സഞ്ജയ് ദത്ത് വർഗീയ പരാമർശങ്ങൾ നടത്തിയെന്ന പ്രചരണം വ്യാജം | Fact Check

രാജ്യത്തെ സർക്കാർ സ്ഥാപനങ്ങളിലും സൈന്യത്തിലും കാവിവൽക്കരണം നടക്കുന്നുവെന്ന്‌ ബോളിവുഡ് നടൻ സഞ്ജയ് ദത്ത് വിമർശിച്ചുവെന്ന വാദത്തോടെ ഒരു വീഡിയോ പ്രചരിക്കുന്നുണ്ട്. അതോടൊപ്പം കശ്മീർ, മുസ്‌ലിം സമുദായം നേരിടുന്ന പ്രശ്നങ്ങൾ എന്നീ വിഷയങ്ങളെക്കുറിച്ചും അദ്ദേഹം പരാമർശിച്ചുവെന്ന തരത്തിലാണിത്. എന്നാൽ, പരിശോധനയിൽ ഈ പ്രചാരണം വ്യാജമാണെന്ന് കണ്ടെത്തി.

പ്രചരിക്കുന്ന വീഡിയോയിൽ പറയുന്നത്:
"എന്റെ അമ്മ ഒരു മുസ്‌ലിം എന്ന നിലയിൽ അനുഭവിച്ചതുപോലെ ഇന്ത്യയിലെ മുസ്‌ലിംകൾ അനുഭവിക്കാൻ ഞാൻ അനുവദിക്കില്ല... സർക്കാർ സ്ഥാപനങ്ങളുടെ കാവിവൽക്കരണമോ? അതിന്‍റെ ആവശ്യമില്ല, പ്രത്യേകിച്ചും സായുധ സേനയിൽ, സൈന്യം രാജ്യത്തിന്റേതാണ്, അത് ഏതെങ്കിലും ഒരു നിറത്തിന്റേതല്ല... കശ്മീരിന്റെ തീരുമാനം കശ്മീരിലെ ജനങ്ങൾ എടുക്കട്ടെ. അവർക്ക് ഇഷ്ടമുള്ള ഭാഗം തിരഞ്ഞെടുക്കാനും അവിടെനിന്ന് സൈന്യത്തെ പിൻവലിക്കാനും അനുവദിക്കൂ..."

അന്വേഷണം

ഗാന്ധിജയന്തി ദിനത്തിൽ പുറത്തിറങ്ങിയ 'ശേഖർ ടുനൈറ്റ്' എന്ന ടോക്ക് ഷോയിൽ സഞ്ജയ് ദത്ത് പങ്കെടുത്തതിനെത്തുടർന്നുണ്ടായ വിവാദങ്ങൾക്ക് പിന്നാലെയാണ് ഈ വീഡിയോ വൈറലായത്. രാജ്യത്ത് സമാധാനമില്ലെന്ന് പരിപാടിയിൽ അദ്ദേഹം പറഞ്ഞിരുന്നു. എന്നാൽ, തമാശരൂപത്തിലുള്ള തിരക്കഥാധിഷ്ഠിത സംഭാഷണത്തിന്റെ ഭാഗമായിരുന്ന പരാമർശത്തെ ദുർവ്യാഖ്യാനം ചെയ്തെന്നാണ് ഇതിൽ നടൻ പിന്നീട് വ്യക്തത വരുത്തിയത്. സഞ്ജയ് ദത്ത് സൈന്യത്തെയോ കാവിവൽക്കരണത്തെയോ കുറിച്ച് ഇത്തരമൊരു പരാമർശം നടത്തിയതായി വിശ്വസനീയമായ റിപ്പോർട്ടുകളൊന്നും ലഭ്യമല്ല.

ശേഖർ സുമന്റെ ഔദ്യോഗിക യൂട്യൂബ് ചാനലിൽ ഒക്ടോബർ 2-ന് പ്രസിദ്ധീകരിച്ച 'ശേഖർ ടുനൈറ്റ്' എപ്പിസോഡ് പൂർണ്ണമായി പരിശോധിച്ചെങ്കിലും സഞ്ജയ് ദത്ത് ഇത്തരമൊരു പരാമർശം നടത്തുന്നതായി കണ്ടെത്തിയില്ല. പ്രചരിക്കുന്ന വീഡിയോ ശ്രദ്ധാപൂർവ്വം പരിശോധിച്ചപ്പോൾ നടന്റെ മുഖഭാവങ്ങളിലും ചുണ്ടുകളുടെ ചലനങ്ങളിലും അസ്വാഭാവികത കാണാൻ കഴിഞ്ഞു. കൂടാതെ, അദ്ദേഹം സംസാരിക്കുമ്പോൾ മൈക്രോഫോൺ വസ്ത്രങ്ങളിലേക്ക് അസ്വാഭാവികമായി ലയിച്ചുചേരുന്നതും ശ്രദ്ധയിൽപ്പെട്ടു. വീഡിയോ എഐ നിർമ്മിതമാകാമെന്ന സൂചനയാണിത്. സാധാരണ എഐ വീഡിയോകൾക്ക് വരുന്ന പിഴവുകളാണിവ.

തുടർന്ന് വീഡിയോ എഐ ഡിറ്റക്ഷൻ ടൂളുപയോഗിച്ച് പരിശോധിച്ചു. വീഡിയോയിലെ ഓഡിയോ 99 ശതമാനവും എഐ നിർമ്മിതമാണെന്ന ഫലമാണ് ലഭിച്ചത്.

വാസ്തവം

ഇത് വ്യാജപ്രചാരണമാണ്. പ്രചരിക്കുന്ന വീഡിയോ എഐ നിർമ്മിതം.

Content Highlights: Viral video claims Sanjay Dutt made communal remarks about the military and government., Investigation reveals the video is a manipulated deepfake with AI-generated audio., Shekhar Suman's 'Shekhar Tonite' episode did not contain any such statements., AI detection tools confirmed the audio in the viral video is 99% AI-generated.