വേനലിൽ കഴിക്കാൻ മികച്ച വിഭവം; കുക്കുമ്പർ റൈസ് റെസിപ്പി

വേനൽക്കാലത്ത് എണ്ണമയമുള്ളതോ എരിവുള്ളതോ ആയ ഭക്ഷണങ്ങൾ കഴിക്കുന്നത് ദഹനപ്രശ്നങ്ങൾക്കും ശരീരത്തിന് ഭാരക്കൂടുതൽ തോന്നാനും കാരണമാകാറുണ്ട്. അതുകൊണ്ട് തന്നെ കഞ്ഞിയോ, തൈര് സാദമോ, പുലാവോ ഒക്കെയാണ് ഈ സമയത്ത് ഉചിതം. ഇതിൽ നിന്നെല്ലാം വ്യത്യസ്തമായി വളരെ പെട്ടെന്ന് തയ്യാറാക്കാവുന്ന ഒന്നാണ് കുക്കുമ്പർ റൈസ്. ഓഫീസിലേക്കോ കുട്ടികൾക്ക് ലഞ്ചിനോ കൊടുത്തുവിടാനും ഇത് മികച്ച ചോയിസാണ്.

കുക്കുമ്പറിൽ ധാരാളം ജലാംശം അടങ്ങിയിട്ടുള്ളതിനാൽ ഇത് ശരീരത്തെ ഹൈഡ്രേറ്റഡ് ആയി നിലനിർത്താൻ സഹായിക്കും. കുറച്ച് തേങ്ങ കൂടി ചിരകി ചേർത്താൽ ഫ്രഷ്നെസ് കൂടും.

ആവശ്യമായ ചേരുവകൾ

• വേവിച്ച ചോറ് - 1 കപ്പ്

• കുക്കുമ്പർ - 2 എണ്ണം

• നിലക്കടല - 2 ടേബിൾ സ്പൂൺ

• കശുവണ്ടി - 2 ടേബിൾ സ്പൂൺ

• കടുക് - 1 ടീസ്പൂൺ

• കടലപ്പരിപ്പ് - 1 ടേബിൾ സ്പൂൺ

• ഇഞ്ചി (പൊടിയായി അരിഞ്ഞത്) - 1 ടീസ്പൂൺ

• പച്ചമുളക് - 1 ടീസ്പൂൺ

• ഉള്ളി (അരിഞ്ഞത്) - 1 ചെറുത്

• കറിവേപ്പില - 7-8 എണ്ണം

• മല്ലിയില - 2 ടേബിൾ സ്പൂൺ

• ഉപ്പ് - പാകത്തിന്

തയ്യാറാക്കുന്ന വിധം:

1. കുക്കുമ്പർ തയ്യാറാക്കാം: കുക്കുമ്പർ ഗ്രേറ്റ് ചെയ്ത് എടുത്ത ശേഷം അതിലെ അധികമുള്ള വെള്ളം നന്നായി പിഴിഞ്ഞു കളയുക. ഇത് ചോറ് കുഴഞ്ഞുപോകാതിരിക്കാൻ സഹായിക്കും.

2. വറുത്തെടുക്കാം: ഒരു പാനിൽ എണ്ണ ചൂടാക്കി കടലപ്പരിപ്പ്, കടുക്, ഇഞ്ചി, ഉള്ളി എന്നിവ ചേർത്ത് വഴറ്റുക. ഉള്ളി ഗോൾഡൻ നിറമാകുമ്പോൾ കറിവേപ്പില ചേർക്കാം.

3. നട്സ് ചേർക്കാം: ഇതിലേക്ക് കശുവണ്ടിയും നിലക്കടലയും ചേർത്ത് ചുവക്കുന്നതുവരെ വറുക്കുക. ശേഷം പിഴിഞ്ഞുവെച്ചിരിക്കുന്ന കുക്കുമ്പർ ചേർത്ത് രണ്ട് മിനിറ്റ് കൂടി വഴറ്റുക.

4. ചോറ് ചേർക്കാം: വേവിച്ചുവെച്ച ചോറ് ഇതിലേക്ക് ഇട്ട് സാവധാനം ഇളക്കുക. പാകത്തിന് ഉപ്പും ചേർത്ത് രണ്ട് മിനിറ്റ് ചൂടാക്കുക.

5. ഫിനിഷിംഗ്: മല്ലിയിലയും അല്പം നാരങ്ങാനീരും ചേർത്ത് നന്നായി ഇളക്കിയ ശേഷം തീ അണയ്ക്കാം.

തലേദിവസത്തെ ചോറ് ബാക്കിയുണ്ടെങ്കിൽ അത് ഉപയോഗിച്ചും ഈ വിഭവം തയ്യാറാക്കാം. തൈരോ റൈത്തയോ കൂട്ടി കഴിച്ചാൽ കുക്കുമ്പർ റൈസ് അതീവ രുചികരമായിരിക്കും. 

കുക്കുമ്പർ ചേർത്ത ശേഷം അധികനേരം വേവിക്കരുത്, ഫ്രഷ്നെസ് നഷ്ടപ്പെടാൻ കാരണമാകും.