PhD ഗവേഷകർക്കായി 100 ദശലക്ഷം ഡോളറിന്റെ സ്കോളർഷിപ്പ് പ്രഖ്യാപിച്ച് ടൊറന്റോ സർവകലാശാല

ലോകമെമ്പാടുമുള്ള മികച്ച പിഎച്ച്ഡി ഗവേഷകരെ കാനഡയിലേക്ക് ആകർഷിക്കുന്നതിനായി ടൊറന്റോ സർവകലാശാല 100 ദശലക്ഷം ഡോളറിന്റെ (ഏകദേശം 955.97 കോടി രൂപ) സ്കോളർഷിപ്പ് പദ്ധതി പ്രഖ്യാപിച്ചു. 'പ്രസിഡന്റ്സ് ഇംപാക്ട് സ്കോളർഷിപ്പ്' എന്നാണ് പദ്ധതി അറിയപ്പെടുന്നത്.

പ്രധാന വിവരങ്ങൾ:

• സാമ്പത്തിക സഹായം: തിരഞ്ഞെടുക്കപ്പെടുന്ന ഓരോ വിദ്യാർഥിക്കും പ്രതിവർഷം 80,000 ഡോളർ (ഏകദേശം 76.97 ലക്ഷം രൂപ) ലഭിക്കും. നാല് വർഷത്തെ കോഴ്സ് കാലയളവിൽ ആകെ 3,20,000 ഡോളറാണ് (ഏകദേശം 3.08 കോടി രൂപ) ലഭിക്കുക.

• ധനസഹായ ഉറവിടം:  കനേഡിയൻ ഫാമിലി ഫൗണ്ടേഷൻ നൽകിയ 50 ദശലക്ഷം ഡോളറിന്റെ ഗ്രാന്റും സർവകലാശാലയുടെ തുല്യ വിഹിതമായ 50 ദശലക്ഷം ഡോളറും ചേർത്താണ് 100 ദശലക്ഷം ഡോളറിന്റെ ഫണ്ട് രൂപീകരിച്ചത്.

• തിരഞ്ഞെടുപ്പും തുടക്കവും: 2027 സെപ്റ്റംബർ മുതൽ ആരംഭിക്കുന്ന പദ്ധതിയിലൂടെ ആദ്യഘട്ടത്തിൽ പ്രതിവർഷം 12 മുതൽ 13 വരെ ഗവേഷകർക്ക് സ്കോളർഷിപ്പ് ലഭിക്കും. നാലാം വർഷത്തോടെ ആകെ സ്കോളേഴ്സിന്റെ എണ്ണം 50 ആയി ഉയരും. തുടർന്ന് എല്ലാ വർഷവും തുക ലഭ്യമാക്കും.

• പ്രത്യേകത: ഓരോ ഗവേഷകനും രണ്ട് ഫാക്കൽറ്റി സൂപ്പർവൈസർമാരുടെ മാർഗ്ഗനിർദ്ദേശം ലഭിക്കും. ഇത് മൾട്ടി-ഡിസിപ്ലിനറി ഗവേഷണത്തിന് കൂടുതൽ കരുത്തേകും.

ക്യുഎസ് വേൾഡ് യൂണിവേഴ്സിറ്റി റാങ്കിംഗിൽ 32-ാം സ്ഥാനത്തുള്ള ടൊറന്റോ സർവകലാശാല, കാനഡയിലെ ഏറ്റവും മികച്ച പൊതു സർവകലാശാലകളിൽ ഒന്നാണ്.

Content Highlights: University of Toronto launched a $100 million President's Impact Scholarship for PhD researchers.