UPSC പരീക്ഷാ നിയമങ്ങളിൽ അടിമുടി മാറ്റം; IAS, IFS ഉദ്യോഗസ്ഥർക്ക് വീണ്ടും പരീക്ഷ എഴുതാനാവില്ല

ന്യൂഡൽഹി: 2026-ലെ സിവിൽ സർവീസ് പരീക്ഷയ്ക്കുള്ള (UPSC CSE 2026) ഔദ്യോഗിക വിജ്ഞാപനത്തോടൊപ്പം പരീക്ഷാ നടപടിക്രമങ്ങളിൽ നിർണ്ണായകമായ മാറ്റങ്ങൾ വരുത്തി യുപിഎസ്‌സി. അപേക്ഷാ രീതി, തിരിച്ചറിയൽ പരിശോധന, നിലവിലെ ഉദ്യോഗസ്ഥരുടെ യോഗ്യത എന്നിവയിലാണ് പ്രധാനമായും മാറ്റങ്ങൾ വരുത്തിയിരിക്കുന്നത്. 

അപേക്ഷാ രീതിയിലെ മാറ്റങ്ങൾ

• നാല് ഘട്ടങ്ങളുള്ള ഓൺലൈൻ അപേക്ഷ: അപേക്ഷാ പ്രക്രിയ നാല് ഘട്ടങ്ങളായി വിഭജിച്ചു. ഇതിനായി 'യൂണിവേഴ്സൽ രജിസ്ട്രേഷൻ നമ്പർ' (യുആർഎൻ) എന്ന പുതിയ സംവിധാനം ഏർപ്പെടുത്തിയിട്ടുണ്ട്.

• URN സംവിധാനം: ഒരു ഉദ്യോഗാർത്ഥിക്ക് ജീവിതകാലം മുഴുവൻ ഉപയോഗിക്കാവുന്ന സ്ഥിരമായ രജിസ്‌ട്രേഷൻ നമ്പറാണിത്. പ്രൊഫൈലിലെ വിവരങ്ങൾ ഒരിക്കൽ മാത്രമേ തിരുത്താൻ സാധിക്കൂ.

• ലൈവ് ഫോട്ടോയും ഒപ്പും: അപേക്ഷാ ഫോം പൂരിപ്പിക്കുമ്പോൾ ഉദ്യോഗാർത്ഥി ലൈവ് ഫോട്ടോ എടുത്ത് അപ്‌ലോഡ് ചെയ്യണം. കൂടാതെ, വെള്ളക്കടലാസിൽ നിശ്ചിത രീതിയിൽ മൂന്ന് തവണ ഒപ്പിട്ട് (ട്രിപ്പിൾ സിഗ്നേച്ചർ) ഒരൊറ്റ ഫയലായി അപ്‌ലോഡ് ചെയ്യണമെന്ന പുതിയ നിയമവും നിലവിൽ വന്നു.

• തിരുത്തലുകൾക്ക് അവസരമില്ല: അപേക്ഷ സമർപ്പിച്ചു കഴിഞ്ഞാൽ പിന്നീട് യാതൊരുവിധ തിരുത്തലുകൾക്കോ അപേക്ഷ പിൻവലിക്കാനോ സാധിക്കില്ല.

പരീക്ഷാ കേന്ദ്രത്തിലെ പരിശോധനകൾ

• ഫേസ് ഓതൻ്റിക്കേഷൻ: പരീക്ഷാ കേന്ദ്രങ്ങളിൽ ഉദ്യോഗാർത്ഥികളുടെ മുഖം സ്കാൻ ചെയ്ത് തിരിച്ചറിയൽ ഉറപ്പാക്കുന്ന 'ഫേസ് ഓതന്റിക്കേഷൻ' നിർബന്ധമാക്കി. ആധാർ അധിഷ്ഠിത പരിശോധനകൾക്കും മുൻഗണന നൽകും.

• അഡ്മിറ്റ് കാർഡ്: ഇ-അഡ്മിറ്റ് കാർഡുകൾ മാത്രമേ ലഭ്യമാകൂ. ഇവ ലഭിക്കുന്നത് ഉദ്യോഗാർത്ഥി പരീക്ഷയ്ക്ക് യോഗ്യനാണെന്നതിന്റെ അന്തിമ രേഖയല്ല. അഭിമുഖത്തിന് ശേഷമുള്ള വെരിഫിക്കേഷനിലൂടെ മാത്രമേ യോഗ്യത ഉറപ്പാക്കൂ.

ഐ.എ.എസ്/ഐ.എഫ്.എസ് ഉദ്യോഗസ്ഥർക്ക് നിയന്ത്രണം

• വീണ്ടും പരീക്ഷയെഴുതാൻ കഴിയില്ല: നിലവിൽ ഐ.എ.എസ് അല്ലെങ്കിൽ ഐ.എഫ്.എസ് സർവീസിലുള്ളവർക്ക് 2026-ലെ പരീക്ഷയ്ക്ക് അപേക്ഷിക്കാൻ അർഹതയുണ്ടായിരിക്കില്ല. പ്രിലിമിനറി പരീക്ഷയ്ക്ക് ശേഷം തലേവർഷത്തെ എഴുതിയ പരീക്ഷപ്രകാരം നിയമനം ലഭിച്ചാൽ തുടർ പരീക്ഷ എഴുതാൻ അനുവദിക്കില്ല.

