മെഡിക്കൽ കോളേജുകൾ അവസാനവാക്കല്ല, കുടുംബ ഡോക്ടർമാർ വേണം | രോഗക്കിടക്കയിലോ കേരളം? 05

‘ആൻജിയോഗ്രാം ടെസ്റ്റിന് പന്ത്രണ്ടായിരം. രണ്ട് സ്റ്റെന്റ് ഇടാൻ ചുരുങ്ങിയത് ഒന്നേമുക്കാൽ ലക്ഷം. ബൈപ്പാസ് സർജറിയാണെങ്കിൽ മൂന്നു ലക്ഷം’ - തൃശ്ശൂരിൽ സ്വകാര്യാശുപത്രിയിലെ ഹൃദ്രോഗവിദഗ്ധൻ പറഞ്ഞ കണക്ക്. ചികിത്സാച്ചെലവിൽ ഇന്ത്യയിൽ ഒന്നാം സ്ഥാനത്താണ് കേരളം. നാഷണൽ ഹെൽത്ത് അക്കൗണ്ട് (2019-20 എസ്റ്റിമേറ്റ്) റിപ്പോർട്ട് അനുസരിച്ച് കേരളത്തിൽ ചികിത്സയ്ക്കായി ആളോഹരി 10,607 രൂപ ചെലവഴിക്കുന്നുണ്ട്. ദേശീയ ശരാശരി 4863 രൂപയാകുമ്പോഴാണ് ഇരട്ടിയിലധികം തുക രോഗങ്ങളെ നേരിടാനായി മലയാളി ചെലവിടുന്നത്. രണ്ടാം സ്ഥാനത്തുള്ള ഹിമാചൽ പ്രദേശിനുപോലും 7386 രൂപയേ ചെലവുള്ളൂ.

കോവിഡ് കാലത്ത് മിക്കവർക്കും വർധിച്ച ചികിത്സാച്ചെലവും പിന്നാലെ കടബാധ്യതയും നേരിടേണ്ടിവന്നിട്ടുണ്ട്. ജീവിതശൈലീ രോഗങ്ങൾക്കായി നിത്യേനയുള്ള മരുന്നിന് വലിയ തുക ചെലവഴിക്കുമ്പോൾത്തന്നെ കോവിഡനന്തരമുള്ള ആരോഗ്യപ്രശ്നങ്ങൾ മാറ്റാനും പണം ചെലവായി. മലയാളികളിൽ ആരോഗ്യത്തെക്കുറിച്ചുള്ള ഭയാശങ്കകൾ കൂടിവരുന്നതും ചികിത്സ-പരിശോധന ചെലവുകൾ കൂട്ടുന്നുണ്ടെന്നാണ് ഡോക്ടർമാർ പറയുന്നത്. രോഗമുണ്ടോ എന്നറിയാനായി ഇടയ്ക്കിടെ പരിശോധനകൾ നടത്തുന്നവർ കൂടുതലാണ്. പല രോഗവും നേരത്തേ കണ്ടുപിടിക്കപ്പെടുന്നുണ്ട് എന്നത് നല്ല വശമാണെങ്കിലും അനാവശ്യ പരിശോധനകളിലൂടെ നല്ലൊരു തുക നഷ്ടപ്പെടുന്നുണ്ട്. കേരളത്തിൽ ആയിരത്തിൽ 105 പേർ (പത്തു ശതമാനം) ആശുപത്രികളിൽ പ്രവേശിപ്പിക്കപ്പെട്ട് ചികിത്സയെടുക്കുമ്പോൾ ദേശീയതലത്തിൽ അത് വെറും 29 (മൂന്ന് ശതമാനം) മാത്രമാണെന്നാണ് നാഷണൽ സാംപിൾ സർവേ റിപ്പോർട്ട് പറയുന്നത്. വീട്ടിലൊരാൾക്ക് കാൻസർ, ഹാർട്ട്‌ അറ്റാക്ക്, പക്ഷാഘാതം തുടങ്ങിയ രോഗങ്ങൾ വന്നാൽ ചികിത്സയിലൂടെ ആ കുടുംബം പട്ടിണിയിലാവാം. കടം വാങ്ങിയും സ്വത്തുക്കൾ വിറ്റും ഇതിന് പണം കണ്ടെത്തുന്നവരുണ്ട്.

Content Highlights: series on kerala health sector, healthcare challenges in kerala