അടിക്കടിയുണ്ടാകുന്ന വായ്പ്പുണ്ണിന്റെ കാരണങ്ങൾ എന്തെല്ലാം? എങ്ങനെ തടയാം?
വായിലെ ശ്ലേഷ്മസ്തരത്തിൽ അടിക്കടിയുണ്ടാകുന്ന നീർവീക്കം കാരണമുണ്ടാവുന്ന ഒരു അവസ്ഥയാണ് വായ്പ്പുണ്ണ്. അസഹ്യമായ നീറ്റലും വേദനയും ഈ അവസ്ഥയുടെ പ്രത്യേകതയാണ്. ഇവയെ മൂന്നായി തിരിക്കാറുണ്ട്.
1. ലഘുവായത്: ഇവ വൃത്താകൃതിയിലും ദീർഘവൃത്താകൃതിയിലും കാണപ്പെടാറുണ്ട്. ചാരനിറത്തിലുള്ള പാട ഇവയെ മൂടുന്നതായി കാണാം. ചുണ്ടിന്റെ ഉൾഭാഗത്തും കവിളിന്റെ ഉൾഭാഗത്തും നാവിന്റെ അരികിലോ അടിഭാഗത്തോ ഒക്കെ കാണപ്പെടുന്ന ഇവ രണ്ടാഴ്ചകൊണ്ട് അപ്രത്യക്ഷമാവുന്നു. ഇവയ്ക്ക് 10മില്ലിമീറ്ററിൽ താഴെയേ വലുപ്പം ഉണ്ടാവൂ.
2. സങ്കീർണമായ തരം: 10 മില്ലിമീറ്ററിൽ കൂടുതൽ വലുപ്പമുള്ള ഇവ കുറച്ചുകൂടി ആഴത്തിൽ കാണപ്പെടുന്നു. ചുണ്ടിലും അണ്ണാക്കിലും മേലണ്ണാക്കിലും ഒക്കെയായുള്ള ഈ ഗണത്തിൽപ്പെട്ടവ ആറാഴ്ചയിലേറെ സമയമെടുത്തേ അപ്രത്യക്ഷമാവാറുള്ളൂ.
3. Herpetiform (കൂട്ടമായി കാണുന്നതരം):2-3 മില്ലിമീറ്റർ വലുപ്പത്തിൽ പത്തുമുതൽ നൂറുവരെ കൂട്ടമായി കാണപ്പെടുന്ന വായ്പ്പുണ്ണുകളാണ് ഈ ഗണത്തിൽപ്പെടുന്നത്. ഇവ ചുണ്ടിലും നാക്കിലും മോണയിലും കൂടുതലായി കാണാറുണ്ട്. സ്ത്രീകളിലാണ് ഇവ പുരുഷന്മാരെക്കാൾ കൂടുതൽ ഉണ്ടാകാറ്. ഇവ ഒരുമാസംവരെ നീണ്ടുനിൽക്കാറുണ്ട്.
കാരണങ്ങൾ
- പോഷകക്കുറവ്
- അണുബാധ
- വിളർച്ച
- ശരീരം തന്നെ സ്വന്തം പ്രതിരോധശേഷി കുറയ്ക്കുന്നതരം Auto Immuna അസുഖങ്ങൾ
- മാനസിക സമ്മർദം
- വിഷാദരോഗം
- രക്താർബുദം അഥവാ ലൂക്കീമിയ
- റേഡിയേഷൻ ചികിത്സ എടുക്കുന്നവരിൽ
- ഉദര രോഗ പ്രശ്നങ്ങൾ
- ഉമിനീർ ഗ്രന്ഥികളെ ബാധിക്കുന്ന നീർവീക്കം
- ജനിതക ഘടകങ്ങൾ
- സ്ഥിരമായി സംഭവിക്കുന്ന വായിലെ മുറിവുകൾ
എങ്ങനെ തടയാം?
- ദന്തശുചിത്വം നന്നായി പാലിക്കുക
- പല്ലുകൾക്കിടയിൽ കുടുങ്ങിയ ഭക്ഷണാവശിഷ്ടങ്ങൾ ഫ്ളോസ് അഥവാ പല്ലിട ശുചീകരണ ബ്രഷ് ഉപയോഗിച്ച് നീക്കം ചെയ്യുക
- മൃദുവായ നാരുകൾ അടങ്ങിയ ബ്രഷ് ഉപയോഗിക്കുക
- സമീകൃതമായ പോഷകസമ്പുഷ്ടമായ ആഹാരം ശീലമാക്കുക
- നീർവീക്കം ഉണ്ടാക്കുന്ന മറ്റ് ഉദരപ്രശ്നങ്ങൾ, പ്രമേഹം പോലുള്ള രോഗങ്ങൾ തുടങ്ങിയവ യഥാസമയം ചികിത്സിച്ച് നിയന്ത്രിച്ച് നിർത്തുക
(കൺസൾട്ടന്റ് പീരിയോഡോണ്ടിസ്റ്റാണ് ലേഖകൻ)
Content Highlights: mouth ulcers causes and treatment