില്ല. സേവനങ്ങളുടെ നിലവാരം

വിദേശഭാഷ സംസാരിക്കുന്ന അംഗീകാരമുള്ള ഗൈഡുകൾ, വിദേശനാണയ വിനിമയം, തടസ്സമില്ലാത്ത ഡിജിറ്റൽ പേയ്മെന്റുകൾ, മികച്ച ഹൈ-സ്പീഡ് കണക്റ്റിവിറ്റി എന്നിവയുടെ പോരായ്മകൾ എന്നിവ വാഗമണ്ണിനുണ്ട്.

വാഗമണ്ണിനെ ലോകോത്തര കേന്ദ്രമാക്കി മാറ്റാനായി ഒരു കമ്യൂണിറ്റി-ഇക്കോ ടൂറിസം മാതൃക വേണ്ടാതായിട്ടുണ്ട്. ഹരിത ചെക്ക് പോസ്റ്റുകൾ കൂടുതൽ ശക്തമാക്കി പ്ലാസ്റ്റിക് രഹിത മേഖലയായി നിർണയിക്കണം. പ്രാദേശിക കർഷകർ, ഹോംസ്റ്റേ ഉടമകൾ, കച്ചവടക്കാർ എന്നിവർക്ക് ടൂറിസത്തിൽനിന്ന് നേരിട്ട് സാമ്പത്തിക നേട്ടം ലഭിക്കുന്നു എന്ന് ഉറപ്പാക്കണം.

നിലവിലുള്ള പാരാഗ്ലൈഡിങ്‌ ഫെസ്റ്റിവലുകൾ കൂടുതൽ വിപുലീകരിക്കുകയും അന്താരാഷ്ട്ര അഡ്വഞ്ചർ ചാമ്പ്യൻഷിപ്പുകൾ സംഘടിപ്പിക്കുകയും ചെയ്യുക.

ഇന്ത്യയിലെ ഏറ്റവും നീളമേറിയ ക്യാന്റിലിവർ ഗ്ലാസ് ബ്രിഡ്ജ് പോലെ കൂടുതൽ സുരക്ഷിതവും ആകർഷകവുമായ സാഹസിക വിനോദങ്ങൾ ക്രമീകരിക്കുക വാഗമണ്ണിന്റെ തണുത്ത കാലാവസ്ഥ പ്രയോജനപ്പെടുത്തി വിദേശ സഞ്ചാരികൾക്കായി ഉയർന്ന നിലവാരത്തിലുള്ള ആയുർവേദ, വെൽനസ് റിസോർട്ടുകൾ പ്രോത്സാഹിപ്പിക്കുക. വിമാനത്താവളങ്ങളിൽനിന്ന്‌ കോട്ടയം/എറണാകുളം റെയിൽവേ സ്റ്റേഷനുകളിൽനിന്നും വാഗമണ്ണിലേക്ക് നേരിട്ടുള്ള ആഡംബര ഫീഡർ ബസുകൾ/ടൂറിസ്റ്റ് കാറുകൾ ലഭ്യമാക്കുക.

പരിസ്ഥിതിക്ക് തടസ്സമാകുന്ന സ്ഥിരം കെട്ടിടങ്ങൾ ഒഴിവാക്കി മൊബൈൽ ഹോമുകൾക്കും കാരവാനുകൾക്കും വേണ്ടിയുള്ള പാർക്കുകൾ ഒരുക്കുക. കേരള ടൂറിസം, ഇടുക്കി ഡി.ടി.പി.സി. സംയുക്തമായി അന്താരാഷ്ട്ര ട്രാവൽ എക്സ്‌പോകളിൽ വാഗമണ്ണിന്റെ ‘മിസ്റ്റി മെഡോസ്’ സൗന്ദര്യം പരിചയപ്പെടുത്തുക. പ്രകൃതിദത്തമായ കുന്നുകളെയും പുൽമേടുകളെയും മാറ്റമില്ലാതെ സംരക്ഷിച്ചുകൊണ്ട് നടപ്പാക്കുന്ന സുസ്ഥിര വികസനം മാത്രമാണ് വാഗമണ്ണിനെ ലോക ടൂറിസം ഭൂപടത്തിൽ മുൻനിരയിലെത്തിക്കാനുള്ള ഏറ്റവും മികച്ച വഴി.