ജോലി ചെയ്യുന്നതിനോടൊപ്പം ഐഐടിയില് പഠിക്കാമോ? വിശദമായി അറിയാം
ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജിയില് (ഐഐടി) പ്രവേശനം നേടുക എന്നത് ഇന്ത്യയിലെ ലക്ഷക്കണക്കിന് വിദ്യാര്ഥികളുടെ സ്വപ്നമാണ്. ഇത് കരിയര് വളര്ച്ചയെ സഹായിക്കുന്നതിനോടൊപ്പം നിരവധി സാധ്യതകളാണ് തുറന്നിടുന്നത്.വളര്ച്ചാ മനോഭാവമുള്ള വിദ്യാര്ഥികളുമായുള്ള സമ്പര്ക്കം, പരിചയസമ്പന്നരും ഉയര്ന്ന യോഗ്യതയുള്ളവരുമായ പ്രൊഫസര്മാരുടെ ലഭ്യത, നൂതന ലബോറട്ടറി സൗകര്യങ്ങള്, ശക്തമായ പ്ലേസ്മെന്റ് പിന്തുണ തുടങ്ങി മറ്റ് നിരവധി നേട്ടങ്ങളും നല്കുന്നു. ജോലി ചെയ്യുന്നതിനോടൊപ്പം ഐഐടിയില് എങ്ങനെ പ്രവേശനം നേടാമെന്ന് നോക്കാം.
ഐഐടിയില് പ്രവേശനം നേടാന് ഒന്നിലധികം വഴികളുണ്ട്. ബാച്ചിലര് ഓഫ് എഞ്ചിനീയറിങ് (ബിഇ) അല്ലെങ്കില് ബാച്ചിലര് ഓഫ് ടെക്നോളജി (ബിടെക്) പഠിക്കുന്നതിന്, വിദ്യാര്ഥികള് ജെഇഇ മെയിന്, അഡ്വാന്സ്ഡ് പരീക്ഷകള് പാസാകണം.
മാസ്റ്റര് ഓഫ് ടെക്നോളജി (എംടെക്) പഠിക്കാന് ആഗ്രഹിക്കുന്നവര്ക്ക്, ഗേറ്റ് (ഗ്രാജുവേറ്റ് ആപ്റ്റിറ്റിയൂഡ് ടെസ്റ്റ് ഇന് എഞ്ചിനീയറിങ്) പരീക്ഷയാണ് പ്രവേശന മാര്ഗ്ഗം. എന്നിരുന്നാലും, ഇവയെല്ലാം ഫുള്-ടൈം പ്രോഗ്രാമുകളാണ്, കോഴ്സ് പൂര്ത്തിയാക്കാന് വിദ്യാര്ഥികള് സ്ഥിരമായി ക്യാമ്പസില് ഹാജരാകേണ്ടതുണ്ട്. കൃത്യമായ ഹാജര് ശതമാനം വേണമെന്ന് ചുരുക്കം.
ജോലി ചെയ്യുന്നവര്ക്കായുള്ള പാര്ട്ട്-ടൈം കോഴ്സ്
ജോലി അല്ലെങ്കില് വ്യക്തിപരമായ കാരണങ്ങളാല് സ്ഥിരം ക്ലാസുകളില് പങ്കെടുക്കാന് കഴിയാത്തവര്ക്കായി, പല ഐഐടികളും എംടെക് പ്രോഗ്രാം വാഗ്ദാനം ചെയ്യുന്നുണ്ട്. ഈ പ്രോഗ്രാമുകള് ജോലി ചെയ്യുന്ന പ്രൊഫഷണലുകള്ക്കായി പ്രത്യേകം രൂപകല്പ്പന ചെയ്തവയാണ്. സാധാരണയായി വൈകുന്നേരങ്ങളിലോ വാരാന്ത്യങ്ങളിലോ ആണ് ക്ലാസുകള് ക്രമീകരിക്കുന്നത്. ഇത് ജോലിയില് തുടരുന്നതിനോടൊപ്പം ഉന്നത വിദ്യാഭ്യാസം നേടുന്നതും എളുപ്പമാക്കുന്നു.
യോഗ്യതാ മാനദണ്ഡങ്ങള്
ഓരോ ഐഐടിക്കും പാര്ട്ട്-ടൈം എംടെക് പ്രോഗ്രാമുകള്ക്ക് അതിന്റേതായ യോഗ്യതാ നിയമങ്ങളുണ്ട്. മിക്കവാറും സന്ദര്ഭങ്ങളില്, പ്രവേശനത്തിനായി ഉദ്യോഗാര്ത്ഥികള് ഒരു പ്രവേശന പരീക്ഷ എഴുതേണ്ടതില്ല. യോഗ്യത നേടുന്നതിന്, ഉദ്യോഗാര്ത്ഥിക്ക് അംഗീകൃത സര്വകലാശാലയില് നിന്ന് ബി.ടെക് അല്ലെങ്കില് ബി.ഇ ബിരുദം ഉണ്ടായിരിക്കണം.
