ഭാവിയിൽ കാൻസറിൽ നിന്ന് പൂർണമുക്തിയോ?; mRNA വാക്സിൻ വികസിപ്പിച്ച് ഗവേഷകർ, പ്രതീക്ഷ

കാൻസർ രോ​ഗപ്രതിരോധത്തിൽ നിർണായക കണ്ടെത്തലുമായി ​ഗവേഷകർ. ട്യൂമറുകൾക്കെതിരെയുള്ള ശരീരത്തിൻ്റെ രോഗപ്രതിരോധ ശേഷി വർധിപ്പിക്കുന്ന ഒരു mRNA ​ഗവേഷകർ വാക്സിൻ വികസിപ്പിച്ചെടുത്തതായാണ് റിപ്പോർട്ടുകൾ. ഫ്ലോറിഡ സർവകലാശാലയിലെ ശാസ്ത്രജ്ഞരാണ് ഇതിന് പിന്നിൽ. 

നേച്ചർ ബയോമെഡിക്കൽ എഞ്ചിനീയറിങ്ങിലാണ് ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്. എലികളിലാണ് ആദ്യമായി പരീക്ഷണം നടത്തിയത്. ഇമ്മ്യൂൺ ചെക്ക്പോയിൻ്റ് ഇൻഹിബിറ്ററുകൾ എന്നറിയപ്പെടുന്ന സാധാരണ ഇമ്മ്യൂണോതെറാപ്പി മരുന്നുകളുമായി സംയോജിപ്പിക്കുമ്പോൾ ഈ വാക്സിൻ അവയിൽ ശക്തമായ ആൻ്റിട്യൂമർ ഫലങ്ങൾ ഉണ്ടാക്കിയതായി റിപ്പോർട്ടിൽ പറയുന്നു. 

ഈ വാക്സിൻ പ്രത്യേക ട്യൂമർ പ്രോട്ടീനുകളെ ലക്ഷ്യമിടുന്നില്ല എന്നതും പുതിയ കണ്ടെത്തലിൽ പ്രതീക്ഷ നൽകുന്ന കാര്യമാണ്. പകരം, ഒരു വൈറസിനെതിരെ പോരാടുന്നതുപോലെ ഒരു രോ​ഗപ്രതിരോധ സംവിധാനത്തെ സൃഷ്ടിക്കാനാണ് ശ്രമിക്കുന്നത്. ശസ്ത്രക്രിയ, റേഡിയേഷൻ, കീമോതെറാപ്പി എന്നിവയെ ആശ്രയിക്കാതെ കാൻസർ ചികിത്സിക്കുന്നതിനുള്ള ഒരു പുതിയ മാർ​ഗമായിരിക്കും ഈ കണ്ടെത്തലെന്ന് പ്രധാന ഗവേഷകൻ ഡോ. എലിയാസ് സയൂർ അറിയിച്ചു. കൂടാതെ, നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്ത് അടക്കമുള്ള  പ്രമുഖ സ്ഥാപനങ്ങളും ഈ പഠനത്തിന് പിന്തുണ നൽകുന്നുണ്ട്. 

ഭാവിയിൽ മനുഷ്യരിൽ നടത്തുന്ന പഠനങ്ങളിൽ സമാനമായ ഫലങ്ങൾ കാണിക്കുകയാണെങ്കിൽ ചികിത്സിക്കാൻ പ്രയാസമുള്ളതും ചികിത്സയെ പ്രതിരോധിക്കുന്നതുമായ പലതരം അർബുദങ്ങളെ മാറ്റിയെടുക്കാൻ ഈ വാക്സിന് സാധിച്ചേക്കുമെന്ന് പ്രതീക്ഷയിലാണ് ​ഗവേഷകർ. 
 

Content Highlights: Scientists Develop Revolutionary mRNA Vaccine