എസ്‌ഐആര്‍ രേഖയായി ആധാര്‍; കേരളത്തില്‍ ആരൊക്കെ പുറത്താകും അകത്താകും?

തിരഞ്ഞെടുപ്പ് പടിവാതില്‍ക്കലെത്തി നില്‍ക്കെ ബിഹാറില്‍ നടത്തിയ വോട്ടര്‍പട്ടിക പ്രത്യേക തീവ്ര പരിഷ്‌കരണത്തിന്റെ (എസ്‌ഐആര്‍) വിവാദങ്ങളും അലയൊലികളും താല്‍ക്കാലികമായി അവസാനിച്ച ശേഷം കേരളത്തിലും എസ്‌ഐആര്‍ നടത്താന്‍ തീരുമാനിച്ചിരിക്കുകയാണ് തിരഞ്ഞെടുപ്പ് കമ്മിഷന്‍. കേരളം അടക്കം ഒമ്പത് സംസ്ഥാനങ്ങളിലെയും മൂന്ന് കേന്ദ്രഭരണ പ്രദേശങ്ങളിലെയും എസ്‌ഐആര്‍ നടപടികള്‍ ഒക്ടോബർ 28 മുതല്‍ തന്നെ തുടങ്ങുമെന്ന് തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാര്‍ പ്രഖ്യാപിച്ചു. കേരളത്തില്‍ തൊട്ടുമുന്നില്‍ തദ്ദേശ തിരഞ്ഞെടുപ്പും നിയമസഭാ തിരഞ്ഞെടുപ്പുമുണ്ട്. ഇതിനെ എങ്ങനെ ബാധിക്കുമെന്ന ആശങ്കയുമുണ്ട്.

ആന്‍ഡമാന്‍ ആന്‍ഡ് നിക്കോബാര്‍, ഛത്തീസ്ഗഢ്, ഗുജറാത്ത്, കേരളം, ലക്ഷദ്വീപ്, മധ്യപ്രദേശ്, പുതുച്ചേരി, രാജസ്ഥാന്‍, തമിഴ്‌നാട്, ഉത്തര്‍പ്രദേശ്, പശ്ചിമ ബംഗാള്‍ എന്നിവിടങ്ങളെയാണ് എസ്‌ഐആറിന്റെ രണ്ടാം ഘട്ടത്തില്‍ ഉള്‍പ്പെട്ടിരിക്കുന്നത്. നുഴഞ്ഞുകയറ്റക്കാരായ വോട്ടര്‍മാരെ കണ്ടെത്തുക, ഒന്നില്‍ കൂടുതലുള്ള വോട്ടര്‍മാരെ ഒഴിവാക്കുക, സ്ഥലം മാറിപ്പോയതും മരിച്ചുപോയതുമായ വോട്ടര്‍മാരെ പട്ടികയില്‍ നിന്നും മാറ്റുക എന്നിവയെല്ലാം ലക്ഷ്യമിട്ടാണ് എസ്‌ഐആര്‍ എന്നാണ് തിരഞ്ഞെടുപ്പ് കമ്മിഷന്‍ വ്യക്തമാക്കുന്നതെങ്കിലും ഇതിനെ കേരളം എങ്ങനെ കൈകാര്യം ചെയ്യുമെന്നാണ് എല്ലാവരും ഉറ്റുനോക്കുന്നത്. കേരളത്തില്‍ നിലവില്‍ 2.785 കോടി വോട്ടര്‍മാരുണ്ട്. കേരളത്തിൽ 2002-ല്‍ ആണ് അവസാനമായി എസ്‌ഐആര്‍ നടന്നത്.

Content Highlights: Kerala`s voter list undergoes Special Intensive Revision (SIR) with Aadhaar as ID. Learn about the process, potential impacts on elections, and eligibility criteria. Find out who might be excluded.