ഗ്രേറ്റ് നിക്കോബാർ പദ്ധതി; ഒരു പാരിസ്ഥിതിക- മാനുഷിക വിപത്ത്

ഗ്രേറ്റ് നികോബാറിൽ ഒരു അന്താരാഷ്ട്ര ട്രാൻസ്ഷിപ്മെന്റ് തുറമുഖം, വിമാനത്താവളം, 160 ചതുരശ്ര കിലോമീറ്റർ വിസ്തീർണമുള്ള ഒരു ടൗൺഷിപ്പ് എന്നിവയുടെ നിർമാണം കേന്ദ്രസർക്കാരിന്റെ ഒരു സ്വപ്നപദ്ധതിയാണ്. ഇന്ത്യയുടെ കിഴക്കൻ സമുദ്രാതിർത്തിയിൽ മലാക്കാ കടലിടുക്കിനു വടക്കുഭാഗത്ത്‌ സ്ഥിതിചെയ്യുന്ന ദ്വീപിനെ ഇന്ത്യയുടെ ‘സിങ്കപ്പൂർ അല്ലെങ്കിൽ ഹോങ്‌ കോങ്‌’ ആയി പുനർനിർമിക്കുമെന്ന് സർക്കാർ വാഗ്ദാനംചെയ്യുന്നു; ചരിത്രത്തിലെ ഏറ്റവും വലിയ പാരിസ്ഥിതിക ദുരന്തങ്ങളിലൊന്നിന്റെ എല്ലാ രൂപങ്ങളും ഈ പദ്ധതി ഉൾക്കൊള്ളുന്നു എന്നതാണ് സത്യം.

ചൈന ഉൾപ്പെടെയുള്ള പ്രാദേശിക എതിരാളികളെ മറികടക്കാൻ തന്ത്രപരമായി സ്ഥാപിക്കാൻ ഉദ്ദേശിച്ചിട്ടുള്ള ആഴത്തിലുള്ള ഡ്രാഫ്റ്റ് തുറമുഖമായി വിഭാവനം ചെയ്തിരിക്കുന്ന ഈ പദ്ധതി അതിന്റെ സാധ്യതയെ ചോദ്യംചെയ്യുന്ന ലോജിസ്റ്റിക്കൽ, സുരക്ഷ, സാമ്പത്തിക വൈരുധ്യങ്ങൾ നിറഞ്ഞതാണ്. 72,000-92,000 കോടി രൂപയുടെ വൻ നിക്ഷേപത്തോടെ, ഈ പദ്ധതി ഒരു അനിയന്ത്രിതമായ അത്യാഗ്രഹവും മനുഷ്യത്വത്തോടും പ്രകൃതിയോടുമുള്ള ആഴത്തിലുള്ള അവഗണനയുംപേറുന്ന ഒരു ചൂതാട്ടവുമാണ്.

ഒരു മാനുഷിക-പാരിസ്ഥിതിക ദുരന്തം

പാരിസ്ഥിതിക ദുരന്തം മനുഷ്യനിൽനിന്ന് വേർതിരിക്കാനാവാത്തതാണ്. കിഴക്കൻ തീരത്തെ ഏഴ് റവന്യൂഗ്രാമങ്ങൾ ഒഴികെ, മുഴുവൻ ദ്വീപും രണ്ട് തദ്ദേശീയ സമൂഹങ്ങൾക്കായി ഒരു ഗോത്ര സംരക്ഷണകേന്ദ്രമായി പ്രഖ്യാപിക്കപ്പെട്ടതാണ്. പ്രത്യേകിച്ച് ദുർബല ഗോത്രവിഭാഗമായ ഷോംപെൻ, സതേൺ നികോബാറീസ് എന്നിവർ ആയിരക്കണക്കിന് വർഷങ്ങളായി ജീവിക്കുന്ന ഇടമാണ് ഈ ദ്വീപ്. അവരുടെ പൂർവിക വനത്തിന്റെ നാശം കേവലം ഒരു പാരിസ്ഥിതിക ചെലവല്ല; അത് ഒരു ജനതയുടെ ജീവിതനിലവാരം, സംസ്കാരം, ഭാവി എന്നിവയുടെ ഉന്മൂലനമാണ്.

