പഴങ്ങളിലേയും പച്ചക്കറികളിലേയും സ്റ്റിക്കർ ഗുരുതര ആരോഗ്യപ്രശ്നങ്ങളുണ്ടാക്കുമെന്ന് FSSAI
കടകളിൽ നിന്നും സൂപ്പർമാർക്കറ്റുകളിൽ നിന്നും വാങ്ങുന്ന പഴങ്ങളിലും പച്ചക്കറികളിലും പതിപ്പിക്കുന്ന സ്റ്റിക്കറുകൾ അത്ര നിസാരക്കാരല്ല. അത് ഗുരുതരമായ ആരോഗ്യപ്രശ്നങ്ങളുണ്ടാക്കുമെന്ന് വ്യക്തമാക്കിയിരിക്കുകയാണ് കേന്ദ്ര ഭക്ഷ്യ സുരക്ഷാ ഗുണനിലവാര അതോറിറ്റി (എഫ്എസ്എസ്എഐ).
ഇത്തരം സ്റ്റിക്കറുകളും ആ ഭാഗത്തെ തൊലിയും കളഞ്ഞ് കഴുകിയെടുത്ത ശേഷം മാത്രമേ ആ പഴങ്ങൾ കഴിക്കാവൂ എന്നും എഫ്എസ്എസ്എഐ വ്യക്തമാക്കുന്നു. സ്റ്റിക്കറുകൾ പതിപ്പിച്ച പശയിലേയും മഷിയിലേയും രാസവസ്തക്കുൾ ആരോഗ്യപ്രശ്നങ്ങളുണ്ടാക്കും എന്നതാണ് കാരണം.
ഈ സ്റ്റിക്കറുകളിൽ സിന്തറ്റിക് പശയും വിഷാംശം അടങ്ങിയ മഷിയും ഉപയോഗിക്കുന്നുണ്ട്. ഇവ അബദ്ധത്തിൽ വായിലായാൽ തൊണ്ടയിലും വയറിലും അസ്വസ്ഥതയുണ്ടാകാൻ സാധ്യതയുണ്ട്. ഇതുമൂലം ദഹനക്കേട്, ശ്വാസംമുട്ടൽ, ഛർദ്ദി തുടങ്ങിയ അസുഖങ്ങളുണ്ടാകാനും സാധ്യത കൂടുതലാണ്.
ശ്രദ്ധിക്കേണ്ട കാര്യങ്ങൾ
- കടകളിൽ നിന്ന് വാങ്ങുന്ന പഴങ്ങളും പച്ചക്കറികളും പാക്കറ്റുകളിൽ തന്നെ ഒരു പ്രത്യേക സ്ഥലത്ത് സൂക്ഷിക്കുക.
- പഴങ്ങളും പച്ചക്കറികളും നന്നായി കഴുകുക. ആവശ്യമെങ്കിൽ ഇളം ചൂടുവെള്ളത്തിൽ 50ppm ക്ലോറിൻ ഒരു തുള്ളി ചേർത്ത് അതിൽ മുക്കിവയ്ക്കുക.
- തണുപ്പ് ആവശ്യമുള്ള പഴങ്ങളും പച്ചക്കറികളും ഫ്രിഡ്ജിൽ സൂക്ഷിക്കുക. ബാക്കിയുള്ളവ സാധാരണ ഊഷ്മാവിൽ ബാസ്കറ്റുകളിലോ റാക്കുകളിലോ സൂക്ഷിക്കുക.
- പഴങ്ങളും പച്ചക്കറികളും കഴുകിയ സിങ്ക് സാനിറ്റൈസ് ചെയ്ത് അണുവിമുക്തമാക്കുക.
Content Highlights: Adhesives and inks on fruit stickers are not food-grade and pose health risks., Ingesting sticker residue can cause nausea, digestive discomfort, or choking., FSSAI mandates removing all labels before washing and consuming produce.