ആയിരത്തിലൊന്ന്; വെളുത്ത നിറമുള്ള അപൂർവ അണ്ണാനെ കണ്ടെത്തി; നിറത്തിനുപിന്നിൽ ല്യൂസിസമെന്ന പ്രതിഭാസം

വെള്ളറട: കേരള തമിഴ്‌നാട് അതിർത്തിയിൽ ചിറ്റാറിനുസമീപം നെട്ടയിൽ വെളുത്ത നിറത്തിലുള്ള അപൂർവ അണ്ണാനെ കണ്ടെത്തി. മരച്ചില്ലയിലിരിക്കുന്ന വെളുത്ത അണ്ണാന്റെ അപൂർവ ചിത്രം മുടവൻമുഗൾ ഗവ. എൽപി സ്കൂളിലെ അധ്യാപകനായ സുമേഷ് വെള്ളറടയാണ് ക്യാമറയിൽ പകർത്തിയത്. 

പ്രദേശത്തെ വർഷങ്ങളായുള്ള നിരീക്ഷണത്തിനുശേഷമാണ് വെളുത്ത അണ്ണാനെ കണ്ടെത്താൻ സാധിച്ചതെന്ന് അദ്ദേഹം പറഞ്ഞു. തിരുവനന്തപുരം ആസ്ഥാനമായി പ്രവർത്തിക്കുന്ന ഷോല നാച്ചുറൽ സൊസൈറ്റിയിലെ അംഗംകൂടിയാണ് സുമേഷ്. 

ജന്തുക്കളിൽ ല്യൂസിസം എന്നുവിളിക്കപ്പെടുന്ന ഈ പ്രതിഭാസം ശരീരത്തിലെ നിറം നൽകുന്ന വർണകങ്ങളുടെ കുറവുമൂലമാണ് ഉണ്ടാകുന്നതെന്നും സാധാരണ നിറംമാറി വെളുത്തനിറത്തിൽ ജീവി കാണപ്പെടുന്നതായി വന്യജീവി ഗവേഷകനായ ഡോ.സന്ദീപ് ദാസ് പറഞ്ഞു. ആയിരങ്ങളിൽ ഒരെണ്ണത്തിനുമാത്രമേ ഇത്തരത്തിൽ നിറവ്യത്യാസം കാണപ്പെടാറുള്ളൂവെന്നും അദ്ദേഹം പറഞ്ഞു.

Content Highlights: squirrel in white colour have been identified