'മടി'യാണെന്ന് കരുതുന്ന കാര്യങ്ങൾ ശരീരത്തിന്റെ മുന്നറിയിപ്പുകളാകാം; ഒറ്റരോഗമല്ല കാർഡിയോമെറ്റബോളിക്

'ഇപ്പോൾ എനിക്ക് മടിയേറെയാണെന്ന് തോന്നുന്നു...'' സമീപകാലങ്ങളിൽ ആശുപത്രിയിൽ പതിവായി കേൾക്കുന്ന വാക്കുകളാണിത്. എന്നാൽ കുറച്ച് വിശദമായി ചോദിച്ചാൽ മനസ്സിലാകും, അത് വെറും മടിയല്ല. ദിവസേന അനുഭവിക്കുന്ന ക്ഷീണം, വയറിന് ചുറ്റുമുള്ള കൊഴുപ്പ്, പരിശോധനയിൽ ചെറിയതോതിൽ രക്തത്തിലെ പഞ്ചസാരയും രക്തസമ്മർദവും ഉയരുന്നത് തുടങ്ങിയവയെല്ലാം ഒറ്റപ്പെട്ട കാര്യങ്ങളല്ല. പലപ്പോഴും ഇവ ഒരേ ദിശയിലേക്കാണ് സൂചന നൽകുന്നത്, കാർഡിയോമെറ്റബോളിക് പ്രശ്‌നങ്ങൾ എന്ന മേഖലയിലേക്കുള്ള മുന്നറിയിപ്പാണിത്. ആരോഗ്യമേഖലയിൽ നിശ്ശബ്ദമായി വളരുന്ന ഒന്നാണ് കാർഡിയോമെറ്റബോളിക് പ്രശ്‌നങ്ങൾ.

കാർഡിയോമെറ്റബോളിക് എന്നത് ഒറ്റരോഗമല്ല. പ്രമേഹം, ഉയർന്ന രക്തസമ്മർദം, കൊളസ്ട്രോൾ അസന്തുലിതാവസ്ഥ, വയറിന് ചുറ്റുമുള്ള അമിതവണ്ണം എന്നിവയെല്ലാം ഒരുമിച്ച് കാണുന്ന അവസ്ഥയാണ് ഇത്. ഓരോന്നായി നോക്കുമ്പോൾ ചെറിയ പ്രശ്‌നങ്ങളായി തോന്നാം. എന്നാൽ ഒരുമിച്ചാൽ ഹൃദ്രോഗം, സ്ട്രോക്ക് പോലുള്ള ഗുരുതരമായ അവസ്ഥകൾക്ക് വഴിയൊരുക്കുമെന്നതാണ് ഇവിടെ ശ്രദ്ധിക്കേണ്ട കാര്യം.

ഇത് ഒരുദിവസംകൊണ്ട് ഉണ്ടാകുന്നതല്ല. വ്യായാമക്കുറവ്, വേഗത്തിൽ ലഭിക്കുന്ന ഭക്ഷണശീലം, ഉറക്കക്കുറവ്, മാനസിക സമ്മർദം എന്നിങ്ങനെ ചെറിയ ജീവിതശൈലീ മാറ്റങ്ങൾ ചേർന്നാണ് ഇത് പതുക്കെ രൂപപ്പെടുന്നത്. പുറത്തേക്ക് വ്യക്തമായ പ്രശ്‌നമൊന്നും തോന്നാതിരുന്നാലും ശരീരത്തിനുള്ളിൽ മാറ്റങ്ങൾ സംഭവിച്ചുകൊണ്ടിരിക്കും.

കാർഡിയോമെറ്റബോളിക്കിൽ പ്രത്യേകിച്ച് ശ്രദ്ധിക്കേണ്ടത് ഇതിന് പലപ്പോഴും വ്യക്തമായ ലക്ഷണങ്ങൾ ഉണ്ടാകണമെന്നില്ല എന്നതാണ്. എപ്പോഴും ക്ഷീണം അനുഭവപ്പെടുന്നത്, വയറിന് ചുറ്റുമുള്ള കൊഴുപ്പ് കൂടുന്നത്, ബോർഡർലൈൻ പരിശോധനാഫലങ്ങൾ, ഭാരം പതുക്കെ വർധിക്കുന്നത് എന്നിവയെല്ലാം ശരീരം നൽകുന്ന മുന്നറിയിപ്പുകളാണ്. ഇന്ന് ഇത്തരം പ്രശ്‌നങ്ങൾ ചെറുപ്പക്കാരിലും കൂടുതലായി കണ്ടുവരുന്നു. പുറമേ ആരോഗ്യമുള്ളവരായി തോന്നുന്നവർക്കും ശരീരത്തിനുള്ളിൽ കൊഴുപ്പ് കൂടിയിരിക്കാം. അതുകൊണ്ടുതന്നെ ''എനിക്ക് പ്രശ്‌നമൊന്നുമില്ല'' എന്ന ധാരണ ശരിയായിരിക്കണമെന്നില്ല.

കാർഡിയോമെറ്റബോളിക് പ്രശ്‌നങ്ങളിൽ ഒരുകാരണവശാലും ഭയപ്പെടേണ്ട കാര്യമില്ല. സമയത്ത് ശ്രദ്ധിച്ചാൽ ഇത് നിയന്ത്രിക്കാൻ കഴിയും. ദിവസവും കുറച്ചുസമയം നടക്കുക, ഭക്ഷണത്തിൽ നിയന്ത്രണം പാലിക്കുക, മതിയായ ഉറക്കം ഉറപ്പാക്കുക, ഇത്രയൊക്കെ മതി ഇത് നിയന്ത്രിക്കാൻ. ഇടയ്ക്കിടെ ആരോഗ്യപരിശോധന നടത്തുന്നത് കൂടുതൽ വ്യക്തത നൽകും. നമ്മൾ 'മടിയാണെന്ന്' കരുതുന്ന പല കാര്യങ്ങളും ശരീരത്തിന്റെ മുന്നറിയിപ്പുകളായിരിക്കാം. അവയൊക്കെ അവഗണിക്കാതെ ശ്രദ്ധിച്ചാൽ വലിയ രോഗങ്ങളെപ്പോലും തടയാൻ കഴിയും.
(നോർത്ത് പറവൂരിലെ ഡോൺ ബോസ്കോ ആശുപത്രിയിൽ കൺസൾട്ടന്റ് ഇന്റർവെൻഷണൽ കാർഡിയോളജിസ്റ്റ് ആണ് ലേഖൻ)

Content Highlights: Identifies cardiometabolic issues as a cluster of conditions like diabetes, hypertension, and obesity., Explains that fatigue and belly fat are early silent warning signs., Emphasizes that lifestyle factors like sleep, diet, and exercise are key to prevention., Advocates for regular medical checkups to detect asymptomatic changes.