അച്ഛൻ അനുഭവിച്ചതിന് കണക്കുചോദിച്ച് മകൾ; വഴിയടച്ചവർക്ക് മുഖമടച്ച് മറുപടി; ഈ വിജയം മധുരപ്രതികാരം

കടയ്ക്കൽ (കൊല്ലം): കുമ്മിൾ പഞ്ചായത്തിലെ സിപിഎം കോട്ടയായ തൃക്കണ്ണാപുരത്തുനിന്ന് കോൺഗ്രസ് സ്ഥാനാർഥി അശ്വതി ഉത്തമൻ പൊരുതിനേടിയ ജയം ഒരു മധുരപ്രതികാരത്തിന്റെ കഥകൂടിയാണ്. അച്ഛൻ പാർട്ടി വിട്ടതിനെത്തുടർന്ന് സിപിഎമ്മിൽനിന്ന് വർഷങ്ങളോളം കുടുംബത്തിന് നേരിടേണ്ടിവന്ന ഭീഷണികൾക്കും ഊരുവിലക്കിനും ലഭിച്ച മുഖമടച്ചുള്ള മറുപടിയായി അശ്വതിയുടെ ഈ വിജയം. പഞ്ചായത്തംഗമായി മകൾ സത്യപ്രതിജ്ഞ ചെയ്യുന്നത് കാണാൻ കർഷകനായ അച്ഛൻ തൃക്കണ്ണാപുരം നീലാ കോട്ടേജിൽ പുരുഷോത്തമൻ ഞായറാഴ്ച മുൻനിരയിലുണ്ടായിരുന്നു.

സിപിഎം ലോക്കൽ കമ്മിറ്റി അംഗമായിരുന്ന പുരുഷോത്തമൻ വർഷങ്ങൾക്കുമുൻപ് നേതൃത്വവുമായുള്ള അഭിപ്രായ ഭിന്നതയെത്തുടർന്ന് പാർട്ടിവിട്ട് കോൺഗ്രസിൽ ചേർന്നതോടെയാണ് ദുരിതപർവങ്ങളുടെ തുടക്കം. പാർട്ടി ഗ്രാമമായ ഇവിടെ മറ്റു പാർട്ടിക്കാരെ പ്രവർത്തിക്കാൻ അനുവദിച്ചിരുന്നില്ല. പുരുഷോത്തമനെതിരേ ഭീഷണി, മർദനം, ഊരുവിലക്ക്, വീട്ടിലേക്കുള്ള വഴി തടസ്സപ്പെടുത്തൽ എന്നിവ നിരന്തരമായുണ്ടായി. വർഷങ്ങളായി അനുഭവിച്ച മാനസിക പീഡനങ്ങൾക്ക് കണക്കില്ലെന്ന് കുടുംബം പറയുന്നു. തിരഞ്ഞെടുപ്പ് സമയത്ത് ബൂത്തിൽനിന്ന് ഇറങ്ങിവരുമ്പോൾ പാർട്ടിക്കാർ കൂട്ടംകൂടിനിന്ന് കൂകും. മുണ്ട് വലിച്ചൂരും. മുഖത്തടിച്ച അനുഭവങ്ങൾ പോലുമുണ്ടായിട്ടുണ്ടെന്നും കുടുംബം പറയുന്നു.

ബിരുദാനന്തര ബിരുദധാരിയായ മകളെ കോൺഗ്രസിലൂടെ സ്വന്തം വാർഡിൽനിന്ന് പഞ്ചായത്തംഗമാക്കി താനും കുടുംബവും അനുഭവിച്ച പീഡനങ്ങൾക്ക് മറുപടി നൽകുകയെന്നതായിരുന്നു പുരുഷോത്തമന്റെ ലക്ഷ്യം. കഴിഞ്ഞതവണ സംവരണ വാർഡായ ആനപ്പാറയിൽ മത്സരിച്ചെങ്കിലും പരാജയപ്പെട്ടു. ഇത്തവണ ജനറൽ വാർഡായ തൃക്കണ്ണാപുരം കോൺഗ്രസ് അശ്വതി ഉത്തമന് നൽകി. അനായാസ വിജയം പ്രതീക്ഷിച്ച ഇടതുകേന്ദ്രങ്ങളെ ഞെട്ടിച്ച് 19 വോട്ടിന്റെ ഭൂരിപക്ഷത്തിലായിരുന്നു വിജയം. പ്രശ്‌നബാധിത ബൂത്തായ ഇവിടെ സ്വന്തം ചെലവിൽ പണംമുടക്കി നിരീക്ഷണ ക്യാമറ ഉൾപ്പെടെ അശ്വതി സ്ഥാപിച്ചിരുന്നു.

Content Highlights: Congress Triumph in CPM Stronghold: A Daughter's Electoral Revenge