മുംബൈ പ്രതിഷേധത്തിനിടെ അഭിജിത് ദീപ്കെയെ ജനങ്ങൾ മർദ്ദിച്ചോ? | Fact Check

2026 ഒക്ടോബർ 2-ന് മുംബൈയിലെ ശിവജി പാർക്കിൽ നടന്ന പ്രതിഷേധ പരിപാടിക്കിടെ കോക്രോച്ച് ജനത പാർട്ടി (CJP) സ്ഥാപകൻ അഭിജിത് ദീപ്കെയെ ജനങ്ങൾ ആക്രമിച്ചു എന്ന വാദത്തോടെ സോഷ്യൽ മീഡിയയിൽ ഒരു വീഡിയോ പ്രചരിക്കുന്നുണ്ട്. എന്നാൽ, ഈ പ്രചാരണം വ്യാജമാണെന്ന്‌ മാതൃഭൂമി ഫാക്ട് ചെക്ക് നടത്തിയ അന്വേഷണത്തിൽ കണ്ടെത്തി.

അന്വേഷണം

ബിജെപിയെ വഴിവിട്ട് സഹായിക്കുന്ന ഗ്യാനേഷ് കുമാർ രാജിവയ്ക്കുക, എസ്.ഐ.ആർ. നടപടികൾ നിർത്തിവയ്ക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു കഴിഞ്ഞ ഒക്ടോബർ 2 ഗാന്ധി ജയന്തി ദിനത്തിൽ മുംബൈയിലെ ശിവജി പാർക്കിൽ CJPയുടെ പ്രതിഷേധം. ഈ പ്രക്ഷോഭ പരിപാടിക്കിടെ അഭിജീത്തിനെ ജനങ്ങൾ മർദ്ദിച്ചു എന്ന വാദത്തോടെയാണ് ഒരു വീഡിയോ ഫേസ്ബുക്ക് അടക്കമുള്ള പ്ലാറ്റ്‌ഫോമുകളിൽ ഇപ്പോൾ വൈറലായത്.

വൈറൽ വീഡിയോയുടെ കീഫ്രെയിമുകൾ ഉപയോഗിച്ച് റിവേഴ്സ് ഇമേജ് സെർച്ച് നടത്തിയപ്പോൾ ഈ വീഡിയോ കഴിഞ്ഞ ജൂണിലേതാണെന്ന് വ്യക്തമായി. എൻ.ഡി.ടി.വി , എ.ബി.പി ന്യൂസ്, സി.എൻ.എൻ-ന്യൂസ്18 എന്നീ മാധ്യമങ്ങൾ 2026 ജൂൺ 15-ന് ഈ സംഭവത്തിന്റെ ദൃശ്യങ്ങൾ സംപ്രേഷണം ചെയ്തിട്ടുണ്ട്.

നീറ്റ് ചോദ്യപേപ്പർ ചോർച്ച, തൊഴിലില്ലായ്മ, അഴിമതി എന്നീ വിഷയങ്ങൾ ഉന്നയിച്ച് ജയ്പൂരിലെ ഷഹീദ് സ്മാരകിൽ യുവാക്കൾ സംഘടിപ്പിച്ച പ്രതിഷേധത്തിനിടെയായിരുന്നു ആക്രമണം നടന്നത്. അനുയായികൾ ദീപ്കെയെ തോളിലേറ്റിക്കൊണ്ടുപോകുമ്പോൾ ഒരു സംഘമെത്തി അദ്ദേഹത്തെ മർദ്ദിക്കുകയായിരുന്നു. ഈ സംഭവവുമായി ബന്ധപ്പെട്ട് പോലീസ് രണ്ട് യുവാക്കളെ കസ്റ്റഡിയിലെടുക്കുകയും ചെയ്തിരുന്നു. അന്നത്തെ സംഭവത്തിന്‍റെ ദൃശ്യങ്ങളാണ് ഇപ്പോൾ തെറ്റായി പ്രചരിപ്പിക്കുന്നതെന്ന് വ്യക്തമായി.

വാസ്തവം

ഒക്ടോബർ 2-ന് മുംബൈയിലെ ശിവജി പാർക്കിൽ നടന്ന പ്രതിഷേധ പരിപാടിക്കിടെ അഭിജിത് ദീപകെയ്ക്ക് നേരെ ആക്രമണമുണ്ടായതായി റിപ്പോർട്ടുകളില്ല. കഴിഞ്ഞ ജൂൺ 15-ന് ജയ്പൂരിൽ നടന്ന ആക്രമണത്തിന്‍റെ ദൃശ്യങ്ങളാണ് തെറ്റായി പ്രചരിക്കുന്നത്.

Content Highlights: A viral video claimed CJP founder Abhijit Dipake was attacked during an October 2, 2026 protest in Mumbai., Mathrubhumi Fact Check confirmed the video is actually from June 15, 2026, in Jaipur during a protest over NEET paper leak and unemployment., No such attack on Abhijit Dipake occurred in Mumbai at Shivaji Park.