പുതുപ്പള്ളിയിലും UDF സംഘടനാശേഷി തെളിയിച്ചു, വിജയം ഉമ്മന്ചാണ്ടിക്കുള്ള ആദരം- സതീശന്
കോട്ടയം: ഏത് കേഡര് പാര്ട്ടിയെയും വെല്ലുന്ന തരത്തില് തിരഞ്ഞെടുപ്പ് പ്രവര്ത്തനം നടത്താനും വിജയം ഉറപ്പാക്കാനുമുള്ള സംഘടനാശേഷി യു.ഡി.എഫിനുണ്ടെന്ന് തൃക്കാക്കരയ്ക്ക് പിന്നാലെ പുതുപ്പള്ളിയിലും തെളിയിക്കപ്പെട്ടുവെന്ന് പ്രതിപക്ഷ നേതാവ് വി.ഡി സതീശന്. ജനവിരുദ്ധ സര്ക്കാരിനെതിരെ പേരാടാനും മുന്നോട്ട് കുതിക്കാനുമുള്ള ഇന്ധനമാണ് ഉമ്മന് ചാണ്ടിയുടെ പുതുപ്പള്ളി യു.ഡി.എഫിന് നല്കിയത്.
സ്നേഹംകൊണ്ട് ലോകം ജയിച്ച ഉമ്മന് ചാണ്ടിക്ക് പുതുപ്പള്ളി തിരിച്ച് നല്കിയ ആദരവാണ് യു.ഡി.എഫിന്റെ ചരിത്ര വിജയം. സര്ക്കാരിനെതിരായ ജനവികാരം എത്രമാത്രം വലുതാണെന്ന് തിരഞ്ഞെടുപ്പ് ഫലം തെളിയിക്കുന്നു. വോട്ടു ചെയ്തത് പുതുപ്പള്ളിയാണെങ്കിലും ഫലത്തില് പ്രതിഫലിച്ചത് കേരളത്തിന്റെ പൊതുമനസ്സാണെന്ന് അദ്ദേഹം ഫെയ്സ്ബുക്ക് പോസ്റ്റില് പറഞ്ഞു.
ടീം യുഡിഎഫിനുള്ളതാണ് ഈ വിജയത്തിന്റെ ക്രെഡിറ്റ്. രാപ്പകല് വ്യത്യാസമില്ലാതെ പ്രവര്ത്തകരും നേതാക്കളും ഒരേ മനസോടെ പ്രവര്ത്തിച്ചു. പോരായ്മകള് തിരിച്ചറിഞ്ഞു, അത് തിരുത്തി. സംഘടനാ സംവിധാനത്തെ കുറ്റമറ്റരീതിയില് എണ്ണയിട്ട യന്ത്രംപോലെ പ്രവര്ത്തിപ്പിക്കാനായി. കൂട്ടായ്മയുടെയും സംഘബോധത്തിന്റെയും സ്നേഹത്തിന്റെയും വിജയമാണ് പുതുപ്പള്ളിയില് കണ്ടത്.
ഒറ്റക്കെട്ടായി നിന്ന് പോരാടിയാല് ലോക്സഭയിലും തദ്ദേശ തെരഞ്ഞെടുപ്പിലും യുഡിഎഫിന് വിജയം ആവര്ത്തിക്കാം. ജനങ്ങള് ആഗ്രഹിക്കുന്നതു പോലെ ഈ ജനവിരുദ്ധ സര്ക്കാരിനെ 2026-ല് താഴെയിറക്കാം. പുതുപ്പള്ളിയിലെ വോട്ടര്മാര്ക്കും ഒപ്പം നിന്ന കേരള ജനതയ്ക്കും യു.ഡി.എഫ് പ്രവര്ത്തകര്ക്കും നേതാക്കള്ക്കും നന്ദി പറയുന്നുവെന്നും അദ്ദേഹം വ്യക്തമാക്കി.
Content Highlights: UDF proved its organizational ability in Puthupally too says satheesan