ഒരുദിവസം തള്ളുന്നത് 8000 ടൺ നിർമാണമാലിന്യം; മുംബൈയിൽ ‍ഡിജിറ്റൽ ഡാഷ്ബോർഡിന് നിർദേശവുമായി ബി.എം.സി.

മുംബൈ: രാജ്യത്തിന്റെ സാമ്പത്തിക തലസ്ഥാനമായ മുംബൈയിൽ പ്രതിദിനം തള്ളുന്നത് വൻതോതിലുള്ള നിർമാണ മാലിന്യം. 8000 ടണ്ണിലധികം മാലിന്യമാണ് ഈ മേഖലയിൽനിന്ന് പ്രതിദിനമുണ്ടായിക്കൊണ്ടിരിക്കുന്നത്. ഇത് ഗാർഹിക മേഖലയിൽനിന്ന് തള്ളുന്ന മാലിന്യത്തേക്കാൾ ഏകദേശം 1,000 ടൺ കൂടുതലാണ്.

ഗാർഹിക മാലിന്യം സംസ്കരിക്കുന്നതിന് മുംബൈയിൽ മതിയായ അടിസ്ഥാന സൗകര്യങ്ങളുണ്ടെങ്കിലും, നിർമാണമേഖലയുമായി ബന്ധപ്പെട്ട അവശിഷ്ടങ്ങൾ കൈകാര്യം ചെയ്യുന്നതിന് ആവശ്യമായ സൗകര്യങ്ങളില്ല. ഈ കുറവ് പരിഹരിക്കുന്നതിനായി ബി.എം.സി. ഒരു പുതിയ കർമപദ്ധതിക്ക് രൂപം നൽകിയിട്ടുണ്ട്.

ഡൽഹി മാതൃകയിൽ ഡിജിറ്റൽ ഡാഷ്ബോർഡിന് നിർദേശം

അമിതമായ നിർമാണ പ്രവർത്തനങ്ങൾ മൂലം ഉയർന്നുവരുന്ന മാലിന്യ പ്രതിസന്ധിയെ നേരിടുന്നതിനായി ഡൽഹി മാതൃകയിൽ ഒരു ഡിജിറ്റൽ ഡാഷ്ബോർഡ് സൃഷ്ടിക്കാൻ ബി.എം.സി. നിർദേശിച്ചിട്ടുണ്ട്. ഈ ഓൺലൈൻ സംവിധാനത്തിന് കീഴിൽ, ഓരോ റിയൽ എസ്റ്റേറ്റ് ഡിവലപ്പറും ഇൻഫ്രാസ്ട്രക്ചർ ഏജൻസിയും അവർ സൃഷ്ടിക്കുന്ന മാലിന്യത്തിന്റെ അളവ്, അത് എവിടെ, എങ്ങനെ സംസ്കരിക്കാൻ ഉദ്ദേശിക്കുന്നു എന്നതിനെക്കുറിച്ചുള്ള വിശദാംശങ്ങൾ നൽകേണ്ടത് നിർബന്ധമായിരിക്കും.

കൂടാതെ, നിലവിലുള്ളവയുടെ ശേഷി വർധിപ്പിക്കുന്നതിനൊപ്പം പുതിയ സംസ്കരണ സൗകര്യങ്ങൾ സ്ഥാപിക്കുന്നതിനുള്ള വ്യവസ്ഥകളും കർമപദ്ധതിയിൽ ഉൾപ്പെടുന്നു. കഴിഞ്ഞ മാസമാണ് ബി.എം.സി. ഈ സമഗ്രമായ കർമപദ്ധതി ഒരു ഉന്നതതല സമിതിക്ക് മുന്നിൽ അവതരിപ്പിച്ചത്.

മുംബൈയിലെ വായു മലിനീകരണത്തിന്റെ തോത് വർധിച്ചുവരുന്നത് സംബന്ധിച്ച് സ്വമേധയാ കേസെടുത്ത ബോംബെ ഹൈക്കോടതിയാണ് ഈ കമ്മിറ്റി രൂപവത്കരിച്ചത്. അഞ്ച് വർഷം മുമ്പ്, പ്രതിദിനം 1,200 മുതൽ 1,300 ടൺ വരെ അവശിഷ്ടങ്ങൾ മാത്രമേ ഉത്പാദിപ്പിക്കപ്പെട്ടിരുന്നുള്ളൂ.

നഗരത്തിലെ ഗാർഹിക ഖരമാലിന്യ ഉത്പാദനം പ്രതിദിനം 7,000 ടൺ ആണ്. ഗുരുതരമായ വെല്ലുവിളിയാണ് ഇത് സൃഷ്ടിക്കുന്നത്. നിലവിൽ, ഈ പ്രശ്‌നം പരിഹരിക്കുന്നതിന് വ്യക്തമായ ഒരു മാർഗനിർദേശമില്ലെന്ന് ഖരമാലിന്യ മാനേജ്‌മെന്റ് വകുപ്പ് ഡെപ്യൂട്ടി കമ്മിഷണർ കിരൺ ദിഗ്‌വേകർ പറഞ്ഞു.

നിർമാണപദ്ധതികളിൽ ഗണ്യമായ വർധന

കഴിഞ്ഞ മൂന്ന് വർഷത്തിനിടെ, മുംബൈയിലുടനീളമുള്ള നിർമാണ പദ്ധതികളിൽ ഗണ്യമായ വർധനയുണ്ടായി. റോഡ്, ഗതാഗത അടിസ്ഥാന സൗകര്യ പദ്ധതികൾക്ക് പുറമേ, നിലവിൽ 2000-ത്തിലധികം പഴയ കെട്ടിടങ്ങൾ സ്വകാര്യനിർമാതാക്കൾ പുനർനിർമിച്ചുവരുകയാണ്.

അതോടൊപ്പം, മഹാരാഷ്ട്ര ഹൗസിങ് ആൻഡ് ഏരിയ ഡിവലപ്മെന്റ് അതോറിറ്റി (മാഡ), ചേരിപുനരധിവാസ അതോറിറ്റി (എസ്.ആർ.എ.) എന്നിവ ഒട്ടേറെ പുതിയ ഭവന പദ്ധതികളും നടപ്പാക്കുന്നുണ്ട്.

Content Highlights: C., Mandatory reporting for real estate developers and infrastructure agencies., Initiative follows Bombay High Court intervention regarding rising air pollution., Significant increase in redevelopment projects (2,000+ buildings) driving waste surge.