സ്റ്റീലോ ഗ്ലാസോ? ഭക്ഷണം സൂക്ഷിക്കാൻ ഏതാണ് കൂടുതൽ സുരക്ഷിതം; അറിയേണ്ട കാര്യങ്ങൾ
ഭക്ഷണം സൂക്ഷിക്കാൻ പ്ലാസ്റ്റിക് പാത്രങ്ങൾ ഒഴിവാക്കി സ്റ്റീലും ഗ്ലാസും തിരഞ്ഞെടുക്കുന്നവരാണ് ഇന്ന് മിക്കവരും. എന്നാൽ ഇവയിൽ ഏതാണ് കൂടുതൽ സുരക്ഷിതം?
സ്റ്റീൽ പാത്രങ്ങൾ: ഈടുനിൽക്കുന്നവ, യാത്രയ്ക്ക് ഉത്തമം
തലമുറകളായി ഇന്ത്യൻ വീടുകളിൽ വിശ്വസ്തതയോടെ ഉപയോഗിക്കുന്നതാണ് സ്റ്റീൽ പാത്രങ്ങൾ.
സുരക്ഷിതം: മികച്ച നിലവാരമുള്ള (304 അല്ലെങ്കിൽ 18/8 ഗ്രേഡ്) സ്റ്റീൽ പാത്രങ്ങളിൽ ബി.പി.എ പോലുള്ള വിഷാംശങ്ങളില്ല. ഇവ ഭക്ഷണവുമായി പെട്ടെന്ന് രാസപ്രവർത്തനത്തിൽ ഏർപ്പെടാറില്ല.
ശുചിത്വം: എളുപ്പത്തിൽ കഴുകി വൃത്തിയാക്കാം. ഭക്ഷണത്തിന്റെ മണമോ എണ്ണമയമോ ഇവയിൽ തങ്ങിനിൽക്കില്ല.
ഈട് നിൽക്കുന്നവ: വീണാൽ പൊട്ടില്ല എന്നതിനാൽ ഓഫീസിലേക്കും സ്കൂളിലേക്കും ഭക്ഷണം കൊടുത്തുവിടാനും ഉപയോഗിക്കാനും ഏറ്റവും അനുയോജ്യം. ഭാരം കുറവാണെന്നതും യാത്രകളിൽ ഗുണകരമാണ്.
ദോഷങ്ങൾ
ഉള്ളിലെ ഭക്ഷണം കാണണമെങ്കിൽ പാത്രം തുറന്നുതന്നെ നോക്കണം.
സ്റ്റീൽ പാത്രങ്ങൾ ഓവനിലോ മൈക്രോവേവിലോ ഉപയോഗിക്കാൻ കഴിയില്ല.
നിലവാരം കുറഞ്ഞ സ്റ്റീൽ ആണെങ്കിൽ തക്കാളി, വിനാഗിരി തുടങ്ങിയ പുളിയുള്ള ഭക്ഷണങ്ങൾ ദീർഘകാലം സൂക്ഷിക്കുമ്പോൾ ലോഹാംശം കലരാൻ നേരിയ സാധ്യതയുണ്ട്.
ഗ്ലാസ് പാത്രങ്ങൾ: വൃത്തിയുള്ളതും സുതാര്യവും
പ്ലാസ്റ്റിക് ഒഴിവാക്കാൻ ആഗ്രഹിക്കുന്നവർക്കിടയിൽ ഗ്ലാസ് പാത്രങ്ങൾക്ക് ഇപ്പോൾ പ്രിയമേറെയാണ്.
ഗുണങ്ങൾ:
ഗ്ലാസ് ഭക്ഷണവുമായി ഒരു രീതിയിലും രാസപ്രവർത്തനത്തിൽ ഏർപ്പെടില്ല. പുളിയുള്ള കറികളോ ഉപ്പിലിട്ടതോ എത്രനാൾ വേണമെങ്കിലും ധൈര്യമായി സൂക്ഷിക്കാം.
പാത്രം തുറക്കാതെ തന്നെ ഉള്ളിലെ ഭക്ഷണം തിരിച്ചറിയാം എന്നത് ഫ്രിഡ്ജിലെ ഉപയോഗത്തിന് എളുപ്പമാണ്.
ഫ്രിഡ്ജിൽ നിന്ന് നേരിട്ട് മൈക്രോവേവിൽ വെച്ച് ചൂടാക്കാം എന്നതാണ് ഏറ്റവും വലിയ പ്രത്യേകത (അടപ്പ് മാറ്റിയ ശേഷം). മണമോ നിറമോ കറയോ പിടിക്കില്ല.
ദോഷങ്ങൾ:
ശ്രദ്ധയോടെ കൈകാര്യം ചെയ്തില്ലെങ്കിൽ എളുപ്പത്തിൽ പൊട്ടിപ്പോകും. ഇത് അപകടങ്ങൾക്കും കാരണമായേക്കാം.
സ്റ്റീലിനെ അപേക്ഷിച്ച് ഭാരം കൂടുതലായതുകൊണ്ട് യാത്രകളിൽ കൊണ്ടുപോകാൻ ബുദ്ധിമുട്ടാണ്.
പാത്രം ഗ്ലാസ് ആണെങ്കിലും അടപ്പുകൾ പലപ്പോഴും പ്ലാസ്റ്റിക് ആയിരിക്കും. ഇവയിൽ ഭക്ഷണത്തിന്റെ മണം നിൽക്കാൻ സാധ്യതയുണ്ട്.
ഏതാണ് തിരഞ്ഞെടുക്കേണ്ടത്?
ഇതൊരു മത്സരമായി കാണാതെ സാഹചര്യത്തിന് അനുയോജ്യമായത് തിരഞ്ഞെടുക്കുകയാണ് വേണ്ടത്.
യാത്രകൾക്കും കുട്ടികൾക്കും: എന്നും ഓഫീസിലേക്ക് കൊണ്ടുപോകാനും സ്കൂൾ കുട്ടികൾക്കും സ്റ്റീൽ പാത്രങ്ങളാണ് ഏറ്റവും സുരക്ഷിതം.
വീട്ടിലെ സ്റ്റോറേജ്: വീട്ടിൽ കറികൾ സൂക്ഷിക്കാനും ചൂടാക്കാനും ഫ്രിഡ്ജിൽ വെക്കാനും ഗ്ലാസ് പാത്രങ്ങളാണ് കൂടുതൽ സൗകര്യപ്രദം.
ഭക്ഷണത്തിന്റെ സ്വഭാവം നോക്കി പാത്രങ്ങൾ തിരഞ്ഞെടുക്കുക. ഏത് പാത്രമായാലും അത് ഫുഡ് ഗ്രേഡ് ആണെന്ന് ഉറപ്പുവരുത്തുക.
Content Highlights: Explore the pros & cons of steel and glass food containers.