മില്ലേനിയൽസ്, ജെൻസി തലമുറകളിൽ കാൻസർ സാധ്യത കൂടുതലെന്ന് ഗവേഷകർ

സാങ്കേതികരം​ഗത്തെ വിപ്ലവകരമായ പലമാറ്റങ്ങൾക്കും സാക്ഷ്യം വഹിച്ചിട്ടുള്ള തലമുറകളാണ് മില്ലേനിയൽസും ജെൻസികളും. ഇക്കൂട്ടരിൽ കാൻസർ സാധ്യത കൂടുതലാണെന്ന പഠനമാണ് ഇപ്പോൾ പുറത്തുവന്നിരിക്കുന്നത്. ലാൻസെറ്റ് പബ്ലിക് ഹെൽത്ത് എന്ന ജേർണലിലാണ് ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്. അമേരിക്കൻ കാൻസർ സൊസൈറ്റിയിലെയും കാൽ​​ഗറി സർവകലാശാലയിലെയും ​ഗവേഷകരാണ് പഠനം നടത്തിയത്.

1981 മുതൽ 1996 വരെയുള്ള കാലയളവിൽ ജനിച്ചവരാണ് മില്ലേനിയൽസ് വിഭാ​ഗത്തിൽപ്പെടുന്നത്. അതായത് നിലവിൽ ഇരുപത്തിയാറ് മുതൽ നാൽപത്തിയൊന്നു വരെ പ്രായമുള്ളവർ. 1997 മുതൽ 2012 വരെ കാലയളവിൽ ജനിച്ചവരാണ് ജെൻസി (Gen Z)കൾ. അതായത് 12 മുതൽ 27 വയസ്സുവരെ പ്രായമുള്ളവർ. ഓ​ഗസ്റ്റ് ഒന്നിന് അമേരിക്കൻ കാൻസർ സൊസൈറ്റി പുറത്തുവിട്ട റിപ്പോർട്ടിലാണ് മില്ലേനിയൽസ്, ജെൻസി വിഭാ​ഗത്തിനിടയിൽ കാൻസർ സാധ്യത കൂടുതലാണെന്ന് വ്യക്തമാക്കിയിരിക്കുന്നത്. 

പതിനേഴുതരത്തിലുള്ള കാൻസറുകൾ ഈ തലമുറകൾക്കിടയിൽ കൂടുതലാണെന്നാണ് പഠനത്തിൽ വ്യക്തമാക്കിയിരിക്കുന്നത്. കോളറെക്റ്റം, ​ഗാൾബ്ലാഡർ, കിഡ്നി, പാൻക്രിയാസ്, ലുക്കീമിയ, ഓവറി, ലിവർ തുടങ്ങിയ പതിനേഴിനം കാൻസറുകളാണ് കൂടുതലായി കണ്ടെത്തിയത്. ചെറുപ്പത്തിലേ കാൻസറിന് കാരണമാകുന്ന വസ്തുക്കളുമായുള്ള അടുത്തിടപഴകലാണ് അമ്പതുവയസ്സും അതിനുതാഴെയും പ്രായമുള്ളവരിൽ അർബുദം സ്ഥിരീകരിക്കുന്നതിന് പിന്നിലെന്ന് ​ഗവേഷകർ പറയുന്നു. 

അമേരിക്കയിൽ നിന്നുള്ള ഡേറ്റയെ ആധാരമാക്കിയാണ് പഠനം നടത്തിയത്. എന്നാൽ ഇന്ത്യയുടെ കാര്യത്തിലും കണക്കുകൾ വ്യത്യസ്തമല്ലെന്നാണ് ഡൽഹി സ്റ്റേറ്റ് കാൻസർ ഇൻസ്റ്റിറ്റ്യൂട്ട് പുറത്തുവിട്ട റിപ്പോർട്ടിൽ പറയുന്നത്. മുപ്പത്തിയൊന്നിനും നാൽപതിനും ഇടയിൽ പ്രായമുള്ളവരിൽ മലാശയ അർബുദം കൂടുതലാണെന്ന് പ്രസ്തുത റിപ്പോർട്ടിൽ പറയുന്നുണ്ട്. പുരുഷന്മാരിൽ ശ്വാസകോശ അർബുദവും സ്ത്രീകളിൽ സ്തനാർബുദവും കൂടുന്നുവെന്നും റിപ്പോർട്ടിലുണ്ട്. 

