രാജ്മഹല്‍ കൈവിടുമോ? ആദിവാസി-മുസ്ലിം ഐക്യം പൊളിക്കാന്‍ 'ഘുസ്‌പൈഠി' ആയുധമാക്കി ബിജെപി
'ഘുസ്‌പൈഠി' അഥവാ നുഴഞ്ഞുകയറ്റം എന്ന ആരോപണം ശക്തമായി ബി.ജെ.പി. ഉയര്‍ത്തുന്ന ഝാര്ഖണ്ഡ് സംസ്ഥാനത്തെ, ആ ആരോപണത്തിന്റെ കേന്ദ്രസ്ഥാനമായി ബി.ജെ.പിക്കാര്‍ തന്നെ പ്രചരിപ്പിക്കുന്ന ഇടമാണ് രാജ്മഹല്‍. ഗംഗാനദിയുടെ തീരം. സാന്താള്‍ പര്‍ഗാന ഡിവിഷന്റെ ആസ്ഥാനമായ ദുംക പട്ടണത്തില്‍നിന്ന് 150 കിലോമീറ്റര്‍ വടക്കു കിഴക്കേ അറ്റത്തേക്ക് നീങ്ങണം ഇവിടേക്കെത്താന്‍. റോഡിനിരുവശങ്ങളിലുമായി ഇടതൂര്‍ന്ന കാടുകള്‍. ഇടയ്ക്ക് ചില ഇടറോഡുകള്‍ കല്‍ക്കരിപ്പാടങ്ങളിലേക്ക്... അവിടെ നിന്ന് കല്‍ക്കരി നിറച്ച ട്രക്കുകള്‍ പൊടി പാറിച്ച് തലങ്ങും വിലങ്ങും ഓടുന്നു. ചിലര്‍സൈക്കിളിലും ഇരുചക്രവാഹനങ്ങളിലും കല്‍ക്കരി നിറച്ച ചാക്കുകെട്ടുകള്‍ കെട്ടിവലിച്ച് കിതച്ച് നീങ്ങുന്നു. കല്‍ക്കരിപ്പൊടിയാല്‍ മരങ്ങളുടെ ഇലകള്‍ കറുത്തു പോയി.
സാഹിബ്ഗഞ്ച് ജില്ലയിലെ രാജ്മഹലിലേക്ക് ഗംഗയിലൂടെ ബംഗ്ലാദേശില്‍നിന്നും ബംഗാളില്‍നിന്നും ആളുകളെത്തുന്നുവെന്നാണ് ബി.ജെ.പിക്കാരുടെ ആക്ഷേപം. സാഹിബ്ഗഞ്ച്, പാകുര്‍ ജില്ലകളിലെ വിവിധ ഗ്രാമങ്ങളിലേക്ക് മുസ്ലിം നുഴഞ്ഞുകയറ്റക്കാരെത്തി ആദിവാസി പെണ്‍കുട്ടികളെ വിവാഹം ചെയ്ത് അവരുടെ ഭൂമി കൈക്കലാക്കുന്നുവെന്നും ഇതിലൂടെ മേഖലയുടെ ആദിവാസി സ്വത്വത്തെ മാറ്റിമറിക്കുന്നുവെന്നും ഇത്തവണത്തെ നിയമസഭാ തിരഞ്ഞെടുപ്പില്‍ ബി.ജെ.പി. തീവ്രമായി പ്രചരിപ്പിക്കുന്നുണ്ട്. ഇത്തരത്തില്‍ നുഴഞ്ഞുകയറ്റക്കാര്‍ കടന്നുവരുന്നത് ഗംഗാതീരത്തെ ഈ രാജ്മഹല്‍ ദേശത്ത് കൂടിയാണെന്നാണ് വാദം.
Content Highlights: Jharkhand`s Rajmahal is at the center of a BJP claim of Muslim infiltration