വിദ്യാഭ്യാസ യോഗ്യതകള്ക്ക് പുറമേ, പ്രസക്തമായ പ്രവൃത്തിപരിചയവും സാധാരണയായി ആവശ്യമാണ്. തങ്ങളുടെ തൊഴില്പരമായ ഉത്തരവാദിത്തങ്ങള് തുടരുന്നതിനോടൊപ്പം ഒരു പാര്ട്ട്-ടൈം അക്കാദമിക് പ്രോഗ്രാമിന്റെ ആവശ്യകതകള് നിറവേറ്റാന് ഉദ്യോഗാര്ത്ഥികള് തയ്യാറാണെന്ന് ഇത് ഉറപ്പാക്കുന്നു.
പ്രവേശന നടപടികള്
പാര്ട്ട്-ടൈം എംടെക് പ്രോഗ്രാമുകളുടെ പ്രവേശന നടപടികള് ഓരോ ഐഐടിയിലും വ്യത്യസ്തമായിരിക്കാം. ഇതില് പലപ്പോഴും ഒരു എഴുത്തുപരീക്ഷയും അഭിമുഖവും ഉള്പ്പെടുന്നു. ചില സ്പെഷ്യലൈസേഷനുകളില്, ഗേറ്റ് സ്കോറുകള് പരിഗണിക്കപ്പെട്ടേക്കാം. എന്നിരുന്നാലും ഇത് എല്ലായ്പ്പോഴും നിര്ബന്ധമല്ല.
തിരഞ്ഞെടുപ്പ് പ്രക്രിയയില് സാധാരണയായി ഉദ്യോഗാര്ത്ഥിയുടെ ഗേറ്റ് സ്കോര് (ആവശ്യമെങ്കില്), മുന്കാല അക്കാദമിക് പ്രകടനം, തൊഴില്പരമായ പരിചയം എന്നിവ വിലയിരുത്തുന്നു. ഷോര്ട്ട്ലിസ്റ്റിങ് പ്രക്രിയയ്ക്ക് ശേഷം, തിരഞ്ഞെടുക്കപ്പെട്ട ഉദ്യോഗാര്ത്ഥികളെ അഭിമുഖങ്ങള്ക്കും ചിലപ്പോള് ഒരു എഴുത്തുപരീക്ഷയ്ക്കും ക്ഷണിക്കുന്നു. അതിന് ശേഷമാണ് അന്തിമ പ്രവേശനം നല്കുന്നത്.
പ്രോഗ്രാമിന്റെ കാലാവധി
ഫുള്-ടൈം എം.ടെക് പ്രോഗ്രാമിന് 24 മാസത്തെ (4 സെമസ്റ്റര്) കാലാവധിയുള്ളപ്പോള്, പാര്ട്ട്-ടൈം എംടെക് പ്രോഗ്രാമിന് സാധാരണയായി 36 മാസത്തെ (6 സെമസ്റ്റര്) ദൈര്ഘ്യമുണ്ട്. കോഴ്സിന്റെ ഉള്ളടക്കം ഫുള്-ടൈം പ്രോഗ്രാമിന് തുല്യമായിരിക്കും, എന്നാല് ദൈര്ഘ്യമേറിയ സമയപരിധി അക്കാദമിക് പഠനവും തൊഴില്പരമായ ഉത്തരവാദിത്തങ്ങളും സന്തുലിതമാക്കാന് സഹായിക്കുന്നു.
പാര്ട്ട്-ടൈം എംടെക് പ്രോഗ്രാമുകള് വാഗ്ദാനം ചെയ്യുന്ന ഐഐടികള്
ഏറ്റവും പ്രശസ്തമായ പല ഐഐടികളും പാര്ട്ട്-ടൈം എം.ടെക് അവസരങ്ങള് വാഗ്ദാനം ചെയ്യുന്നു, അവയില് ഉള്പ്പെടുന്നവ:
- ഐഐടി ഡല്ഹി
- ഐഐടി ബോംബെ
- ഐഐടി റൂര്ക്കി
- ഐഐടി കാണ്പൂര്
മറ്റ് ഐഐടികളും സമാനമായ അവസരങ്ങള് നല്കിയേക്കാം. വിദ്യാര്ഥികള് ഓരോ സ്ഥാപനത്തിലും ലഭ്യമായ കോഴ്സുകളെക്കുറിച്ച് ശ്രദ്ധാപൂര്വ്വം അന്വേഷിക്കണം.
ഐഐടികളിലെ പാര്ട്ട്-ടൈം എംടെക് പ്രോഗ്രാമുകളില് താല്പ്പര്യമുള്ള വിദ്യാര്ഥികള് അതത് സ്ഥാപനങ്ങളുടെ ഔദ്യോഗിക വെബ്സൈറ്റുകള് പതിവായി പരിശോധിക്കാന് നിര്ദ്ദേശിക്കുന്നു. ഫീസ്, അപേക്ഷാ തീയതികള്, രജിസ്ട്രേഷന് നടപടിക്രമങ്ങള്, കോഴ്സുകളുടെ ലഭ്യത, മറ്റ് പ്രധാന വിശദാംശങ്ങള് എന്നിവയെക്കുറിച്ചുള്ള കൃത്യമായ വിവരങ്ങള് ഈ വെബ്സൈറ്റുകളില് ലഭ്യമാകും.
Content Highlights: Part-Time MTech in IITs: Admission Guide