ഇന്ത്യയിലെ നാലെണ്ണത്തിൽ ഒന്നായ ‘സുൻഡലാൻഡ്’ ബയോഡൈവേഴ്സിറ്റി ഹോട്ട്സ്പോട്ടിന്റെ ഭാഗമാണ് ഗ്രേറ്റ് നികോബാർ, 2013-ൽ യുനെസ്കോ ബയോസ്ഫിയർ റിസർവായി പ്രഖ്യാപിച്ചു. പവിഴപ്പുറ്റുകളാൽ അതിർത്തിപങ്കിടുന്ന ഈ ജൈവനിധിയിൽ 650-ലധികം ഇനം പലജാതി സസ്യവർഗങ്ങൾ അടങ്ങിയിരിക്കുന്നു. ഇന്തോ-പസഫിക്കിലെ വംശനാശഭീഷണി നേരിടുന്ന ലെതർബാക്ക് കടലാമകൾ കാണപ്പെടുന്നത് ഇവിടെയാണ്. മാത്രവുമല്ല, ഇന്ത്യൻ വൻകരയിൽ എത്തുന്ന തെക്കുപടിഞ്ഞാറൻ മൺസൂണിന്റെ മുന്നോടിയായി ഒരു നിർണായക പങ്കുവഹിക്കുന്ന ഈ ഉഷ്ണമേഖലാ വനങ്ങളിൽ ഒരുദശലക്ഷം മരങ്ങൾ വെട്ടിമാറ്റാൻ അടയാളപ്പെടുത്തിയിട്ടുണ്ട്.

ഭൗമശാസ്ത്രപരമായ സജീവത

ലോകത്തെ ഭൗമശാസ്ത്രപരമായ ഏറ്റവും സജീവമായ മേഖലകളിൽ ഒന്നിലാണ് ഗ്രേറ്റ് നികോബാർ സ്ഥിതിചെയ്യുന്നത്-പദ്ധതി ഗൗരവമായി എടുത്തിട്ടില്ലാത്ത ആഴത്തിലുള്ള ഭൂമിശാസ്ത്രപരമായ അപകടസാധ്യത. ഇൻഡൊനീഷ്യയിലെ ബന്ദ ആഷെയ്ക്ക് വളരെ അടുത്താണ് ഈ ദ്വീപ് സ്ഥിതിചെയ്യുന്നത്. 2004-ൽ സുമാത്രയുടെ പടിഞ്ഞാറൻതീരത്ത് ഉണ്ടായ 9.2 ശക്തിയുള്ള ഭൂകമ്പത്തിന്റെ പ്രഭവകേന്ദ്രം. അവിടെ ഇന്ത്യൻ പ്ലേറ്റിന്റെ കിഴക്കൻഭാഗം മില്ലിമീറ്റർ പാകത്തിൽ തെക്കുകിഴക്കൻ ഏഷ്യയുടെ താഴത്തേക്ക്‌ പോയ്‌ക്കൊണ്ടിരിക്കുകയാണ്.

15-20 കിലോമീറ്റർ താഴ്ചയിലാണ് 2004-ലെ ഭൂകമ്പം ഉണ്ടായത്. പ്ലേറ്റ് അതിർത്തിയുടെ 1200 കിലോമീറ്ററിലധികം അതുമൂലം പിളർന്നു. കടലിനടിയിലെ ട്രില്യൺ കണക്കിന് ടൺ പാറകൾ സ്ഥാനഭ്രംശം സംഭവിച്ചു. ഈ ചലനം ഒട്ടേറെ ട്രില്യൺ കണക്കിനു ടൺ വെള്ളം സ്ഥാനഭ്രംശം വരുത്തി, ഇത് ഒരു വലിയ സുനാമി സൃഷ്ടിച്ചു. ആ സംഭവത്തിനുശേഷം ശേഖരിച്ച സാറ്റലൈറ്റ് ഡേറ്റ കാണിക്കുന്നത്‌ ഗ്രേറ്റ് നികോബാറിൽത്തന്നെ മൂന്നുമുതൽ നാലുമീറ്റർവരെ പെട്ടെന്നുള്ള താഴ്ന്നുപോകൽ അനുഭവപ്പെട്ടു എന്നാണ്‌. തുടർച്ചയായ ഒരു ടെക്‌റ്റോണിക് ചക്രത്തിന്റെ പ്രകടനമായിരുന്നു അത്.

ബുള്ളറ്റിൻ ഓഫ് ദി സീസ്‌മോളജിക്കൽ സൊസൈറ്റി ഓഫ് അമേരിക്ക പോലുള്ള ജേണലുകളിൽ പ്രസിദ്ധീകരിച്ച ഞങ്ങളുടെ സ്വന്തം പഠനങ്ങൾ കാണിക്കുന്നത്, ഈ പ്രദേശം തുടർച്ചയായ ഭൗമഘടനാപരമായ സമ്മർദരൂപവത്‌കരണത്തിന്റെയും മോചനത്തിന്റെയും ചാക്രികമായ ഒരു രീതി പിന്തുടരുന്നു എന്നാണ്. വർഷങ്ങളായി, ഉപരിതലത്തിനടിയിൽ ടെക്‌റ്റോണിക് സ്‌ട്രെയിൻ അടിഞ്ഞുകൂടുമ്പോൾ ഭൂമി പതുക്കെ ഉയരുന്നതായി ഞങ്ങൾ ശേഖരിച്ച സാറ്റലൈറ്റ് ഡേറ്റ കാണിക്കുന്നു. വലിയ ഭൂകമ്പങ്ങളിൽ ഈ അടിഞ്ഞുകൂടിയ സമ്മർദം പുറത്തുവരുന്നു, ഇപ്പോൾ നികോബാർ മേഖല ഒരു ഇന്റർസീസ്മിക് കാലഘട്ടത്തിലേക്ക് പ്രവേശിച്ചതിനാൽ, അടുത്ത വലിയ ഭൂകമ്പംവരെ കരയും സമുദ്രത്തിന്റെ അടിത്തട്ടും പതുക്കെ വീണ്ടും ഉയരുന്നു.