ഓരോരുത്തരുടേയും പ്രായവും കാൻസർ സ്ഥിരീകരണവും മരണനിരക്കുമൊക്കെയാണ് പരിശോധിച്ചത്. ജീവിതരീതിയിലുണ്ടായ മാറ്റവും അന്തരീക്ഷമലിനീകരണവുമൊക്കെ ഈ തലമുറകൾക്കിടയിൽ കാൻസർ നിരക്ക് കൂട്ടാനിടയായിരിക്കുമെന്ന് ​ഗവേഷകർ പറയുന്നു. ഭക്ഷണരീതി ആരോ​ഗ്യകരമാക്കുക, കാൻസർ സ്ക്രീനിങ്ങുകൾ പതിവാക്കുക, വ്യായാമം ശീലമാക്കുക, ദുശ്ശീലങ്ങൾ ഉപേക്ഷിക്കുക തുടങ്ങിയവയിലൂടെ പലയിനം കാൻസറുകളേയും പ്രതിരോധിക്കാമെന്നും ​ഗവേഷകർ പറയുന്നുണ്ട്.

2050 ആകുമ്പോഴേക്കും കാൻസർ രോ​ഗികളുടെ കുത്തനെ ഉയരുമെന്നും 35ദശലക്ഷം പുതിയ രോ​ഗികളുണ്ടാകുമെന്നും അടുത്തിടെ ലോകാരോ​ഗ്യസംഘടന പുറത്തുവിട്ട റിപ്പോർട്ടിൽ വ്യക്തമാക്കിയിരുന്നു.  ലോകാരോ​ഗ്യസംഘടനയുടെ ഭാ​ഗമായ ഐ.എ.ആർ.സി. ( International Agency for Research on Cancer) നടത്തിയ ​ഗവേഷണത്തിലാണ് ഇതേക്കുറിച്ച് കണ്ടെത്തിയത്. 

ഓരോ രാജ്യങ്ങളും തങ്ങളുടെ ആരോ​ഗ്യ പദ്ധതികളിൽ കാൻസറിന് പ്രാമുഖ്യം നൽകുന്നത് ​രോ​ഗപ്രതിരോധത്തിന് ​ഗുണംചെയ്യുമെന്നാണ് ലോകാരോ​ഗ്യസംഘടന അന്ന് പറഞ്ഞത്. കൂടാതെ ജീവിതശൈലിയിൽ മാറ്റങ്ങൾ വരുത്തി വ്യക്തിപരമായി ഉണ്ടാകാനിടയുള്ള അപകടസാധ്യതാഘടകങ്ങൾ കുറയ്ക്കാമെന്നും പുകവലിശീലം നിർത്തുന്നതിലൂടെ പലയിനം കാൻസറുകളെയും പ്രതിരോധിക്കാനാവുമെന്നും പറഞ്ഞിരുന്നു. ആരോ​ഗ്യകരമായ ഭക്ഷണശീലം തുടരുന്നതും ആരോ​ഗ്യകരമായ ഭാരം നിലനിർത്തുന്നതും മദ്യോപഭോ​ഗം കുറയ്ക്കുന്നതുമൊക്കെ ​ഗുണംചെയ്യുമെന്നും കൂടാതെ ലക്ഷണങ്ങൾ കണ്ടാൽ സ്ക്രീനിങ്ങുകൾ ചെയ്യാനും വിദ​ഗ്ധസേവനങ്ങൾ തേടാനും മടികാണിക്കരുതെന്നും ലോകാരോ​ഗ്യസംഘടന വ്യക്തമാക്കുകയുണ്ടായി. 

Content Highlights: millennials and gen z are at a higher cancer risk