• ഐ.പി.എസ് ഉദ്യോഗസ്ഥർക്ക്: നിലവിൽ ഐ.പി.എസ് ഓഫീസറായ ഒരാൾക്ക് വീണ്ടും പരീക്ഷ എഴുതാമെങ്കിലും, അവർക്ക് രണ്ടാമതും ഐ.പി.എസ് തന്നെ തിരഞ്ഞെടുക്കാൻ സാധിക്കില്ല. റാങ്ക് മെച്ചപ്പെടുത്താൻ ഇവർക്ക് 'വൺ ടൈം ഇംപ്രൂവ്‌മെന്റ്' അവസരം നിബന്ധനകൾക്ക് വിധേയമായി നൽകും.

• ഇക്കൊല്ലത്തെ പരീക്ഷ വിജയിച്ച് ഐ.പി.എസ് അല്ലെങ്കിൽ മറ്റേതെങ്കിലും ഗ്രൂപ്പ് എ സെൻട്രൽ സർവീസ് ലഭിച്ചവർക്ക് അവസരം മെച്ചപ്പെടുത്താൻ 2027-ൽ ഒരു അവസരംകൂടി ലഭിക്കും.

• നിലവിലുള്ള സർവീസിലെ ട്രെയിനിങ് ഘട്ടത്തിൽ ഒരു തവണ മാത്രം ഇളവു ലഭിക്കും. സിഎസ്ഇ 2026 വിജയിച്ച് ട്രെയിനിങ്ങിൽ പ്രവേശിക്കുകയോ ഇളവു തേടുകയോ ചെയ്‌തില്ലെങ്കിൽ സർവീസ് അലൊക്കേഷൻ റദ്ദാകും.

• ഇളവു തേടിയ ശേഷം സിഎസ്ഇ 2027 എഴുതി മികച്ച സർവീസ് ലഭിച്ചാൽ 2026, 2027 സർവീസുകളിൽ മികച്ചതു തിരഞ്ഞെടുക്കാം. 

• 2025-ലോ അതിനു മുൻപോ സർവീസിൽ കയറിയവർക്ക്, രാജിവയ്ക്കാതെതന്നെ ഈ വർഷമോ അടുത്ത വർഷമോ വീണ്ടും പരീക്ഷയെഴുതാൻ ഒരു അവസരംകൂടി ലഭിക്കും. ഇവർ 2028-ലെ പരീക്ഷ എഴുതണമെങ്കിൽ രാജിവെക്കേണ്ടിവരും.

• 2027-ലെ പരീക്ഷ എഴുതി സർവീസിലേക്കു തിരഞ്ഞെടുക്കപ്പെടുന്നില്ലെങ്കിൽ 2026-ലെ സർവീസിലേക്കു തിരിച്ചു പോകാം. 2027-ലെ പരീക്ഷയ്ക്കു ശേഷവും സർവീസിൽ തിരികെ പ്രവേശിച്ചില്ലെങ്കിൽ രണ്ട് സർവീസ് അലൊക്കേഷനും റദ്ദാകും.

ഇഷ്ട‌കേന്ദ്രം തിരഞ്ഞെടുക്കാം

ഇനിമുതൽ ഭിന്നശേഷിക്കാരായ ഉദ്യോഗാർഥികൾക്ക് ഇഷ്ടമുള്ള പരീക്ഷാകേന്ദ്രം തിരഞ്ഞെടുക്കാം. അപേക്ഷ നൽകുന്ന ഘട്ടത്തിൽ ഏതു കേന്ദ്രത്തിനാണോ ആദ്യ പ്രിഫറൻസ് നൽകുന്നത്, ആ കേന്ദ്രം തന്നെ അനുവദിക്കും.  അപേക്ഷാ നടപടികളുടെ തുടക്കത്തിൽ പരീക്ഷാകേന്ദ്രം തിരഞ്ഞെടുക്കാനുള്ള അവസരം ഭിന്നശേഷിക്കാരല്ലാത്തവർക്കും ലഭ്യമാക്കും. ഒരു കേന്ദ്രത്തിലെ പരമാവധി അപേക്ഷ എത്തിയാൽ ഭിന്നശേഷിക്കാരല്ലാത്തവർക്ക് പിന്നീട് ആ കേന്ദ്രം തിരഞ്ഞെടുക്കാൻ സാധിക്കില്ല. എന്നാൽ ഭിന്നശേഷിക്കാർക്ക് തുടർന്നും അവസരമുണ്ടാകും.

പരീക്ഷാ തീയതികളും ഒഴിവുകളും

• അവസാന തീയതി: ഫെബ്രുവരി 24, വൈകുന്നേരം 6 മണി വരെ.

• പ്രിലിമിനറി പരീക്ഷ: 2026 മേയ് 24.

• മെയിൻ പരീക്ഷ: 2026 ഓഗസ്റ്റ് 21 മുതൽ.

• ഒഴിവുകൾ: സിവിൽ സർവീസിൽ 933 ഒഴിവുകളും ഫോറസ്റ്റ് സർവീസിൽ 80 ഒഴിവുകളുമാണ് നിലവിൽ റിപ്പോർട്ട് ചെയ്തിരിക്കുന്നത്.

Content Highlights: UPSC CSE 2026 notification brings significant changes to application, ID verification, and eligibility for current officers.