സിങ്കപ്പൂരിന്റെയോ ഹോങ്‌ കോങ്ങിന്റെയോ സ്ഥിരതയുള്ള ഭൂമിശാസ്ത്രത്തിൽനിന്ന് വ്യത്യസ്തമായി, ഗ്രേറ്റ് നികോബാർമേഖല സാവധാനത്തിലുള്ള ഉയർച്ചയുടെയും പെട്ടെന്നുള്ള താഴ്ന്നുപോകലിന്റെയും ചാക്രിക ചലനങ്ങൾക്ക് വിധേയമാകുന്നു. കുറച്ച് നിമിഷങ്ങൾക്കുള്ളിൽ ഒട്ടേറെ മീറ്റർ ആവർത്തിച്ച് കുറയുന്ന കരയിൽ ഒരു തുറമുഖത്തിന്റെയോ വിമാനത്താവളത്തിന്റെയോ നഗരത്തിന്റെയോ സമഗ്രത ഉറപ്പാക്കാൻ കഴിയില്ല.

അസ്ഥിരമായ ഇത്തരം സ്ഥലങ്ങളിൽ വലിയതോതിലുള്ള സ്ഥിരമായ അടിസ്ഥാനസൗകര്യങ്ങൾ നിർമിക്കുന്നത്, എൻജിനിയറിങ്ങിന് ഭൂമി പ്രക്രിയകളെ മറികടക്കാൻ കഴിയുമെന്ന മിഥ്യാധാരണയിൽനിന്നാണ്‌.

കാലാവസ്ഥമൂലം സമുദ്രനിരപ്പ് ഉയരുന്നത് ഈ മേഖലയ്ക്കായി പ്രതീക്ഷിക്കുന്നതിനാൽ യാഥാർഥ്യം കൂടുതൽ സങ്കീർണമാണ്. ഉയരുന്ന കടലിന്റെയും മുങ്ങുന്ന കരയുടെയും കൃത്യമായ മേഖലയിൽ നിർദിഷ്ട മെഗാ-ഇൻഫ്രാസ്ട്രക്ചർ സ്ഥിതിചെയ്യും. ഗ്രേറ്റ് നികോബാർ പദ്ധതി കേവലം പാരിസ്ഥിതികവിനാശം മാത്രമല്ല, അത് ഭൂമിശാസ്ത്രപരമായി അസാധ്യവുമാണ്.

ഡിഫൻസ് റിസർച്ച് ആൻഡ് സ്റ്റഡീസിലെ ഒരു ഉൾക്കാഴ്ചയുള്ള ലേഖനത്തിൽ, റിയർ അഡ്മിറൽ (റിട്ട.) സുധീർപിള്ള, ‘ലോകത്തെ ഏറ്റവും അപകടകരമായ ഭൂമിശാസ്ത്രമേഖലകളിൽ ഒന്നിലെ ഭൂകമ്പപരമായി സജീവമായ ഒരു ദ്വീപിൽ പ്രധാന തുറമുഖവും വ്യോമതാവള അടിസ്ഥാനസൗകര്യങ്ങളും നിർമിക്കുന്നത് അപകടസാധ്യതയാണ്’ എന്ന് സമ്മതിക്കുന്നു. ഒരു ഭൂകമ്പസംഭവം- കൃത്യമായി പറഞ്ഞാൽ ഉയർന്ന പരിണതഫലങ്ങളുള്ള, തടസ്സങ്ങൾ പ്രതീക്ഷിക്കാവുന്ന ഈ പ്രദേശം തന്ത്രപ്രധാനമായ ഒരു ഫോർവേഡ് ബേസ് അല്ല, അത് ഒരു വൻബാധ്യതയാണ് എന്നാണ് സുധീർപിള്ള പറയുന്നത്.

Content Highlights: The Great Nicobar project threatens a UNESCO-recognized biodiversity hotspot and the ancestral home of Shompen and Nicobarese tribes., Geological instability in the region poses a severe risk to large-scale infrastructure due to cyclical tectonic subsidence and earthquake vulnerability., The project's economic and logistical viability is questioned by experts, citing potential for catastrophic failure in a high-risk seismic zone., Over one million trees are marked for felling, endangering endemic species and essential monsoon-regulating ecosystems.