വെറും ജലദോഷപ്പനിയല്ല, ശരീരത്തെയാകെ തളർത്തുന്ന വൈറൽ അണുബാധയാണ് ഇൻഫ്ലുവൻസ; പ്രതിരോധം പ്രധാനം

മഴക്കാലം എത്തുമ്പോൾ പനി, ചുമ, ജലദോഷം എന്നിവ സാധാരണമായി കണ്ടുവരാറുണ്ട്. എന്നാൽ “ഫ്ലൂ” എന്ന് പൊതുവേ വിളിക്കുന്ന ഇൻഫ്ലുവൻസ സാധാരണ ജലദോഷം മാത്രമല്ല. പെട്ടെന്ന് ആരംഭിച്ച് പനി, ശരീരവേദന, കടുത്ത ക്ഷീണം, ചുമ തുടങ്ങിയ ലക്ഷണങ്ങളിലൂടെ ശരീരത്തെ ആകെ തളർത്തുന്ന ഒരു വൈറൽ ശ്വാസകോശ അണുബാധയാണ് ഇൻഫ്ലുവൻസ. ചിലരിൽ ഇത് ഗുരുതരമായ സങ്കീർണതകൾക്കും കാരണമാകാം.

എന്താണ് ഇൻഫ്ലുവൻസ?

ഇൻഫ്ലുവൻസ വൈറസ് മൂലമുണ്ടാകുന്ന ശ്വാസകോശ സംബന്ധമായ അണുബാധയാണിത്. ഇൻഫ്ലുവൻസ എ, ബി എന്നിവയാണ് സാധാരണ കാണുന്നത്. ഓരോ വർഷവും വൈറസിന് ചെറിയ മാറ്റങ്ങൾ വരുന്നതിനാൽ പലർക്കും വീണ്ടും വീണ്ടും പിടിപെടാം.

പ്രധാന ലക്ഷണങ്ങൾ

ജലദോഷത്തിൽ നിന്ന് വ്യത്യസ്തമായി ലക്ഷണങ്ങൾ പെട്ടെന്ന് തുടങ്ങും:

• പെട്ടെന്നുള്ള ഉയർന്ന പനി, വിറയൽ
• കടുത്ത ശരീരവേദന, ക്ഷീണം
• വരണ്ട ചുമ, തൊണ്ടവേദന
• മൂക്കടപ്പ് അല്ലെങ്കിൽ മൂക്കൊലിപ്പ്
• കുട്ടികളിൽ ഛർദ്ദി, വയറിളക്കം ചിലപ്പോൾ കാണാം

മിക്കവരിലും 5 മുതൽ 7 ദിവസത്തിനുള്ളിൽ ഭേദമാകും, പക്ഷേ ചുമയും ക്ഷീണവും രണ്ടാഴ്ച വരെ നീണ്ടുനിൽക്കാം.

എങ്ങനെ പകരുന്നു?

രോഗി ചുമയ്ക്കുമ്പോഴോ തുമ്മുമ്പോഴോ വായുവിലൂടെ, കൈകളിലൂടെ, വാതിൽപ്പിടി പോലുള്ള പ്രതലങ്ങളിലൂടെ വൈറസ് പെട്ടെന്ന് പകരും. രോഗലക്ഷണം തുടങ്ങുന്നതിന് ഒരു ദിവസം മുൻപ് മുതൽ 5 ദിവസം വരെ മറ്റുള്ളവരിലേക്ക് പകരാൻ സാധ്യതയുണ്ട്.

പ്രതിരോധമാണ് ഏറ്റവും നല്ല ചികിത്സ

വാക്സിൻ: വർഷത്തിലൊരിക്കൽ എടുക്കുന്ന ഫ്ലൂ വാക്സിൻ ഏറ്റവും ഫലപ്രദമായ പ്രതിരോധമാണ്. 6 മാസത്തിന് മുകളിലുള്ള കുട്ടികൾ മുതൽ എല്ലാവർക്കും ഡോക്ടറുടെ നിർദ്ദേശപ്രകാരം എടുക്കാം.

ശുചിത്വം: ഇടയ്ക്കിടെ സോപ്പിട്ട് കൈ കഴുകുക. ചുമയ്ക്കുമ്പോൾ തൂവാല കൊണ്ട് മൂക്കും വായും മറയ്ക്കുക.

അകലം പാലിക്കുക: പനിയുള്ളപ്പോൾ സ്കൂളിലോ ജോലിക്കോ പോകരുത്, മറ്റുള്ളവരുമായി അടുത്തിടപഴകുന്നത് ഒഴിവാക്കുക.

പരിചരണവും ചികിത്സയും

വിശ്രമം, ധാരാളം വെള്ളം കുടിക്കൽ, പോഷകമുള്ള ലഘുവായ ഭക്ഷണം എന്നിവ പ്രധാനമാണ്. ഡോക്ടറുടെ നിർദ്ദേശമില്ലാതെ ആന്റിബയോട്ടിക് എടുക്കരുത്, കാരണം ഇത് വൈറസിനെതിരെ ഫലിക്കില്ല. ചില ഉയർന്ന റിസ്ക് വിഭാഗങ്ങളിൽ ആന്റിവൈറൽ മരുന്നുകൾ ഡോക്ടർ നിർദ്ദേശിക്കാം, അത് ലക്ഷണം തുടങ്ങി 48 മണിക്കൂറിനുള്ളിൽ തുടങ്ങിയാലാണ് കൂടുതൽ ഫലം ലഭിക്കുക.

ശ്വസിക്കാൻ ബുദ്ധിമുട്ട്, നെഞ്ചുവേദന, പനി മൂന്ന് ദിവസത്തിൽ കൂടുതൽ മാറാതിരിക്കുക, കുട്ടികളിൽ അമിത ക്ഷീണം അല്ലെങ്കിൽ ഭക്ഷണം കഴിക്കാൻ വിസമ്മതം എന്നിവ കണ്ടാൽ ഉടൻ ഡോക്ടറെ കാണുക. ലളിതമായ ശ്രദ്ധ കൊണ്ട് ഇൻഫ്ലുവൻസയെ നമുക്ക് അകറ്റി നിർത്താം.

(തലശ്ശേരി മിഷൻ ഹോസ്പിറ്റലിൽ കൺസൾട്ടന്റ് പീഡിയാട്രീഷ്യനാണ് ലേഖിക.)