യുനെസ്കോയുടെ ഗ്യാസ്ട്രോണമി നഗരമായി ലഖ്നൗ
യുനെസ്കോയുടെ ക്രിയേറ്റീവ് സിറ്റീസ് ഓഫ് ഗ്യാസ്ട്രോണമി പട്ടികയില് ഇടംപിടിച്ച് ലഖ്നൗ. 2019-ല് ഈ ബഹുമതി ലഭിച്ച ഹൈദരാബാദിന് ശേഷം, 100-ല് അധികം രാജ്യങ്ങളിലായുള്ള 408 ക്രിയേറ്റീവ് സിറ്റികളുടെ ശൃംഖലയില് ഉള്പ്പെടുന്ന രണ്ടാമത്തെ ഇന്ത്യന് നഗരമായി മാറിയിരിക്കുകയാണ് ലഖ്നൗ.
സംസ്കാരം, കല, ഭക്ഷണം എന്നിവയില് അസാധാരണമായ സര്ഗാത്മകത പ്രകടിപ്പിച്ച നഗരങ്ങളാണ് ഈ പട്ടികയില് ഉള്പ്പെടുത്തുന്നത്. ഈ വര്ഷം ക്രിയേറ്റീവ് സിറ്റീസ് നെറ്റ്വര്ക്കിലേക്ക് 58 നഗരങ്ങള് ചേര്ക്കപ്പെട്ടു.
ചരിത്രത്തിലും തനിമയിലും അധിഷ്ഠിതമായ, ആഴത്തില് വേരൂന്നിയ പാചക സംസ്കാരമുള്ള നഗരത്തിനാണ് ക്രിയേറ്റീവ് സിറ്റി ബഹുമതി ലഭിക്കുക. ഭക്ഷ്യ വിപണികള്, പരമ്പരാഗത ചേരുവകള്, പാചകക്കാരടങ്ങുന്നവര്, തലമുറകള് കൈമാറിവന്ന പാചകക്കുറിപ്പുകള് എന്നിവയെല്ലാം അന്തിമ പട്ടിക തയ്യാറാക്കുമ്പോള് പരിഗണിക്കപ്പെടും.
സുസ്ഥിരത യുനെസ്കോയുടെ മറ്റൊരു പ്രധാന ഘടകമാണ്. അതോടൊപ്പം പരിസ്ഥിതിയോടുള്ള ബഹുമാനം, ജൈവവൈവിധ്യത്തെയും പോഷണത്തെയും കുറിച്ചുള്ള അവബോധവും വിദ്യാഭ്യാസവും ഇതില് ഉള്പ്പെടുന്നു. ഓരോ നാല് വര്ഷം കൂടുമ്പോഴും തിരഞ്ഞെടുക്കപ്പെട്ട നഗരങ്ങള് അവരുടെ പ്രതിബദ്ധത പിന്നീടും പാലിക്കുന്നുണ്ടെന്ന് ഉറപ്പാക്കാന് അവലോകനത്തിന് വിധേയമാക്കപ്പെടും.
ബഹുമതിയുടെ പ്രത്യേകതകള്
ക്രിയേറ്റീവ് സിറ്റീസ് നെറ്റ്വര്ക്കിന്റെ ഭാഗമാകുന്നതിലൂടെ, ലഖ്നൗവിന് ഇനിപ്പറയുന്ന പ്രധാന പ്രവര്ത്തന മേഖലകളില് മറ്റ് അംഗനഗരങ്ങളുമായി ചേര്ന്ന് പഠിക്കാനും പ്രചോദനം ഉള്ക്കൊള്ളാനും പങ്കാളികളാകാനും അവസരം ലഭിക്കും;
- അനുഭവങ്ങളും അറിവുകളും മികച്ച രീതികളും പങ്കുവെക്കല്
- പൊതു-സ്വകാര്യ മേഖലകളെയും സിവില് സമൂഹത്തെയും ബന്ധിപ്പിക്കുന്ന പൈലറ്റ് പ്രോജക്റ്റുകള്, പങ്കാളിത്തങ്ങള്, സംരംഭങ്ങള്
- പ്രൊഫഷണല്, കലാപരമായ വിനിമയ പരിപാടികളും നെറ്റ്വര്ക്കുകളും
- ക്രിയേറ്റീവ് സിറ്റികളുടെ അനുഭവങ്ങളെക്കുറിച്ചുള്ള പഠനങ്ങള്, ഗവേഷണങ്ങള്, വിലയിരുത്തലുകള്
- സുസ്ഥിര നഗരവികസനത്തിനായുള്ള നയങ്ങളും നടപടികളും
- ആശയവിനിമയവും ബോധവല്ക്കരണ പ്രവര്ത്തനങ്ങളും
ലഖ്നൗവിലെ ഭക്ഷണസംസ്കാരം
അവദി ലഖ്നൗവിലെ പേരുകേട്ട പാചകരീതിയാണ്. ദം ഫുക്ത് ബിരിയാണി, കബാബുകള് തുടങ്ങിയ വിഭവങ്ങള്ക്ക് പേരുകേട്ട നഗരമാണിത്. ലഖ്നൗവിന്റെ രാജകീയ പ്രൗഢി വിളിച്ചോതുന്ന 5 വിഭവങ്ങള് നോക്കാം.
1. തുണ്ടെ കബാബ്
ഏറ്റവും പ്രശസ്തമായ ഈ കബാബ്, മൃദുവും സുഗന്ധപൂരിതവും നേര്ത്ത മസാലകള് ചേര്ത്തതുമാണ്.
2. ഗലൗട്ടി കബാബ്
ആദ്യത്തെ കടിയില് തന്നെ വായിലിട്ടാല് അലിഞ്ഞുപോകുന്നത്ര മൃദുലമായ ഈ വിഭവം സാധാരണയായി ഖമീരി റൊട്ടിയുടെ കൂടെയാണ് കഴിക്കുന്നത്.
3. പസന്തെ കറി
ക്രീം പോലെയുള്ള തൈര് ചേര്ത്ത ഗ്രേവിയില്, മസാല പുരട്ടിയ ആട്ടിറച്ചികൊണ്ട് തയ്യാറാക്കുന്ന വിഭവമാണിത്.
4. അവദി മട്ടണ് ബിരിയാണി
സുഗന്ധമുള്ള അരിയും മൃദുവായ മാംസവും ചേര്ത്ത് 'ദം' രീതിയില് സാവധാനം പാകം ചെയ്യുന്ന ബിരിയാണി.
5. അവദി ഗോഷ്ത് കോര്മ
തൈര് അടിസ്ഥാനമാക്കിയുള്ള ഈ മട്ടണ് കറി, ഷീര്മാല് അല്ലെങ്കില് പറാത്തയുടെ കൂടെ കഴിക്കാം. സമൃദ്ധവും രാജകീയവുമായ തനി ലഖ്നൗ വിഭവമാണിത്.
Content Highlights: Lucknow, India`s second city on UNESCO`s Creative Cities of Gastronomy list. Explore its rich culinary heritage, Awadhi cuisine, and famous dishes like kebabs and biryani.